SEI-ATAMAI VAHTAO 17 - SHEEYU BAIBEL (BSI)

Paul nou Thessalonika hi Velouyu

¹ Alia Paul ea Sailas nou Amphipoli ea Apollonia tachopoa Jihudimai rathobuh ali buyu Thessalonika hi velou loure.

² Chuo Paul nou lah puh zhai thaifüa puletao vei rathobuh hi talouloua Soteithe asü koute puhnou maikhemai taoye koa sheeyu larübvü hinou pha-kua,

³ “Khrista hai vea vuzüloua athai hinou hrida shulai; alia Enou neletao hi paodouyu Jisu haina hai Khristae,” tea zhopaoh soua puletao hi soutaosoua paodoupeie,

⁴ Sühinou mai taolinou loucheloua Paul ea Sailas hi lou zholoure, alia sübüa Ramai hilonou leiyu Greek mai alaosou ea naotumai hrohinou matsü soua buyu mai taoli-a louche loure.

⁵ Ana louchelou moyu Jihudimai taonou ngaorailoua hupobuh khonou chaochao soua laiyu maishimai meduli kusave dzüloua nuhdu nasü soubvüsho loure, alia Paul ea Sailasye phouloua maikhemai nghojü hi popa loure donou puletao nou Jason kisü nükhao loue.

⁶ Ana puletao nou puhaiye phouhakhaie, Jason ea kukhe lüloumaitao kamaiye nuhdu hi adusho maitao nghojü hi süthai veloua, shusoua paoe, “Deiphao teiteiye pothou peipei-shoushou soupeiyu mai haitao sü chuo nuhdu haina hi-a veloure,

⁷ alia Jason nou puletaoye sheloua save puh kihi khai khaitoue. Puletao hrülainou Jisu tea kuyu kukhe vemai ali-a buhie tea pao-a Kaisar vei kharochi nasü soukhowe.”

⁸ Alia maikhemai taonou ea nuhdu hi dushomainou chi sütaosü chouloua le amosho loure.

⁹ Sükisü puletao nou Jason ea kukhe maitao hinou phao hupa peiyu vei muh poloua puletaoye panou tare.

Berea hi Velouyu

¹⁰ Alia thaihou jüraimai taonou khei loukhaie, thala-a Paul ea Sailasye Berea hi seitare ea sühi velou louyu kisü puhaisü Jihudimai rathobuh hi taloure.

¹¹ Chuo Berea hi Jihudimai taosü Thessalonika hi Jihudimaitao jünou le dukouhie, daiolouzü puletao nou Ramai chipao nasü sasa-a poloua teithe tsünou sheeyu larübvü sü phou-a Paul nou paoyu sü cheche ho cheche mosa tea zhue.

¹² Südonou Jihudimaitao alaosou louche loure, alia maikhe mainou tsükhouyu Greekmai naotumai ea poutumai-a alaosou louche loure.

¹³ Ana Thessalonika hi Jihudimai taonou Paul nou Berea hi-a Ramai chipao sü paodoupeie touyu sü süloua puletao nou sühi-a taveloukhaia maikhe maiye thaopei khaiwu-a panou chi bvüsho palou khaire.

¹⁴ Sükisü thaihou jüraimai taonou thala-a Paulye zaidu hilo ludu hi seitare, ana Sailas ea Timothi wo Berea hinou nai-a bure.

¹⁵ Alia Paulye sapao veyu maitao nou puhye sü Athen hi koute savepeie; alia Sailas ea Timothiye panou thala-a puh hi vepeio touyu chikha sü Paul hinou ngaoloua puletao sü Berea hi khaivere.

Athen hinou Vah Souyu

¹⁶ Chuo Paul nou Athen hinou Sailas ea Timothiye khoa buyu hinou nuhdu sühisü bashara taonou phoua buyu sü ngaoloua puh lesü vamosho loure.

¹⁷ Südonou puhnou Jihudimaiye ea Ramaiye lenoua thoyu Greekmai taoye koa rathobuh hinou, alia hupobuh hinou tave daoyu mai taliye koa teithe tsünou chi pha-kua veiva-a bue.

