SEI-ATAMAI VAHTAO 16 - SHEEYU BAIBEL (BSI)

Timothi nou Paul ea Sailas ye koa Tayu

¹ Süthaisü Paul nou tapoa Derbe ea Lustra hi veloure, alia zhukhaio, Lustra hisü Timothi tea kuyu rozümai ali bue. Puh pfü hai lüloumai ali soua buyu Jihudimaipfü alie, ana puh puowo louzü Greek mai alie.

² Lustra ea Ikonium hi buyu lüloumaitao hrülainou Timothiye paoveishoa bue.

³ Paul nou Timothiye puhvei veihdu hi koa satare sü züpasho loure; südonou puhnou puhye sü hee rode peire, daiolouzü buh sütao hi buyu Jihudimaitao hrülainou Timothi puohai Greek mai alie touyu sü sükhaiwe.

⁴ Alia puletao nou nuhdu liki sühaopoa taveyu hinou Jerusalem hi buyu sei-atamaitao ea tsümai taonou ae-ao tea kukou khai touyu zhai sütaosü züloure donou puletao hi paongao peie.

⁵ Südonou lüloumaime khemaiye lü hilonou soutsüpeie, alia teithetsü lüloumai taosü pumaimai tare.

Makedonia hi vepeire donou kuyu

⁶ Alia Rako Mashinou puletaoye panou Asia teidei hi ko paodou bayu donou puletao nou Phrugia ea Galatia teidei tachopoa tare.

⁷ Alia puletao nou Musia ngheiki hi takou louyu kisü, puletao sü Bithunia teidei hi talou loure donou teshoe, ana Jisu vei Rakonou puletaoye bare.

⁸ Südonou puletao nou Musia tachopoa Troa hi takoure.

⁹ Alia süzhou khei hinou Paul nou zho ali ngaoloua Makedonia hi mai alisü tave laloua puh hinou khoa, “Mekedonia hi taveloua Ehye ve soukhapeio!” tea paoe.

¹⁰ Paul nou zho süna ngaolouyu thaibü hisü, Eletao sü thala-a Makedonia hi tare donou souda loure, daiolouzü sühi buyu maikhe maitao hisü ko avei paodou peire donou Ramai nou Eletaoye kuwe touyu sü Ehnou süloure.

Philippi hinou Ludianou Leda louyu

¹¹ Südonou Eletao nou Troa hinou dzülukinou saopoa tazütou pove Samothaki hive, alia thainaisho sü Neapoli hi veloue.

¹² Sühinou Rom mainou ve füshoa bulouyu Makedonia deizha hi matsü tsülai nuhduna Philippi hi phi ludunou veloue. Nuhdu haina hinou Eletao sü teithe taoli nai-a bue.

¹³ Alia Soteithe kisü Eletao nou nuhdu romü vakouhi tapaloua, veachi paoyu buhli reipe hi bua malae tea Ehnou chodayu buh sühi tave louloua ea sühinou kou buloua, sühi tave dzüa bulouyu naotumai taohi chi paongaoe.

¹⁴ Eletao chi kei-a buyu naotumai aliwo louzü maomüyu sah zhoyu Thuatira nuhdu hi mai Ludia touyu pai süe. Puh hai Ramaiye lenoua thoyu naotumai alie. Paul nou chi paoyu sü panou soutaosoua keiloure donou Mapao nou puh lesü houpeire.

¹⁵ Alia puh-a ea puh kikhamai-a dzükhao dalouyu kisü, puhnou Eletaoye kua, “Neletao nou Eye hai chechenou Mapaoye lüloumai alie tea poloure toulouzü, Akihi tave chaopeio,” tea paoe. Alia puhnou Eletaoye kutai loure.

Philippi hinou Paul ea Sailasye Hukha hi Thouyu

¹⁶ Naiteithe ali Eletao nou veachi paoyu buh hi taho-a buyu hinou, Eletaoye nguyu rako sayu qila loumaina alinou tave daoloue. Puhnou nguyu chi paopeiyu vanou puhvei paopumai taohi pousha alaosou kuvepei baiwe.

¹⁷ Loumaina haipainou Paul ea Eh thai fülai-a, “Neletao hi khailu loure ludu paongao peiyu mai haitao hai Aku Kulai Ramai vei kilaitaoe!” tea paikushoa shatae.

¹⁸ Alia puhnou sükua teithe taoli shapoa tae. Ana akhai kisü Paul sü vamosho loure. Südonou puhnou rako süna hi reiveloua paoe, “Jisu Khrista zhih hinou Enou neye puh hinou tapalouwo tea tukha-a paowe!” Alia süphabü hinou rako sünanou puhye thaowu-a tapare.

