ROMMAI 11 - SHEEYU BAIBEL (BSI)

Israelmai Peihi Ramai nou Zhuvea Peiyu

¹ Sübüyu thaisü Enou nouwe: Ramai nou lah puhmai taoye thaorewu? Süsü movuzüe! Lah E-a Benjamin khü hinou veyu Abraham tyaonah Israelmai alie.

² Shurai hinou dolouyu puhmai taoye Ramai nou thaomoe. Sheeyu larübvü nou Elijah vanou dai paowe touyu sü neletao nou sümowu, kakua puhnou Israelmai pei hi motoua Ramai hinou khowe?

³ “Mapao, puletao nou nevei rachi paolamaitaoye southeare alia nevei sheelabuh sü hakhao laire. Alia Eye likhei thaopeire ea puletao nou Eye southeare donou phouwe.”

⁴ Ana Ramai nou puh hi dai chila peiwe? “Enou lah Eye donou madayu ra Baal ye thomoyu mai thenai shokhaitoue.”

⁵ Süzhaibüa chu teile hia Ramai zhuvea hinou dopaloua shodai khaitouyu mai daotu bue.

⁶ Puhnou dolouyu hai puhvei zhuvea vanou baie, süsü puletao nou soulouyu vanou moe. Daiolouzü Ramai nou dolouyu hai maikhe mainou souyu thaifü baiwe toulouzü, süthaisü puhvei zhuvea hai checheyu zhuvea laimoe.

⁷ Sükuyu thaisü dailai? Israel maitao nou pulenou phouyu nasü ngaolou more. Haisü Ramai nou dopayutao likheinou ngaolou baire; ana kukhe maitaowo louzü le khoutare.

⁸ Haisü haibüa rüyu kue, “Ramai nou puletao tsü-lesü southou peteire; zhou teithe haina koutehia, puletaosü ngaolouhoa moa choulouhoa bue.”

⁹ Alia David nou paoe, “Puletaoye sü puletao vei nühbuh hinou muloutheo ea beiloutheo. Puletao sü kaotatheo, puletaoye sü tudee peitheo!

¹⁰ Puletao vei nghisü ngaolou more donou, panou nghicha tatheo; alia teisanou puletaoye panou puletao vei kao ashi khehi kikoutheo.”

¹¹ Südonou Enou noue: Jihudimai taonou phisü louyu kisü puletao hai ha-kayu hi dulourewu? Süsü movuzüe. Jihudimai taoye panou tahrüh kukhe maiye ngaorai loure donou, puletao vei mah vanou khailu peiyu sü tahrüh kukhe mai hi vetare.

¹² Jihudimai vei mah nanou deiphao hi ha alaosou povepeie, alia puletao vei rako hilo toure hayu nanou tahrüh kukhemai tao hi ha alaosou povepeie. Sükulouzü, Jihudimai hrülai chekhoua velou louyu kisü daizhozhou dukou shoyu hatao sü ngaolaisa!

Tahrüh Kukhemai vei Khailu Louyu

¹³ Chuo Enou tahrüh kukhemai neletao hi paowe: Enou tahrüh kukhemai vei sei-atamai alisoua bubu sasü, Enou Avah hisü kathe soulai.

¹⁴ Soulou veilouzü Enou lah Atahrüh maitaoye panou southou ngaorai peiwu-a puletao hronou kamaiye panou khailu loulai.

¹⁵ Daiolouzü puletaoye laiyu kisü, deiphaomaiye sü Ramai ngaobamai soua buyu hinou puhvei samai panou souloure. Sükuyu thaisü puletaoye popeiyu kisü kaku khailai? Süsü thaimaiye donou hriyu sünabaie!

¹⁶ Raikaiyu raokhao pho nasü Ramai hi peilouzü, süthaisü raokhao ke teitei-a puhveie; alia süübe alivei süümatao hai Ramai hi popei louzü, süübotao-a puhvei khaire.

¹⁷ Shothou khaitouyu Oliv süübotao sü chata louzü, sühisü rekou vei Oliv süübonou pove cholouwe. Nele tahrüh kukhemai taosü rekou vei Oliv süübe süna kue, alia chuo ne sü Jihudimai vei rako hilo chihshoyu hrümai naye koa lou zha ngaozho loure.

