SEI-ATAMAI VAHTAO 27 - SHEEYU BAIBEL (BSI)

Paul nou Rom hi Taveyu

¹ Alia Eletao hai dzülukinou Itali hi ve vuzülai tea lalouyu kisü puletao nou Paul ea kukhe hukha hibumai kamaiye sü “Veduo reihme” tea kuyu Rom reihmai mehi kaihpeichana Julias bah hi thoupeire.

² Alia Asia teidei hi dzüluki chaobuh zaipe taohi tare Andramutia hinou veyu dzüluki alihi louloua Eletao nou zai hilonou saopoa tare; alia Thessalonika hinou veyu Makedonia himai Aristarkhas-a Eletaoye koa laiwe.

³ Thainaisho sü Eletao nou Sidon hi velou loure; alia Julias nou Paul ye khu-leshisho peia panou puhye samaitao hi taholoua puletaoye panou puh züpa talia peire aetoupeie.

⁴ Alia sühinou zai hilo talouloua teikhainou hüshi shoyu donou Eletao nou Kupra zaipeidei teikhaibo hilonou saopoa tave.

⁵ Alia Eletao nou zaipei hinou tachopoa Kilikia ea Pamphulia tala louyu kisü Lukia teidei hi Mura hi taveloue.

⁶ Sühinou reihmai kaihpei chananou Itali hi tare Alekjandria hinou veyu dzüluki ali ngaoloua Eletaoye sühi salou thoupeie.

⁷ Eletao nou teithe taoli shoshosou saopoa tayu thaisü tateishoa Kinida nuhdu hisü tacho velouloue, alia teikhai nou zai ludu sülo vahi sü panou Eletaoye vebayu donou Eletao sü kaozhou veiyu Krit zaipeidei teikhaibo hilo saoveloua Salmone tachove-e.

⁸ Eletao nou zaipelo vanou tateishoa saoveloua Lasea nuhdu ngheiki buyu Kao-avei Dzüluki Chaobuhtao tea kuyu buh hisü tave louloure.

⁹ Chuo teile phashona Eletao nou sühinou nai-a bulouyu thaisü zaipei hi veihdu nasü kao shisho loure, daiolouzü Sousheeyu Teithenüh na-a talare. Südonou Paul nou puletao hi haibüa paoe:

¹⁰ “Maikhemaitaore, Eletao vei zaipei hi veihdu haina hai chuthainou kaoshishoyu vedao laire; süolouzü dzüluki ea sühi nakhemaitao likhei pepoyu baimoa Eletao hrirai koute-a hakayu vedaolai touyu sü Enou süwe.”

¹¹ Ana reihmai kaihpeichananou Paul nou paoyu chi sünanou moa dzüluki peikhowo ea dzüluki paopuwo chinou louche loure.

¹² Alia dzüluki chaobu sühi sü saiki teilehi chao-a buyu sü kaoshiyu donou sühi buyu mai poulonou sühinou zai hilo tayu sü züpa loure ea soulou veilouzü Phenis hi vete loure teloua saiki sü sühinou ve chao-a bure donou tsü choda loure. Phenis hai khekou teinghi loulo ea reikou teinghi loulo hi reia buyu Krit teidei hi dzüluki chaobuh alie.

Zai hinou Teikhaishi Daoyu

¹³ Alia khekounou kheyu teikhai nou kaokaosoua hükheyu kisü, sühi buyu taonou pulenou liyu sü veteloure tea choloua dzüluki nasü pheipawu-a Krit zaipe lova ngheiteia saopoa tae.

¹⁴ Ana phasho khaimoa reikou teinghi palova ssü tea kuyu chihshoyu teikhai sünanou zaipeidei hilo vanou hükouloure.

¹⁵ Alia dzüluki naye sü teikhainou hüsailoua nghojülo takoulou shiyu kisü Eletao nou tepu khaimoa panou sünaye teikhai do soua hüta baire.

¹⁶ Alia Kauda tea kuyu taishoyu zaipeidei vei teikhaibo hilonou takouyu kisü, Eletao nou tateishoa sakhao nasü süthai loue.

¹⁷ Puletao nou sakhao nasü dzüluki hi paipa thouloure ea süsü rainou soutaosoua dzüluki hi phumu khaire. Süthaisü puletaoye Sirtis tea kuyu vonaiphü hi hüpfülou khaishulai touyu sü ngaopi loua puletao nou dzüluki hi hakhai touyu sahratao sü ponakouloua dzülukiye sü panou teikhai do soua hüpo tare.

¹⁸ Alia Eletaoye teikhainou chihshoa hüsailouyu donou thainaisho sü puletao nou dzüluki hi na taosü vakouhi polai patare;

¹⁹ alia teithe asü kisü puletao nou lah puletao bahnou dzüluki vei bahsei taosü vakouhi polai pare.

²⁰ Alia teithe taoli sü teinghi moa vuh zhai ngaokhaimoyu kisü, alia teikhainou thaokhaimoa chihshoa Eletao vahi hükhaiyu kisü Eletao hai hrilaihi touyu tsünasü akhai kisü hare.

²¹ Alia puletao nou teile phashona tousolia toukhaimoa takouyu kisü, Paul nou tashu puletao nghojünou laloua paoe, “Maikhe maitaore, neletao nou Achi hai keipeiwu-a Krit hinou tamore toulouzü veilai mou, sükure toulouzü pepoyu ea hakayu haitao teitei hai daolaimoe.

