PONGAOPEIYU 9 - SHEEYU BAIBEL (BSI)

Khahzü nou Souveayu

¹ Süthaisü rakivamai angou chenanou puh besü houng-e. Alia Enou ratei vanou teivuh ali deiphao hi dekouyu sü ngaoe, alia akhai hayu raobvüvei khareih sü puh hi peire.

² Teivuh sünanou akhai hayu raobvü sünavei müsü hapae, alia sühinou meifü aduhi meikhao kua mei khaopae; teinghi ea rateisü raobvü sünahi meikhao süna vanou zhitei loure.

³ Alia meikhao süna hinou khahzü alaosou deiphao hi veloure, alia khahzü sütao hisü kei pfüyu hairakhao hi buyu khoukotya peire.

⁴ Puletao hisü deiphao hi poudai, poube moa kukhe süübe taliye soushiwu more, ana puletao puhi Ramai vei paoshee hayu mai sütaoye likheithe soushi peire donou paopeire.

⁵ Khahzütao hisü maikhemai sütaoye southeawu moa puletaoye khou angou donou likhei souvea peiloure aetou peire. Puletao nou souveayu sü kei pfüyu hairakhao nou maiye keipeiyu ki souyu kuwe.

⁶ Khou angou sütao hisü maikhe mainou athaiye sü phoulai, ana süsü puletao nou ngaolou laimoe; puletao nou thainülai, ana athai nanou puletao hinou tutalou bailai.

⁷ Khahzü sütao zhusü reih donou soudayu rheitao kue; puletao peiva hisü sana veo peirü kua rüpfüe, alia puletao pahsü emai pah kue.

⁸ Puletao peishusü naotumai peishu kue ea puletao huhsü souveo huh kue.

⁹ Puletao khaova hisü hu khaokha kuyu alinou zükhaitoue, alia puletao vei shouh khosü reih mühi zhaohoyu rheiluki alaovei kho kue.

¹⁰ Alia kei pfüyu hairakhao kua puletao vei mee ea kei bue, alia puletao nou maikhe maiye khou angou souvea peilaiyu khoukosü puletao vei meehi bue.

¹¹ Puletao pei hisü akhai hayu raobvü sünaye khoyu rakivamai sünanou veo soua bue. Puh zhihsü Ebriamai la hinou Abaddon toue; alia Greekmai la hinou puh zhihsu Apollion toue (sünavei kowo louzü “Souha peiyuna” toue).

¹² Ngaopiyu araikha nasü pachere; zhukhaio, haithai-a ngaopiyu ahai vepure buhie.

¹³ Süthaisü rakivamai arou chenanou puh besü houng-e, alia Enou Ramai nghojünou buyu sana sheela buh hi kai adaitao hinou paili choue.

¹⁴ Pai sünanou rakivamai arou chenahi haibüa paoe, “Euphratis reiduna hinou phukhaitoua khaikhai touyu rakivamai adaitaoye sü phapeio!”

¹⁵ Südonou teilecho haina, teithe haina, khou haina ea po haina donou deiphao hi maihrü zha asü hinou aliye southea loure donou khaidakhai touyu rakivamai adaitaoye sü phapeire.

¹⁶ Rhei reihmaitao vei maipei kazhousa touyu sü Ahi paongao peie; süsü zzü thehaie.

¹⁷ Alia Enou zhokounou rheitao ea sütao phao vahi buyutaoye haibüa ngaoe: rhei phaovahi buyu puletao vei khaokha sü meibüa hoe, sapphir chuh kua daizüzüe, alia meichuh kua pah-e. Alia rheitao peisü souveo pei kue, alia puletao mü hi nou mei, meikhao ea meichuh pae.

¹⁸ Puletao mü hinou payu mei, meikhao ea meichuh haitao asünou souvea peiyu sünanou emaihrü zha asü hinou aliye sü southeare.

¹⁹ Daiolouzü rhei sütaovei khoukosü puletao vei mü ea meehi bue. Puletao meesü nghou kua pei pfüe, alia sütaonou maikhe maiye souzhu peiwe.

²⁰ Veahoyu haitaonou southealou moyu kukhe maikhe maitao nou rashitao, alia ngao-a ngaomoyu, chou-a choumoyu, ta-a talou hoyu, puletao bahnou soukhai touyu sana, shahu, baosa hu, chuh ea süünou soukhai touyu bashara taoye thoyu hinou puletao lesü daloumoe.

²¹ Moa puletao nou maiye southeayu, puletao vei khei-khupado, puletao vei khulou vah moa puletao vei vaoyu vah sütao hinou le dalou moe.