ROMMAI 10 - SHEEYU BAIBEL (BSI)

¹ Athaihou jürai maitao, lah Amaitao khailu loure donou daizhozhou Alenou züpa-a Enou Ramai hinou veachi paosa!

² Enou puletao vanou neletao hi zhopaoh peiwe süolouzü puletao hai leishoa Ramaiye thowe; ana puletao vei rathoyu nasü checheyu tsüna vanou soushulou moe.

³ Puletao nou Ramai nou lah puhye koa maikhemai souzü peiyu ludu nasü süloumoe, alia süjüwo puletao nou lah puletao vei ludu nanou soushupa loure teloure; alia sübüa puletao sü Ramai nou maikhe maiye koa souzü peiyu luduna hisü lah puletaoye thoupeibae.

⁴ Daiolouzü lülouyu maitaliye Ramaiye koa souzü peiloure donou Khrista nou razhai vei akhai nasüe.

Khailu Peiyu hai Mai Hrülai Donoue

⁵ Razhaina züloua Ramaiye koa souzü peiyu vanou Moses nou haibüa rüe: “Razhai vei chikhatao züyu maitali sü süna vanou hrilai.”

⁶ Ana sheeyu larübvü nou lü vanou Ramaiye koa souzü peiyu vanou paoyuwo louzü haibüa rükhaitoue, “Ne lahnou neye, thaohnou raki hi takhelai? tea noulaimoe,” (süvei ko louzü Khristaye pokouyu sünaye paoe).

⁷ “Moa nenou, thaohnou deiphao khelehi taloulai? tea noulaimoe,” (süvei ko louzü Khristaye athai hinou popayuye paoe).

⁸ Sünanou paoyuwo louzü haikue: “Ramai chipao hai ne ngheiki hi, ne taihi, ne lethouhi bue,” (süolouzü, Eletao nou paodouyu lüvei chipao sünaye paoe).

⁹ Daiolouzü neletao nou Jisu hai Mapaowo süe tea neletao tainou paopa-a louzü ea neletao lethou hinou Ramai nou puhye sü athai hinou sou hrishu peire tea louche louzü, neletaosü khailu loulai.

¹⁰ Daiolouzü emainou puh lethou hinou loucheloua Ramaiye koa souzüloue; alia puhnou puhvei tainou mah paopaloua khailuloue.

¹¹ Sheeyu larübvü nou paoe, “Puhye loucheyu maitaliye sü panou ahrao ngaolaimoe.”

¹² Hai hisü mai hrülai loukhaire, daiolouzü sühisü Jihudimai ea tahrüh kukhemai kole hi takuyu hae; Ramai hai mai hrülai vei Mapaobaie ea puhye kua bumai hrülai hisü alaosou hapeiwe.

¹³ Haisü sheeyu larübvü nou paoyu kue, “Mapao vei zhih kua bumai hrülai sü khailu loulai.”

¹⁴ Ana puletao nou louche moyu puhye sü kabüa puletao nou kulai? Alia puh vanou choukhaimoa kabüa puletao nou puhye louche loulai? Alia ko paodoumai ha-a puletao nou kabüa chouloulai?

¹⁵ Alia maiye seita moanou kakua puletao nou ko paodou loulai? Haisü haibüa rüthouyu kue, “Ko avei paodouyu puletao phisü daizhozhou zhai veisa!”

¹⁶ Ana ko avei nasü puletao hrülainou pokhai loumoe, daiolouzü Isaiah nou paoe, “Mapao, thaohnou Ehvei chipao sü loucheloue?”

¹⁷ Südonou chipao choulouyu vanou lü vewe, alia Khrista ko paodouyu vanou chipao nasü vewe.

¹⁸ Ana Enou noue: Puletao nou chipao süsü choumoe touyu sü chechewu? Cheche-a puletao nou chouloure daiolouzü sheeyu larübvü nou haibüa paoe: “Puletao paisü deiphao teitei hi hotere, alia puletao chipao sü deiphao akhaihi veloure.”

¹⁹ Enou noupue; Israel maitaowo süloumowu? Moses nou raikai-a chila peie: “Enou neletaoye tahrüh moyu maitao vanou panou ngaorailai; alia voyu tahrüh ali vanou neletaoye panou lekhalai.”

²⁰ Ana Isaiah nou khuvei puloua paoe, “Eye phoumoyu maitao nou Eye ngaoloure; Eye donou noumoyu puletao hisü Enou ngaopeire.”

²¹ Ana puhnou Israel maitao vanou paoe, “Heamadzü Enou Abao topaloua paoyu zümoyu ea rochiyu maitaoye sheloure donou bue.”