RUTH 2 - SHEEYU BAIBEL (BSI)

Ruth nou Boaz Dou hinou Vah Souyu

¹ Naomi vei kityarai maili, puh khapu Elimelech kihikhamai hinou toungi shoyu mai ali bue, puh zhih hai Boaz touwe.

² Teithe li Moab pfüpai Ruth nou Naomi hi paoe, “Eye panou taho chachiyu mainou poche loumoa raikhai touyu routhou sü kotawo. Eye zhuvea pei-a nou pule dou hinou pa vah souyu ngaolou shulai.” Naomi nou mou pai hisü paoe, “Anah paire, tawuo.”

³ Südonou Ruth nou taho chachiyu mai thailo nou deraikhai touyu routhou sü kore; honapai nou hoa buyu dou nasü Elimelech puotya soua buyu Boaz vei dou hi hodao loue.

⁴ Phazütou bukhaie, Boaz-a Bethlehem hinou holou dou hi vah souyu mai ye “Mapao panou neletao hisü bu theo” teanou shiha peire. Ae puletao nou chila peie, “Mapao panou ne-a shiha peitheo.”

⁵ Süthai Boaz nou puh kilai, chachiyu maiye khoa vah souyu nahi noue, “Nahle pfüpai nahai thaowe?”

⁶ Puh kilai pai nou chila peie, “Honapai hai shedzü maipfüe, Naomi ye koa Moab mai teidei hinou dakhai veyu napaie.”

⁷ Honapai nou paoe, “Zhuvea panou Eye chachiyu mainou pochelou moa derai khaitouyu taosü kolouo. Sübüa nou hounapai nou shonanou chu koute shokhai timoa nou vah souhie.”

⁸ Süthai Boaz nou Ruth hisü paoe, “Anah paire, ne mai kukhe mai dou hi taso, moa haihi thaowua taso, ana avah souyu naotutao hinou nghia buloua baio.

⁹ Puletao nou chachiyu dou sü zhuloua puletao thaifülo. Enou poututao hisü neye deisou teanou paopeilai. Alia nenou reilouzü, nahle mainou pokhai touyu dzülikhou hinou kelo.”

¹⁰ Süthaisü honapai nou puh zhu sü deihi pfüna kouloua puh hi paoe, “E hai shezü maipfüli soua buyuma kabüa nevei zhuvea hai ngaolousa?”

¹¹ Ana Boaz nou puh hisü chila peie, “Ne khapu thaiyusho, nenou kabüa ne naiye zhupeiyu teitei alia kabüa nenou ne pfüpuo ae nevei teidei thaowua nenou sükhai moyu teidei haihi veyu teitei Enou süre.

¹² Nenou soukhai touyu nasü Mapao panou shiha peitheo, alia nenou Israel Ramai hi, puhvei shouh khenou bailoulai teanou veyu hai, Mapao ye panou chekho tea shiha peiyusü souloutheo.”

¹³ Süthai honapai nou paoe, “Ne kazou koute Eye zhuvea peisa, Apaopuo, daiolouzü E hai nevei kilai naotumai mokhaiyuma ne kilai Eye souva shopeie, alia Eye chipao laqo aveih nou keapeie.”

¹⁴ Headai touyu phaki, Boaz nou honapai hi paoe, “Haihi kou raokhao touwuo, alia nevei raokhao sü poa chazüo.” Sübüa nou honapai nou chachiyu mai pehinou kou chobu loue, alia puhnou hounapaiye sü raokhao taoli peie; honapai nou tounge toulouyu thai-a li-a nou bue.

¹⁵ Honapai nou kushuloua derai kouhyu routhou kotayu phaki, Boaz nou puh vah souyu mai hisü haibüa kharochi peie, “Honapaiye panou routhou vakhai touyu hia pa kou kolouo, honapaiye keapeiso.

¹⁶ Alia vajü khaitouyu routhou tao hrohinou-a honapai ye daotu vakou popa khaipeio, sübüa nou pa honapaiye kolouo, puhye züpeiso.”

¹⁷ Südonou honapainou koukhe koute dou sühinou routhousü kowe, alia honapai nou kolouyu hai koupo pfülousü thao kojüloue.

¹⁸ Honapai nou süsü pfüloua nuh hisü vetare; sühai pfüve puh nai hisü ngaoe, alia puhnou touliyu touso sü puh nai hi pfüve peie.

¹⁹ Puh nai nou puh hisü noue, “Zhou ne daikinou routhou koe? Alia ne thao dou hinou vah soue? Neye süa panou routhou kolouyu nasü Ramai shiha ngaolou theo.” Honapai nou nai hisü buh daiki hoe touyu sü paoe, “Zhou Enou taho vah souyu dou paopu na zhih hai Boaz toue.”

²⁰ Naomi nou puh mou hisü paoe, “Puhnou hriyu mai hia alia thaitayu mai hia haibüa zhuvea peiyu hai Mapao ye panou shiha peitheo.” Naomi nou honapai hisü paopue, “Mai sünasü Eh tyaraie, Ehye nghiteia buyu maibaie.”

²¹ Süthai Moab pfüpai Ruth nou paoe, “Puhnou ahi haibüa paowe, ‘Akilai mai nou chachi cheloumo koute akilai maiye koa nghia lailo.’ ”

²² Naomi nou puh moupai Ruth hisü paoe, “Anahpaire, süsü veih shore, nenou puhvei kilai maipfüye koa tayusü, sütoumolouzü neye mainou soushi peishulai nenou mai kukhe douh hi holouzü.”

²³ Südonou shithou alia southou vache loumo koute honapainou Boaz kilai naotu taoye koa vahsoue, alia honapai nou puh naiye koa sa-a hrüe.