SEI-ATAMAI VAHTAO 28 - SHEEYU BAIBEL (BSI)

Malta Zaipeidei hinou Tave Soyu

¹ Zaipehi tupa louyu kisü, Eletao nou zaipeidei süsü Malta tea kuwe touyu sü süloure.

² Alia teidei sühi maitao nou alaosou Eletao hi khuleshi peie, daiolouzü sükisü teirü shoyu ea seishoyu donou puletao nou mei soutu khaitoua Eletao hrülaiye sasa-a sheloue.

³ Sükisü Paul nou süükhuli kopoveloua süsü meihi pothouyu kisü meinou rouyu donou nghouvo alisü meihinou chopaloua puh bah hipa zhatei loure

⁴ Nghou sünanou Paul bah hinou taozhu-a buyu sü teidei sühi maitao nou ngaolouyu kisü puletao alinou lihi haibüa paoe, “Mai haina hai veikhaimoa maiye southeayu mai ali-a malae. Alia puhnou zai hinou tupalou khaia, Ramai vei acheche chikuyu sünanou panou puhye hrikhai laimoe.”

⁵ Ana Paul hi halia sou shiyu soukhaimoa puhnou nghou sünaye meihi zhilai thoure.

⁶ Sükisü puh vasou hai mapa shulai moa puh hai thala-a kaokou thaibai shulai tea puletao nou zhia bue. Ana puletao nou phashona zhia bua puh hisü ha kaoshiyu lia ngaomoyu kisü puletao tsü hai daloua, “Puh hai ramai alie!” tea paoe.

⁷ Alia buh süna ngheiki zaipeidei süna paopu soua buyu Publia tea kuyu mai sünavei füdei taoli bue. Puhnou sasa-a Eletaoye sheloua teithe asü hai puh kihinou Eletaoye soutaosoua vaitoupeie.

⁸ Sükisü Publia puo hai rakee-a ea zheteia züh hinou züa bue. Paul nou puh hi taveloua veachi paopeie ea puh bahsü puh pei hi lakhai peiwu-a puhye sü souvei peie.

⁹ Sübüyu vanou zaipeidei sühi buyu kukhe sounou maitao hrülai-a tave ea puletaoye souvei peie.

¹⁰ Puletao nou Eletao hi sapeina taoli peie, alia Eletao nou dzüluki hi nou tare kisü Ehye donou dzüpei veihduhi moshi laiyu tousona taoli dzüluki hi pove thoupeie.

Malta hinou Rom hi Tayu

¹¹ Khou asü thaisü Eletao nou Alejandria hinou veyu, “Nahbei ramai hai,” tea kuyu saiki hi zaipeidei nou chao-a buyu dzüluki süna hinou saopoa tae.

¹² Alia Eletao nou Surakus nuhdu hi tave louloua sühinou teithe asü nai-a bue.

¹³ Süthaisü sühinou Eletao nou taloua Regia nuhdu hi veloue. Thainaisho sü khekou lonou teikhai sü hükheloua Eletao nou teithe ahai levai hinou Puteoli nuhdu hi velou loure.

¹⁴ Sühinou Eletao nou thaihou jüraimai kamai taoye tave daoloue, alia Eletaoye nou teithecho ali puletaoye koa naire donou kuloue. Süthaisü Eletao nou Rom hi velouloue.

¹⁵ Alia Rom hi buyu thaihou jürai khemainou Eletao ko choulouyu kisü Ehye daore donou Appai nuhdu hupobuh hi koute doushoa ea kukhemai taonou Shechaoki Asütao tea kuyu nuhdu hi koute takoue. Paul nou puletaoye ngaolouyu kisü Ramai hi kalo paoe ea puhsü khuh veisho loure.

Paul nou Rom hi Velouyu

¹⁶ Alia Eletao nou Rom hi veloulouyu kisü, reihmai aliye panou Paul ye khoa lah puh dosoua bure aetou peire.

¹⁷ Teithe asü thaisü Paul nou buh sühi Jihudimai peichamai taoye kuve dzüloue. Alia puletao nou tave dzülouyu kisü puhnou puletao hi paoe, “Athaihou jürai maitao, Enou Ehmaitao pei hi moa Eh puopao maitao vei zhaiye hashilia soukhai moyuma Jerusalem hinou Eye hukha hi nüthouloua Rom maitao bah hi thoupeire.

¹⁸ Rom maitao nou Ahinou chi nouloua thaizüyu mahlia puletaonou ngaoloumoyu kisü Eye phapei nüloure.

¹⁹ Ana Jihudimai taonou balouyu kisü, Enou lah Amaitao pei hi mah dukhaire hakhai-a Kaisar hi Achi kupeire donou khopu molou hore.

²⁰ Südanou Enou neletaoye daoloure ea chi phakure kuvewe. Daiolouzü Eye hurainou haibüa phukhai touyu hai Israel maitao nou zhia buyu süna vanoue.”

²¹ Alia puletao nou puh hi paoe, “Ehnou Judea hinou ne vanou seiko lia ngaokhaimoe, moa sühinou taveyu thaihou jürai maitalinoua ve chi lia paongao moe moa ne vanou halia paoshi moe.

²² Ana nenou lichoyu hai daisa touyu sü Ehnou ne hinou chounüwe; daiolouzü buh liki hi nou maikhe mainou nenou tatouli soua koa laiyu me hainaye paoshiwe touyu sü Ehnou süwe.”

²³ Südonou puletao nou Paul ye koa khoukha ali dadeloure, alia teithe sükisü maikhemai alaosou puhnou buyu buh hi tave. Alia puhnou puletao hi shona hinou koukhe koute sü Ramai Vedei vanou soutaosoua paodou peie, alia puhnou Jisu vanou Moses vei razhai ea rachi paolamaitao vei larütao hinou popa paodoua puletaoye douposhu louche peire donou te-e.

²⁴ Puh chipao hinou kamaisü louche loure, ana kamainou louche peimoe.

²⁵ Südonou puletao hrohinou alinou liye veiva-a puletao sü potare, ana Paul nou chipao haina paomo jühiwo louzü puletao hai pota mohie, süolouzü “Daizhozhou veishoa Rako Mashinou Isaiah rachi paolawona mü hinou neletao puopao maitaohi paopeisa!

²⁶ Daiolouzü puhnou haibüa paoe, ‘Mai haitao hi taho paokhaio: Neletao nou keikhai keikhailai, ana sülaimoe; Neletao nou zhukhai zhukhailai, ana ngaolaimoe.

²⁷ Daiolouzü mai haitao tsü sü shitare, alia puletao nou sü kangiwure ea puletao nghithou sü mailoure. Sükumore toulouzü puletao nghithounou ngaoloushulai, puletao nounou choulou shulai, ea puletao tsünou sülou shulai alia puletao sü Ahi khaive puloua Enou puletaoye souvei peiwu shulai.’ ”

²⁸ Alia Paul nou akhaisoua paoe, “Südonou neletao sülouwo, süolouzü Ramai vei khailu peiyu chipao haina hai tahrüh kukhe hi seita peiwure alia puletao nou kei loulai!”

²⁹ Puhnou chi haitao paocheyu thaisü Jihudi maitao nou lah puletao hrohinou veivaloua ratare.

³⁰ Po ahai donou Paul nou ki li ngaloua bue alia puhye daore donou veyu mai hrülaiye sü puhnou sasa-a süpeie.

³¹ Khuveishoa alia halinoua khangiyu ha-a Ramai vei Vedei vanou puhnou ko paopeie alia Mapao Jisu Khrista vanou doupeie.