SEI-ATAMAI VAHTAO 24 - SHEEYU BAIBEL (BSI)

Jihudimai taonou Paul Peihi Mah Dukhaiyu

¹ Alia teithe angou thaisü napao peichawo Anania nou tsümai taoli ea Tertullas tea kuyu süh-apaowoye koa taveloua Paul pei hi motouyu chi sü Teideikhowo nghojühi paongaoe.

² Alia Paul ye kikha hi kulouyu kisü, Tertullas nou puh pei hi mah dukhai-a haikua paoshure: “Adu-ashowo Felix, ne khokhenou Ehnou teile pha shona kaonayu ngaoloure, alia Eh teidei hainaye souvei peiloure donou nenou vah taoli souda-soushu peire.

³ Sükua soupeiyu sü Ehnou buh liki hinou ea teisanou nehi kalo paoyu noupu sasa-a zhiwe.

⁴ Enou nevei teile alaosou soudoyu sü züpa moe, sütoukhaia leshia Ehvei chi-jütou keipeio tea Enou nehi khowe.

⁵ Daiolouzü mai haina hai maiye souha-soukayu, deiphao veishi hi buyu Jihudimaitao hrohinou chi soubvü peiyu ea Nazareth himai me hi peichayu mailie touyu sü Ehnou ngaoloue.

⁶ Puhnou Rathoki koutea souzhaire donou tewe, ana Ehnou puhye sü niloue. (Alia Ehnou puhye Ehvei razhai thaifüa chi kunüe.

⁷ Ana reihmai peichana Lusianou taveloua Eletao bah hinou puhye sü chihshoa saoloure,

⁸ alia puh pei hi mah dukhaiyu maitaoye ne nghojü hi taveo tea kharochi peie.) Nelah puh hinou chi noulouzü Ehnou puh pei hi mah dukhaiyu teitei sü puh hinou sülousüe.”

⁹ Alia puhnou paoyu chi sütao teitei sü cheche-e tea Jihudimai taonou puh mü boloure.

Paul nou Felix Nghojü hi Layu

¹⁰ Alia Teideikhowo nou Paul ye nou chi paore donou bah zhangaoyu kisü Paul nou chila peie: “Nenou po taoli teidei haina pei hi chiku-apeina soukoure touyu sü süloua, Enou sasa-a Azü sü paongaolai.

¹¹ Enou Jerusalem hi rathore donou taveyu sü teithe kiahai jünou lamo hie touyu sü lah ne-a süwulai.

¹² Alia Enou maitaliye koa Rathoki hinou chi veivayu moa rathobuhtao hinou ea nuhdu buh tali hi-a maikhe maiye Enou soubvü peiyu sü puletao nou ngaokhaimoe.

¹³ Moa puletao nou chu Apei hi mah dukhaiyu sütao vanou ne nghojünou chila peilouhoe.

¹⁴ Ana haisü ne nghojünou E-a aetouwe, süolouzü puletao nou mah-e tea paoyu Mapao vei Luduna sü füta-a Enou Eh puo-pao Ramaiye sü thowe. Ana Moses vei razhai ea rachipaola maitao vei larübvütao hi rüthoukhai touyu teitei sü E-a louche.

¹⁵ Alia chechemai ea chechemo mai hrülai hrishulai tea mai haitaonou Ramai hinou zhiyu kua E-a zhiwe.

¹⁶ Südonou Enou Ramai ea emai nghojünou Alekhetsü nasü sheetoua khailoure teisanou tewe.

¹⁷ “Enou po taoli Jerusalem vakounou buyu thainou Amai khemai hi soukha peire vei pousha pove peire ea Ramai hi posheelare donou sühi tave.

¹⁸ Sükua soua buyu hinou puletao nou Rathoki hinou Eye sü razhai thaifüa soushee khaitoua ngaoloue. Alia sükisü maisou moa bvüroyu alia hae.

¹⁹ Ana Asia teidei hinou Jihudimai Kamai louzü bue, puletao nou Apei hi motouyu hatalia bue toulouzü lah puletao-a buh haihi taveloua ne nghojünou Eye mah dukhaiyu kaoe.

²⁰ Molouzü Enou tsüme nghojü hi layuki puletao nou dai mah Ahinou ngaolouresa touyu sü buh haihi velouyu maikhemai taoye panou paokhaio.

²¹ Enou puletao nghojünou layu kisü, ‘Thaimainou hrishulai tea Enou loucheyu vanou zhou Eye neletao nou chikuwe,’ touyu chi haina likheithe shapabaie.”

²² Ana Felix nou Mapaowo vei ludu süna vanou soutaosoua süyu donou puhnou, “Lusia, reihmai peichawonou koulainou Enou neletao vei chi nasü kupeilai” tea paowu-a chi kuyu teile sü ponawure.

²³ Sükisü puhnou reihmai kaihpeichana hisü Paul ye soutaosou kholoure ana puhye panou madosoua buloure ea puhvei moshilaiyutao donou puh samaitao nou puh kuvah souyu kisü numore donou kharochi peire.

Paul nou Felix ea Drusilla Nghojü hi Layu

²⁴ Alia teithe taoli thaisü Felix nou puh chapfü Jihudimaipfü Drusilla ye koa taveloua panou Paul ye kuloua Jisu Khrista hi lü louche louyu vanou puh hinou ko keie.

²⁵ Alia acheche vanou, lahnou lahye tukhayu vanou ea thaikhai chikure vanou Paul nou pha-kuyu hinou Felix nou ngaopiloua chila peie, “Chuo ne ta-a bailai; Enou teile kao-avei ngaoyu kinou neye kudakhailai.”

²⁶ Sükuyu teile hinou Paul nou puhye phapeire donou puh hi seihla peishulai tea choe, alia südonou puhnou Paul ye kuzhazha-a chi phae.

²⁷ Ana po ahai thaisü Porkia Festa nou Felix thao thaoloure; ana Felix nou Jihudimai züpa sounüa Paul ye hukha hinou phapeimoa khaire.