¹⁸ Südonou, nenou süübotao kua chatayu puletaoye sü ngaophou moyu souwu laimoe. Nenou kakua khaophu souloulai? Ne sü süübo alibaie; nenou mataoye pfümoe, mataonou neye pfüwe.

¹⁹ Ana nenou paolai, “Ovai, ana Eye buh peire donou süübo sütaosü chatare.”

²⁰ Süsü chekhaoe. Puletao sü chatare daiolouzü puletao nou louche loumoe, ana newo louche louyu vanou buh sühinou buloure. Ana süvanou khaophu souwuso; süjüwo, pia bulo.

²¹ Raia buyu süübotao kuyu Jihudimai taoye sü Ramai nou shodai molouzü; puhnou neye shodai peishulai tea ne chowu?

²² Ramai hai daizhozhou zhuvea süsa ea daizhozhou poushisa touyu sü hai hinou Eletao nou ngaoe. Puhwo kaotayu maitao hisü poushishoe, ana puhvei zhuvea hinou nenou tobai soumoa bulouzü nehisü zhuvea peilai. Ana sükumore toulouzü ne-a chatalai.

²³ Alia Jihudimai taonou puletao vei louche moyu nasü thaowure toulouzü, puletaoye sü puletao vei raiki buh nahi pove khaipei khailai, daiolouzü Ramai nou süsü soulousüe.

²⁴ Nele tahrüh kukhemai taowo, shothoukhai touyu Oliv süübe ali vahi zhai kukheli hinou pothou chokhai touyu chatayu rekou oliv süübo ali kue. Jihudimaitao hai shothoukhai touyu süübe haina kue; alia Ramaiye donou chatayu süübe haitaoye lah puletao behi pocho dakhai peiyu nanou lasho laihie.

Mai Hrülai Peihi Ramai vei Zhuvea

²⁵ Athaihou jürai maitao, Enou neletaoye panou kheitsü haina hai sülounüwe, daiolouzü hainanou neletaoye lah neletao hai daizhozhou tsü veisa tea choyu hinou soukhai peilai. Süolouzü Israel maitao nou le khouyu hai teisa donou laimoe, ana tahrüh kukhemai maipei teiteinou Ramai hi vechemo koute likhei bailai.

²⁶ Alia haikuyu zhai hinou Israelmai hrülai hai khailu loulai. Haisü sheeyu larübvü nou paoyu kuwe, “Khailu-apeio sü Zion hinou velai, alia Jakob tyaonahmaitao hinou ashi teitei sü potawulai.

²⁷ Enou puletao mah potayu kisü vo hainasü Enou puletaoye koa soulai.”

²⁸ Puletao nou Ko Avei nasü pobayu donou, tahrüh kukhemai neletao donou Jihudi maitaosü Ramai vei ngaobamai soutare. Ana Ramai nou dolouyu hilo louzü, puletao vei puo-pao vanou puletao hai puhvei samaitaoe.

²⁹ Daiolouzü Ramai hai puhnou dolouyu ea hapeiyu mai süna vanou puhvei tsü hai datayu hae.

³⁰ Tahrüh kukhemai neletao donou louzü, lüh lihi neletao hai Ramai nou paoyu zübae; ana chuo neletao hai Ramai vei zhuvea ngaoloure daiolouzü Jihudi maitao hai paoyu züba loure.

³¹ Süzhaibüa, neletao nou ngaolouyu zhuvea vanou, Jihudimai-a Ramai vei zhuvea ngaoloure donou chuo puletao sü Ramai nou paoyu zübawe.

³² Daiolouzü Ramai nou maikhemai hrülaiye zhuvea peiloure donou mai hrülaiye sü paoyu zübayu vei hukha pfümai soupeire.

Ramaiye Paoshoyu

³³ Ramai vei kini hai daizhozhou dusa! Puhvei ratsü ea tsü hai daizhozhou thousa! Thaohnou puhvei chikuyu hai paongao peilousüe? Thaohnou puhvei ludu hai sülousüe?

³⁴ Haisü sheeyu larübvü nou paoyu kue, “Thaohnou Mapao vei le süwe? Thaohnou puhye doupeilou süwe?

³⁵ Thaohnou puh hi sapeina tali peiwu-a süvanou puhnou pao khare bue?”

³⁶ Daiolouzü puhnou na teitei soupeie, alia na teitei sü puh vanou ea puhye donou hriwe. Ramai puhye sü teisanou paosholou khaio! Amen.