²² Ana chuo Enou neletao hi khowe, süolouzü neletao le kaonalo! Daiolouzü neletao hronou maitalia hrirai hayu daolaimoe; ana dzüluki likhei habailai.

²³ Daiolouzü do kheikohi A Mapao soua ea Enou thoa buyu Ramai puhvei rakivamai alinou Ahi veloua,

²⁴ ‘Paul pikhaiso! Ne Kaisar nghojü hi ve lavuzülai, alia zhukhaio Ramai nou neye zhuvea peiyu vanou neye koa dzüluki hinou laiyu maikhemai hrülaiye sü khaipa peilai,’ tea paoe.

²⁵ Südonou maikhe maitao, neletao le kaonalo! Daiolouzü Ahi paopeikhai touyu sübütoua palai touyu sü Ramai hi Enou louchewe.

²⁶ Sütoukhaia, Eletaoye zaipeidei tali hi hüpfüve khaipei vuzülai.”

²⁷ Alia khei kiadai zhou sü Eletao nou Adria zai pei hinou haokou haokhea buyu hinou dzüluki pfüyu maitao nou Eletao hai deithe hi ngheikoure touyu sü süloure.

²⁸ Südonou puletao nou chuh lihi rainou khizhuloua zai süsü douyu kisü hacho raidai thoua ngaoloure; alia phajü takouloua doukhaiyu kisü hacho shirou thoua ngaoloure.

²⁹ Sükisü Eletaoye chuhlea hrohi pfülouwu shulai touyu sü ngaopiloua puletao nou dzüluki thailova hinou dzüluki khika adaisü dzühi phathoure ea teitheyu sü zhia buloure.

³⁰ Sükisü dzüluki pfümaitao nou sühinou tupaloure teloure; alia sakhao hinou taloua dzüluki nghojülonou tapa dzüluki khikatao shuloure khaohinou puletao nou dzüluki hinou sakhao nasü dzühi phathoure.

³¹ Ana Paul nou reihmai kaihpeichana hi ea reihmai taohi paoe, “Dzüluki pfümaitao hai dzüluki hi bumore toulouzü, neletao mailia khaipa louhoe.”

³² Südonou reihmai taonou sakhao naye khikhai touyu raitao sü daodewu-a panou süna lah tare.

³³ Teithepare bü hinou Paul nou puletao hrülai hi touso daodao toure donou sü-a haibüa paoe: “Neletao nou halia toukhaimoa khüa kouyu sü zhoupu teithe kiadai koure.

³⁴ Südonou touso dao dao toure donou Enou neletaoye süwe; sübüa touloure toulouzü neletao khouko ngaoloulai, daiolouzü neletao maitali pei hinou peishu poli koutea halaimoe.”

³⁵ Alia haibüa paoyu thaisü Paul nou raokhao daotu poloure, alia puletao hrülai nghojünou Ramai hi kalo paowu-a süsü soukholoua toushure.

³⁶ Sükisü puletao hrülai-a le kaonayu ngaoloua lah puletao-a touso dao dao touloure.

³⁷ Dzüluki hinou laiyu Eletao hrülai hai mai 276 bue.

³⁸ Alia puletao nou lah lahnou züpa teitei touche louyu thaisü, dzüluki hi buyu southou teitei sü zaihi polaithouwu-a dzüluki nasü panou theatare.

Dzüluki Peyu

³⁹ Alia tei thelouyu kisü, dzüluki pfüyu maitao sü zaipe süsü kahaohisa touyu shikhai more, ana vonai deizhenou sühaoyu zaibvü alisü puletao nou zhingao loure ea soulou veilouzü dzüluki nasü sühi saopopa chaoloure donou puletao nou le laloure.

⁴⁰ Südonou puletao nou dzüluki khika taosü daodewu-a panou zaihi leiloure, alia süpha hinou puletao nou sakhaocha taohi phukhai touyu rai taosü phei pare. Süthaisü teikhaiye panou dzülukiye sü nghojülo hüpo kouloure donou puletao nou dzüluki nghojülo vanou sahhra taosü hakhaire ea haibüa Eletao sü zaipelova takoue.

⁴¹ Ana dzüluki nasü zai ahai kole naiphü ali hinou lou saoloua sühinou saophüre; alia dzüluki nghojülo sü lou saoteiloua lüpailou hore, sükisü dzüluki thailaova taosü chihshoyu dzü-akhüh nou souphe soupho sasa laire.

⁴² Sükisü reihmai taonou hukha hi bumaitaoye sü zaipehi dzüda paloua tutalou shulai tea puletao hrülaiye southea loure souda loure.

⁴³ Ana reihmai kaihpeichana nou Paul ye khailu palounüa puhnou puletaoye, sübüa soure hinou nuwure. Alia puhnou dzüdalou süyumai hrülaiwo raikai-a dzüluki vakouhi chopaloua deithe hi dzüda paloure donou

⁴⁴ alia süthainou kukhemai taosü puletao thaifüa lukhao hinou moa dzüluki hi pepoyu ha tali vanou khopoa taloure donou kharochi peire. Alia sübüa Eletao hrülai sü zaipehi tupakhai loure.