SEI-ATAMAI VAHTAO 9 - SHEEYU BAIBEL (BSI)

Saul nou Ledalouyu

¹ Ana chu koutea Saul nou Mapaowo rozümaitaoye soupire ea southeare le pfüa napao peichana hi tare,

² alia Mapao vei Ludu hinou ta-a buyu naotumai-a poutumai-a ngaodaomai taye niloua sütaoye sü puhye panou Jerusalem hi saveloure donou Damaska hi buyu rathobuh taohi peire kharochi seiko peio tea puh hinou tave khoe.

³ Alia chuo Saul nou tapoa Damaska nuhdu ngheiki kouyu kisü, sükhaimoa raki hinou ava linou kouloua puh thai-jü hisü varu loure.

⁴ Sükisü puhsü deiphi hi dukoure ea pai alinou puh hisü, “Saul, Saul, ne daidonou Eye souveawe?” tea paoyu sü choue.

⁵ Alia puhnou noue, “Mapao, ne thaohwe?” Puhnou chila peie, “Ewo nenou souvea-a buyuna Jisue;

⁶ ana shuloua nuhdu hisü taloukhaio, alia nenou soure sü daie touyu sü nehi paongao peilai.”

⁷ Puhye koa vei-a laiyu maitao nou pai nasü choue, ana maili-a ngaomoyu donou paikhai moa la-a bue.

⁸ Saul nou deiphinou lashuloua puh nghithou hepayu kisü halia ngaokhai more. Südonou puletao nou puhye baokao süthailoua Damaska hi sa-a loure.

⁹ Alia teithe asü puhsü nghithou ngaokhaimoa ea tousho khaimoa bue.

Anania nou Saul nghithou souvei peiyu

¹⁰ Chuo Damaska hisü Anania tea kuyu rozümai ali bue. Alia Mapao nou puh hisü zho hinou paoe, “Anania!” Puhnou chila peie, “Mapao E haihi bue.”

¹¹ Mapao nou puh hi paoe, “Shulo ea tapoa ‘Zütouyu’ tea kuyu duva hisü taveloua Tarsa hi mai Saul tea kuyu mai sünaye Judas ki hinou ve phoukhaio, daiolouzü zhukhaio, puhsü veachi pao-a bue,

¹² alia puhvei zhokounou Anania tea kuyu mai alinou taveloua puh nghithou sü panou ngaodakhai loure donou puh bahsü puh pei hi khaipeiyu sü puhnou ngaoe.”

¹³ Ana Anania nou chila peie, “Mapao, mai hainanou, Jerusalem hinou nevei sheeyu maitao hi hashi daizhozhou soupeie touyu ko sü Enou mai taoli hinou chouloure;

¹⁴ alia nezhih hinou kua buyu mai hrülaiye niloure donou puhnou napao adumaitao hinou soulouvei khouko sü ngaoloua buh haihi ve-e.”

¹⁵ Ana Mapao nou puh hi paoe, “Tawo, daiolouzü tahrüh kukhe hi, vemai taohi, ea Israel maitao nghojü hi Azhih pove peire donou puh hai Enou dopakhai touyu Avei bahsei alie.

¹⁶ Daiolouzü Azhihye donou puhnou daizhozhou koute vea vuzülaisa touyu sü Enou puh hi ngaopeilai.”

¹⁷ Südonou Anania nou taloua ki sühi sü talou loure. Alia puh bahsü Saul peiva hi pokhailoua paoe, “Athaihou jürai Saul, nenou taveyu ludu hinou neye ngaopeiyu Mapao Jisu nou neye panou nghithou ngaodakhai loure ea Rako Mashinou phouloure donou Eye seivewe.”

¹⁸ Alia sübü hinou khah kao kuyu hali sü puh nghithou hinou dekoure ea puh nghi sü ngaodalou khaire. Süthaisü puhnou shuloua dzükhao daloure,

¹⁹ alia hatou louyu thaisü puhsü tsüloure. Süthaisü Saul nou rozümaitaoye koa Damaska hinou teithe taoli bue.

Saul nou Damaska hinou Ko Paodouyu

²⁰ Alia thala-a puhnou rathobuhtao hinou, “Jisu hai Ramai Nahpoutue,” tea ko paodoue.

²¹ Alia puh chi choua buyu maikhemai hrülainou khupaloua paoe, “Jerusalem hinou zhih hainaye kua buyu maitaoye southeayu mainasü haina mowu? Alia puhnou buh haihi veyu hai mai sütaoye niloua napao adumai taohi pove peire donou vebai mowu?”

²² Ana Saul vei paodouyu sü khoupu lailai loua Jisu hai Khrista vuzüe tea soutaosou zhopaoh peiloua Damaska hi buyu Jihudimai taosü puh hi ha chila lia peire hare.

