SEI-ATAMAI VAHTAO 18 - SHEEYU BAIBEL (BSI)

Korinth hi Taveyu

¹ Süthaisü Paul nou Athen thaowu-a Korinth hi tare.

² Sühinou puhnou Pontas hinou veyu Aquila tea kuyu Jihudimai aliye ve daoloue. Klaudia nou Jihudimai hrülaiye panou Rom thaowu-a taloure chikha peiyu donou puhnou puh chapfü Priskilla ye koa Itali hinou veyu somohie. Paul nou puhaiye daore donou tave;

³ alia puhnou puhaiye koa choa ea vahsoua bue, daiolouzü puh-a puhai büa sahpao soua hrüyu maibaie.

⁴ Alia puhnou Soteithe tsü rathobuh hinou puletaoye pha-kua Jihudimaitao ea Greekmai taoye sü paothou panou louche loure donou tewe.

⁵ Sailas ea Timothi nou Makedonia hinou velouyu kisü Paul sü ko paodouyu hinou teile teitei pei-a Jihudimaitao hi Jisu hai Khristae tea zhopaoh peia bue.

⁶ Ana puletao nou motouloua puh pei hi chi shishinou paoyu kisü puhnou puh sahnü süloua puletao hi paoe, “Neletao zhesü lah neletao pei hi panou buwo! Apei hiwo mah hae. Chu thainou E tahrüh kukhemai taohi tabailai.”

⁷ Sükisü puhnou rathobuh sü thaowu-a Tita Jastas tea kuyu Ramaiye thoa laiyu tahrüh kukhemai ali kihi taho loure; puh kisü rathobuh hi dasa-a bubaie.

⁸ Alia rathobuh hi peichana Krispas nou puh kikhamaitao hrülaiye koa Mapaoye louche loure; alia kukhe Korinthmai alaosou Paul nou paoyu chipao sü loucheloua dzükhao daloure.

⁹ Alia khei ali hisü Mapaowo nou Paul hi zhokounou paoe, “Pikhaiso, ana thaokhaimoa chi paokhaio, ngasou buso,

¹⁰ daiolouzü Enou neye koa laiwe. Maitalinoua neye soushi louhoe, daiolouzü nuhdu haina hi Amai alaosou bue.”

¹¹ Südonou Paul nou maikhemai hi Ramai chipao sü doupeia sühinou po ali-a khou arou nai-a bue.

¹² Ana Gallio nou Akhaia hi teidei khowona souabu kisü Jihudimaitao hrülainou tave dzüloua Paulye sü niloure ea puhye sü chikuki hi saveloua,

¹³ “Mai hainanou maikhe maiye panou razhai hilonou moa-nou kukhe zhai ali hinou Ramaiye tholoure süpeiwe!” tea puletao nou paoe.

¹⁴ Ana Paul nou chi paopalai tea buyu hinou, Gallio nou Jihudimai taohi paoe, “Chi haina hai hatali soumahyu moa ashi vahli chie toulouzü, He Jihudimaitao! Enou neletaoye koa shameazho peire phabue.

¹⁵ Ana chi haina hai chikotao, zhihtao ea lah neletao razhaivei baiyu donou, sühisü neletao lahnou zhuloua baiwo; sübüyu chihai E kulai moe!”

¹⁶ Alia puletaoye chikuki hinou hutare.

¹⁷ Sükisü puletao hrülainou rathobuh hi peichana Sosthenesye niloua chikuki kijünou dapeire. Ana haivanou Gallio nou halia chopei moe.

Antiok hi Khaiveyu

¹⁸ Haithai-a Paul nou Korinth hinou teithe taoli lüloumai taoye koa buloure ea süthaisü puletaoye thaowu-a Priskilla ea Aquilaye koa dzüluki hinou Suria hi tare. Puhnou Kenkhriya thaowu tamo jühinou, sühinou puh peisü saire, daiolouzü puhnou chou soukhai touyu ali bue.

¹⁹ Alia puletao nou Ephesa hi velou louyu kisü puhnou puhaiye buh sühi thaowu-a puh lahnou rathobuh hi talouloua Jihudimai taoye koa chi phakua bue.

²⁰ Alia maikhemai taonou puhye teile phajü sühi bupu peire donou khoyu kisü puhnou bare.

²¹ Ana puhnou puletao hi, “Ramai nou ae-ao toulouzü E neletao hi khaive pukhailai,” tea tarayu chipao paowu-a Ephesa hinou dzüluki hi louloua tare.

²² Puhnou Kaisaria hi velou louyu kisü Jerusalem hi takheloua lüloumai meye sasa-a ve khurü loure ea süthaisü puhsü Antiok hi khaikou khaire.

²³ Antiok hinou phajü bulouyu thaisü puhnou buh sühinou taloua Galatia ea Phrugia teidei hilonou shoshonou buh liki hi taveloua lüloumaitao hrülaiye soutsü peie.

Apollos nou Ephesa hi Veyu

²⁴ Alia sübüyu teile hinou Alekjandria nuhmai Apollos tea kuyu Jihudimai alisü Ephesa hi tave. Puh hai chi paovei shoyu ea sheeyu larübvü süshoyu mai alie.

²⁵ Puhye sü Mapao vei ludu hilonou doutoupei khaitoue, alia puhnou le loushopoa chi paoposhu Jisu vanou sheesha-a doupeie. Sütoukhaia puhsü Johan vei dzükhao dayuna likhei sübaie.

²⁶ Alia puhnou rathobuh hinou khuveishoa chi paoshure. Ana Priskilla ea Aquila nou puhnou paoyu sü choulouyu kisü puhai nou puhye sü puhai kihi ku-saveloua Ramai vei ludu nasü kao-züpua puh hi paodou toupeie.

²⁷ Süthaisü Apollos nou Akhaia hi tare donou le laloure. Südonou Ephesa hi buyu thaihou jüraimai taonou puhye sü le soudu peiyu noupu puhye sasa-a shepei loure donou Akhaia hi buyu rozümai taohi seiko rüvepeie. Puhnou sühi velou louyu kisü Ramai zhuvea vanou lüloumai soulouyu khemaiye donou soukhasho loure.

²⁸ Daiolouzü puhnou Jisu hai Khristae tea sheeyu larübvü hinou hapa zhopaoh peia dua maikhemai nghojünou veivayu hinou Jihudimai taoye paothou pah soungu peire.