SEI-ATAMAI VAHTAO 25 - SHEEYU BAIBEL (BSI)

Paul nou Kaisar Nghojü hi Lare Khoyu

¹ Chuo Festa nou teidei sühi tave loulouyu teithe asü thaisü Kaisaria hinou Jerusalem hi takhe.

² Alia sühinou napao adumaitao ea Jihudimai peicha maitao nou Paul pei hi motouyu chitaosü tave puh hi paongaoe. Alia puletao nou Festa hinou,

³ puletaoye soukha peia Paul ye Jerusalem hi seive peire donou khoe, daiolouzü puletao nou puhye ludu hinou southeare donou souda-a bue.

⁴ Festa nou chila peie, “Kaisaria hinou Paul ye hukha hi thoukhaitoue, alia E-a sühisü thala-a khaitalai.

⁵ Puhnou hatali soumahre toulouzü neletao vei tsümai kamaiye panou Eye koa Kaisaria hi taveloua puh pei hisü mah dukakhaio.”

⁶ Festa nou puletaoye koa teithe acha moa kirou buloua Kaisaria hi khaikoure. Thainaisho kisü puhnou chikure buh hinou buloua Paul ye nghojü hi save thoure donou kharochi peire.

⁷ Alia Paul nou tave louyu kisü Jerusalem hinou veyu Jihudi maitao nou puhye sü sühaoloua puletao nou chila peilouhoyu tateishoyu chitaonou puh pei hi sü mah dukhai shure.

⁸ Ana Paul nou lah puh zü sü haibüa paoe, “Jihudimai razhai pei hia, Rathoki pei hia moa Kaisar pei hia Enou ha mahlia soukhai moe.”

⁹ Ana Festa nou Jihudimai züpa soupeinüa Paul hi noue, “Nenou chi haitao hai Jerusalem hi takhe Anghojünou kuyu züpawu?”

¹⁰ Ana Paul nou paoe, “Eye chiku züyubuh Kaisar vei chikubuh nghojünou chu E la-a bue; lah nenou süa buyukua Enou Jihudimaitao pei hi hatalia soumahyu hae.

¹¹ Ana Enou hakinou thaizüyu mah tali soure toulouzü athai hinou tupa loure halia Enou phoumoe. Ana puletao nou Apei hi mah dukhaiyu sütaosü cheche moe toulouzü, maitalinoua Eye puletao bah hi thoupei louhoe. Enou Achi hai Kaisar nghojünou kupure phouwe.”

¹² Sükisü Festa nou puhvei tsüme taoye koa phaloua chila peie, “Nenou Kaisar nghojünou kupure phoue, südonou ne Kaisar hi talai.”

Paul nou Agrippa ea Barnis Nghojünou Layu

¹³ Alia teithe daotu thaisü Agrippa Veo ea Barnis nou Kaisaria hi tave louloua Festa ye sasa-a daoloue.

¹⁴ Alia puhai nou sühinou teithe taoli nai-a buyu hinou Festa nou Paul kosü haikua Veo hi paongaore: “Felix nou hukhahi thoukhai touyu maili haihi bue,

¹⁵ alia Enou Jerusalem hi tahoyu kisü Jihudimai napao adumaitao ea tsümaitao nou puh pei hi mah dukhai-a Ahinou puhye southeare chi lükoupeio tea khoe.

¹⁶ Ana Enou puletao hi, mah du-apfümai talinou mah du-apeimaitaoye zhu haonou dao-a puh pei hi dukhaiyu mah süna vanou puh zü paomo jühi sü puhye nou mah-e tea thoupeiyu Eh Rommai zhai hae tea paopeire.

¹⁷ Südonou puletao nou buh haihi tave dzülouyu kisü Enou teile soudo khaimoa thainaisho sü Enou chikuki hi tave buloua mai sünaye savere donou kharochi peire.

¹⁸ Puh pei hi mah du-apeimai taonou lashu chi paoyu kisü Enou tateishoa choyu kua puletao nou mah shilia puh pei hi dukhaimoe.

¹⁹ Ana lah puletao vei loucheyu vanou ea Paul nou hriwe tea poyu thaitayu Jisu süna vanou puletao nou puh pei hi veivayu bue.

²⁰ Chi haitaosü kakua kukoulai touyu cho haloua Enou Paul hisü chi haitao hai Jerusalem hinou ve kunünü moe tea noue.

²¹ Ana Paul nou puh chihai Veduwoye panou kukou peire donou puhye khotou peikhaio tea khoyu vanou Enou puhye Kaisar hi seitamo koutesü soutaosoua khotou loure kharochi peire.”

²² Alia Agrippa nou Festa hi paoe, “E-a mai haina chi keinüwe.” Festa nou chila peie, “Doso nenou puh chi sü keilai.”

²³ Südonou thainaisho sü Agrippa ea Barnis nou tutoupfüa reihmai peichamaitao ea nuhdu hi süthai-apei maitaoye koa chi keire kihi taloure. Sükisü Festa nou kharochi peiwu-a Paulye save.

²⁴ Festa nou paoe, “Veo Agrippa ea Ehye koa tave dzüa buyu maikhe maitao: neletao nou mai hainaye ngaore! Jerusalem hi buyu ea Kaisaria haihi buyu Jihudimai me teiteinou puh hai hrizümoe tea shusou raoloua puh vanou Ahi ve paoe.

²⁵ Ana Paul nou thai züyu vahlia soumoe touyu sü Enou ngaoloure; alia lah puhnou Kaisar hinou puhchi kupupeire phouyu donou Enou puhye sühi seitare donou le laloure.

²⁶ Ana puh vanou Enou Apaopu hi larü rüzüdou shoyu halia hae. Südonou Eletao nou puh hinou chi noulouyu thainou Enou rüre hatali ngaoloure donou neletao nghojü hi matsüsoua ne nghojü hi puhye save khaitoue. He Veo Agrippa!

²⁷ Daiolouzü hukha pfüyu mailiye seitayu kisü puh pei hi dai mah paodukhai tousa touyu sü sheesha-a paongao moanou seitayu hai kaomoe tea Enou chowe.”