¹⁹ Ana qila süna paopumai taonou puletao vei pousha ngaoloure bo nasü hare touyu süloua, puletao nou Paul ea Sailasye niloure, alia puhaiye hupobuh hi teidei khomaitao nghojü hi sapove khaipeire.

²⁰ Alia puletao nou puhaiye chi kupeire paopu maitao nghojü hi saveloua paoe, “Mai haihai sü Jihudimaie ea Eh nuhdu hainaye puhai nou soubvü peiwe.

²¹ Puhainou Eh Rom maiye donou poloushiyu moa taloushiyu zhai doupeiwe.”

²² Alia maisou tao-a koa lou Paul ea Sailas pei hi motou loure. Sükisü chi kupeire paopumai taonou Paul ea Sailas sahbatao daophawu-a puhaiye südanou dapeire donou kharochi peire.

²³ Alia puletao nou puhaiye dashisho peiwuyu thaisü hukha hi thouwu-a, hukha ki khowo hi soutaosou puhaiye kholoure donou kharochi peire.

²⁴ Haibüyu chihshoyu kharochi ngaoloua, puhnou puhaiye hukhaki levai dukhahi pothouwu-a puhai phisü süü kulu kole hinou khare.

²⁵ Ana kheitsüle pha hinou Paul ea Sailas nou veachi pao-a Ramai hi lousou sho-a bue ea kukhe hukha hi bumaitao nou puhai paisü kei-a bue.

²⁶ Sükisü sükhaimoa sühisü nüsü shisho loure. Südonou hukhaki kifüsü soungusho loure, alia thala-a kikhu teitei sü houkhaire ea hukha hi bumai hrülai bah hi phukhai touyu hurai taosü deiphi hi zhoukoure.

²⁷ Sühinou hukhaki khowonou zhi-a buyu hinou kaishu hukhaki kikhu taosü houkhai touyu sü ngaoloua huka hi bumaitao tutare tea choloure. Südonou puhnou puhvei khoche nasü paizhou paloua lah puhye southeare hinou buloure.

²⁸ Ana Paul nou paiku sholoua, “Ne lah neye souzhuwo-so! Daiolouzü Eletao hrülai haihi bue!” tea paoe.

²⁹ Sükisü hukhaki khowonou meiva li kuloua tuloue, alia pithou nguhrührüloua Paul ea Sailas phihi kaokoure;

³⁰ alia puhnou puhaiye vakouhi sapaloua noue, “Dou-apeio hai, Enou khailu loure donou dai souvuzülai?”

³¹ Sühinou puhai nou chila peie, “Mapao Jisu ye louchelo, sükulouzü ne-a, ne kikha maitao-a khailu loulai.”

³² Alia puhai nou Mapao vei chipao sü puh hi ea puh kihi buyu maikhemai hrülai hi paodou peie.

³³ Alia süzhou khei teilecho sübü hinou puhnou puhaiye saloua puhai vahi dakhai touyu zhu taosü khüshee peire, alia thala-a puh-a puh kikhamai hrülai-a dzükhao daloure.

³⁴ Süthaisü puhnou puhaiye puh kihi sapaloua puhai hi touso peie, alia puh-a puh kikhamai hrülai-a sasho loure daiolouzü puletao sü chuo Ramaiye louche loure.

³⁵ Ana tei theloukhaie, chi kupeire paopumai taonou hukhaki khowo hi kharovamai peicha maitaoye seiveloua, “Mai sühaiye phapeiwo” tea panou paoe.

³⁶ Alia hukhaki khowonou chipao süsü Paul hi paongao-a, “Chi kupeire paopumai taonou Sailas nehaiye phapeio touyu kharochi seivewe. Südonou chuo tapaloua kaona-a tawo,” tea paoe.

³⁷ Ana Paul nou kharovamai peichamai taohi paoe, “Puletao nou Eh hinou soumahyu alia ngaolou moama ea Eh hai Rom teideimai khai-a dua Ehye dapeiwu-a hukha hi thoure; alia chuo Ehye puletao nou kheikheisoua phapei bailaiwu? Mo vuzüe! Ana lah puletao panou haihi veloua Ehye popa louwo.”

³⁸ Kharovamai peichamai taonou chipao sütao sü chi kupeire paopumai taohi taho paopeiyu kisü Paul ea Sailas hai Rom teideimaie touyu sü chouloua puletao sü pisho loure.

³⁹ Südonou puletao nou taveloua puhai hinou soumahre tea pao-a puhaiye vakouhi sapaloua nuhdu süna hinou tapeibaiwo tea khoe.

⁴⁰ Sühinou Paul ea Sailas sü hukhaki hinou tapaloua Ludia kihi vetare, alia sühinou thaihou jüraimai taoye vedaoloua puletaoye rako hilonou le souho peiwu-a sühinou tare.