²³ Teithe taoli talayu thaisü, Jihudimai taonou tave dzüloua puhye southeare do phouloure,

²⁴ ana puletao do nasü Saul nou süloure. Puhye southeare donou puletao nou khei-hea nuhdu romütao hinou khoa puhye dah-a bue.

²⁵ Ana puh thaifümai taonou puhye sü kheinou sataloua ro alihi thouloua bouvou peinou phakou peire.

Saul nou Jerusalem hinou Ko Paodouyu

²⁶ Alia Saul nou Jerusalem hi velou louyu kisü, puhnou rozümai taoye koa buzhore donou teshoe, ana puletao hrülainou puhye sü ngaopi loure, daiolouzü puh hai rozümai alie touyu sü puletao nou louche peimoe.

²⁷ Ana Barnabas nou puhye saloua sei-atamai taohi savepeie, alia Saul nou kakua puh veihdu hinou Mapaoye ngaoe ea Mapao nou puh hi kabüa chi paoe, alia kabüa puhnou Damaska hinou khuveia Jisu zhih hinou ko paodoue touyu sü puhnou puletao hi soutaosoua paongao peie.

²⁸ Südonou Saul nou, puletaoye koa bua Jerusalem hinou takou takhe-a Mapao zhih hinou khuvei-a ko paodoua bue.

²⁹ Alia puhnou Greek tamai la souyu Jihudimai taoye koa chi pha-a ea chi veiva-a bue; ana puletao nou puhye southeare donou phoua bue.

³⁰ Lüloumai taonou süsü sülouyu kisü, puletao nou puhye sü Kaisaria hi sakouloua Tarsa hi seitawure.

³¹ Südonou Judea, Galilee ea Samaria hi buyu lüloumaime teitei sü soutsü puloua kaonayu teile ngaoloue; alia Mapaoye khuhaoyu hinou ta-a ea Rako Mashinou souva sousa pei-a lüloumaime sü pupaloure.

Pitar nou Luda ea Jopa hinou Vah Souyu

³² Alia chuo Pitar nou teidei holo hailo sühaopoa tayu hinou vuhli sü puhnou Luda hinou hrüa buyu sheeyu maitaoye tave daoe.

³³ Alia buh sühinou Inia tea kuyu, po acha koute züh hinou zü vuzüa buyu pothaimai aliye puhnou tave ngaoloure.

³⁴ Alia Pitar nou puh hi paoe, “Inia, Jisu Khrista nou neye souvei peiwe; shuloua ne zühsü soulo.” Alia thalasoua puhsü shuloure.

³⁵ Alia Luda ea Sharon hinou hrüa buyu khemai hrülainou puhye sü ngaoloua Mapaowo hilo veloure.

³⁶ Alia Jopa hisü Tabitha tea kuyu rozümai pfü ali bue (puh zhih hai Greekmai la hinou Dorka toue), naotu hainapai sü teisanou vah avei soua ea toure hamaiye soukha-a hrüe.

³⁷ Alia sükuyu teithetao hinou puhsü lishiloua thaire; alia puletao nou puh pfüphao sü thaidzü khüche peiwu-a kishorei kide alihi puhye sü pokhaire.

³⁸ Alia Luda hai Jopa ngheiki bubaiyu donou rozümai taonou Pitar hai sühi bue touyu sü chouloua mai ahaiye puh hi seiho, “Ne thalasou Eletao hi vepeio,” tea panou ve kue.

³⁹ Südonou Pitar nou shuloua puhaiye koa tare. Alia puhnou velouyu kisü, puletao nou puhye sü kishorei kide nahi sapa khaipeire. Alia meamai pfütao hrülainou Pitar ngheikinou la-a Dorkanou puletaoye koa hrübuki rüpei-doupeiyu zhaotao ea sahnü taosü pongao-a kra-a bue.

⁴⁰ Ana Pitar nou puletao hrülaiye panou vakou lüpawu-a kou khou khüloua veachi paoe; süthaisü puhnou thaiphao nahi reiveloua, “Tabitha, tashulouwo tea paoe.” Sühinou puh nghi hepa loure ea Pitarye ngaoloua tashu chobu loure.

⁴¹ Alia Pitar nou puh bah thaikouloua puhye süthaishu peie. Süthaisü puhnou lüloumaitao hrülaiye süolouzü meamai pfütaoye-apu kubailoua puhye sü hri-a puletao hi thaothou peiwure.

⁴² Ko süsü Jopa teidei teiteihi süvelouyu kisü, maikhemai alaonou Mapaoye sü louche loure.

⁴³ Alia Simon tea kuyu souhee vah souyu mai aliye koa Pitar nou Jopa hi teithe taoli chao-a bue.