ROMMAI 4 - SHEEYU BAIBEL (BSI)

Abraham vanou Nada

¹ Süthaisü Eletao nou Eh tahrüh puo Abraham vanou dai paolai? Puh hrü hinou ngaolouyu sü daie?

² Puhye sü lah puhnou souyu vah süna vanou souzü peire toulouzü puh hai khaophu souloure bue, ana Ramai nghojü louzü moe.

³ Sheeyu larübvü nou paoe, “Abraham nou Ramaiye louche, alia puhvei lü vanou Ramai nou puhye chechemai tea poloue.”

⁴ Vah souyu maitaliye sü puhvei zho peiwe, ana pei-a buyu süsü sapeina tea chomoe; süsü puhnou kulouyu nalie.

⁵ Ana lah puh vah hinou moa mahmaiye souzü peiyu puhye lü louche-a buyu puh vei lü nahai Ramai nou acheche nasüe tea choloue.

⁶ Maitali vah hinou moa Ramai nou chechemai tea polouyu rakovei mai süna vanou David nou paoyu ko sünasü hainare:

⁷ “Kaozü moyutao khaipeiyu puletao sü rakoveie, alia mah khaipeiyu puletao sü rakoveie!

⁸ Mapaowo nou mah chopei moyu puh sü rakoveie!”

⁹ David nou paoyu rakovei hainasü hee rodeyu maitao likheihi bubaiwu? Süsü chechenou moe. Haisü hee rode moyu maitaohia bue. Daiolouzü Ehnou sheeyu larübvü hinou popa paore, “Abraham nou Ramaiye louche alia puhvei lü vanou Ramai nou puhye chechemai alie tea popeire.”

¹⁰ Haisü dukinou pae? Süsü Abraham nou hee rodemo jünou ho, hee rodeyu thainoue? Haihai hee rodemo jünoue.

¹¹ Puhsü na-a hee rode-e, alia puhvei hee rodeyu hai puhnou hee rodemo jühinou Ramai nou puhye sü puh lü vanou chechemai alie tea popeire touyu vei shee alie. Alia sükuyu donou Abraham hai Ramaiye loucheyu ea hee rodelou mokhaia Ramai nou cheche maitao tea polouyu puletao hrülai vei rako hilo puoe.

¹² Puh hai hee rodeyu maitao, süolouzü hee rodeyu peinou Eh puo Abraham nou puhye hee rodemo jühi hrüyu lüvei hrü süna kua hrüyu puletao vei puo-a baie.

Lü vanou Ramai vei Apaopeiyu nasü Ngaoloue

¹³ Ramai nou Abraham ea puh tyaonah maitao hi deiphao hai puhvei soubailai tea apaopeiyu kisü, süsü Abraham nou razhaina reiyu vanou moa lü louyu vanou Ramai nou puhye sü chechemai tea polouyu vanoue.

¹⁴ Daiolouzü Ramai vei apaopei khaitouyu sü razhaina reiyu maitao likhei hi peibaire toulouzü, süthaisü emai lü hai raohare ea Ramai vei apaopeiyu nahai koyu lia hare.

¹⁵ Razhainou Ramai vei rarou nasü pove peiwe; ana razhai hayu buhiwo, razhainou paoyu zümoyu touyu-a hae.

¹⁶ Südonou lü vanou apaopeiyu nasü veloue, sübüa Abraham tyaonah hrülai hi süolouzü razhaina reiyu maitao hi likhei baimoa Abraham kua lülouyu maitao hia apaopeiyu nasü Ramai nou sa-a peikhaitoue touyu sü panou latoua buloulai. Daiolouzü Abraham hai Eletao hrülai vei rako hilo puoe.

¹⁷ Haisü sheeyu larübvü nou paoyu kue, “Enou neye tahrüh taoli vei Puo soupeire.” Südonou thaimaiye souhri peiyu ea halia hayu hinou panou puh chikha vanou ve bulouyu Abraham nou louche-a buyu Ramai puh nghojü hi sü apaopeiyu nahai veishoe.

¹⁸ Abraham nou reiloure qo alia hazheikhaia puhnou louche-a rei-a bue, alia sübüa “Tahrüh taoli Puo” souloue. Haisü sheeyu larübvü nou paoyu büe, “Nevei tyaonah hai teivuh zhoulai.”

¹⁹ Süpha kisü puh hai po kaih pha pare; ana puhnou puh vasou hai thaimai aliye raibaiwe touyu sükhaia ea Sarah hai nah hrü khailaimoe touyu sü sütoukhaia, puh lü hai halia khaikou khaimoe.

²⁰ Puhnou Ramai vei apaopeiyu vanou leki-a puh lü khaitayu halia soumoe, ana puh lü nasü soukhou puloua Ramaiye paoshoe.

²¹ Ramai nou apaopei khaitouyu sü puhnou veimoa soupei lousüe touyu sü Abraham nou sütoua bue.

²² Haibüyu donou lü vanou Abraham ye Ramai nou, “Chechemaie tea poloue.”

²³ “Puhye chechemaie tea poloue,” touyu chipao haina hai puhye donou likhei rüthou baimoe.

²⁴ Sütaosü chechemaie tea polou laiyu Eh Mapao Jisu ye athai hinou sou hrishu peiyu puhye loucheyu Eletao donou-a rüthou khaitoue.

²⁵ Daiolouzü Eletao vei mah donou puhye sü southeare donou thoupeire, alia Eletaoye sü Ramaiye koa souzü peiloure donou puhye sü sou hrishu peire.