¹⁸ Alia Epikurean ea Stoik tamai tsütsümai me hinou kamai taonou puhye sü veivae. Alia puletao hrohinou kamainou haikua noue, “Taichio hainanou daichi paolaisa?” Kukhe mainou paoe, “Puh hai vakou teidei ratao vanou ko paolamai kue.” Puletao nou haikua paoyu hai Paul nou Jisu ea hrishuyu vanou ko paodou peiyu donoue.

¹⁹ Südonou puletao nou Paulye sapoa Areopagas süolouzü nuhdu tsüme hi save ea sühinou puletao nou puh hi paoe, “Nenou paodoua laiyu chi ashu haina hai daisa touyu sü Ehnou sünüwe.

²⁰ Nenou pao-a buyu chi kamaisü Eletaoye donou süthoa chouwe, südonou sütaovei ko sü daisa touyu sü Ehnou sünüwe.”

²¹ (Daiolouzü Athenmai hrülai ea sühinou hrüa buyu vakoumai taonou puletao teile teitei sü chi ashu pha-kua buyu likheithe sounüa bubaiwe.)

²² Südonou Paul nou nuhdu tsüme tsüle hinou talou laloua paoe, “Athen teidei maitaore, ha teitei hinou neletao hai Ramaiye soutaosoua thoyu maitaoe touyu sü Enou süwe.

²³ Daiolouzü Enou taveloua neletao nou thoyu na taosü zhuyu kisü Enou sheelabuh ali hinou, ‘Sümoyu ra alihi’ tea rüthoukhai touyu sü ngaoe. Südonou neletao nou sümoa thoyu nasü Enou neletao hi paongaowe.

²⁴ Deiphao ea sühinou buyu teiteiye soupeiyu Ramai puhsü raki ea deiphao vei Mapaoyu donou bahnou soukhai touyu rathokitao hi bumoe,

²⁵ moa puhvei hatali chemoyu bua panou emai bahnou puh kuvah soutamoe, daiolouzü puh lah puh vuzünou maikhemai hrülai hi hrirai, ssü ea hali-hala peibaie.

²⁶ Alia puhnou maili vahinou deiphao teitei panou phoua buloure donou maitya hrülaiye soupeie, alia puhnou rai-a puletao nou hrüre teile ea bure deiraisü depeie.

²⁷ Puhnou haibüa souyu hai maiye panou puhye phouloure donoue, alia puletao nou puh vanou choa buyu kua puhye ngaoloure donoue. Sütoukhaia Ramaiwo Eletao mai alili hinou halia doua bumoe;

²⁸ daiolouzü mai kamainou paowure, ‘Puh vanou Eletao sü hria-hri, lüa-lü ea hrüa-hrüwe.’ Haisü neletao vei tsükaisümai kamainou paoyu kheihaoe, ‘Daiolouzü Eletao-a chechenou puh tyaonah maitaoe.’

²⁹ Südonou Eletao sü Ramai tao-nahyu donou Ramai hai emainou raia ea dokai veia soukhai touyu sana, husha moa chuh vei basharaye raiwe tea choyu kaomoe.

³⁰ Ramai nou dao raiki maikhe mainou puhye sülou moyu teile hiwo ngaoa ngaomokho soupeire, ana chuo buh liki buyu mai hrülaiye panou le daloure puhnou chikha peire.

³¹ Daiolouzü puhnou dolouyu mai aliye panou deiphao mai hrülaiye cheche hinou chi kure teithe ali puhnou dadekhaire. Südonou puhnou mai sünaye sü athai hinou panou hrishuloua maikhemai hrülai hi sünavei zhopaoh peire!”

³² Chuo puletao nou thaimai hrishulai touyu kosü Paul hinou choulouyu kisü, kamainou puhye sü konü loure, ana kukhe mainou, “Chi haina vanou Ehnou ne hinou keipunühie,” tea paoe.

³³ Südonou Paul nou puletao hrohinou vakouhi tapare.

³⁴ Ana mai kamainou puh thaifüloua louche loure, sümaitao hrohisü nuhdu tsüme hinou mai alisoua buyu Dionisius ea Damaris tea kuyu naotumai ali ea puletaoye koa kukhemai-a louzholoue.