PONGAOPEIYU 8 - SHEEYU BAIBEL (BSI)

Paoshee Anai Chena

¹ Zhaotu sünanou paoshee anai chena hapayu kisü rakiva hisü teilecho pohli phasü ngahsoua buloure.

² Sükisü Ramai nghojünou la-a buyu rakivamai anaiye Enou ngaoe, alia puletao hisü be anai peire.

³ Alia ha kainü veiyu mei taoloure sana nou souyu bvü ali poa buyu kukhe rakivamai alinou taveloua sheelabuh hinou laloure. Alia puh hisü sheeyu maitao hrülai vei veachi paohi pothou hüloure ea vebuh nghojünou la-a buyu sana sheelabuh hinou posheela loure donou ha kainüveiyu na alaosou peikhaitoue.

⁴ Rakivamai süna bah hinou kai nüveiyu sünavei meikhao sünasü sheeyu maitao vei veachipao sünaye koa Ramai nghojühi khere.

⁵ Sühinou rakivamai sünanou ha kainüveiyu meitaoyu bvü sünasü poloua süsü sheelabuh hi mei sünanou thouphouloua süsü deiphao hi polai koure; alia sühisü pairao ea teisüyu kho, tei peivavayu, alia nü süyu paloure.

Be Anaitao Houngyu

⁶ Süthaisü rakivamai anaitao nou be anaitaosü poa houngre donou souda loure.

⁷ Rakivamai araikha nanou puh besü houng-e, alia sühisü zhenoupu hükhai touyu reithou ea mei paloua deiphao hi rükou loure. Alia deiphao zha asü hinou zhali, süübetao zha asü hinou zhali ea poudai teitei sü deilai khaire.

⁸ Süthaisü rakivamai ahai chenanou puh besü houng-e, alia meinou tao-a buyu dushoyu deichi büyu halisü zaihi polai thoure. Sühinou zai zha asü hinou zhalisü zhe datare,

⁹ alia zaihi buyu hrikhaona zha asü hinou zhalisü thaire ea zai hi buyu dzüluki zha asü hinou zhaliye sü souhare.

¹⁰ Süthaisü rakivamai asü chenanou puh besü houng-e, alia meikei kua keivavayu dushoyu teivuh alisü ratei vanou dekouloua deiphao hi rei zha asü hinou zhali hi ea dzühoung taohi kou loure.

¹¹ Teivuh süna zhihsü “Khayu” toue. Dzü zha asü hinou zhalisü khatare, alia soukhayu dzü süna külouyu vanou maikhemai alaosou thaire.

¹² Süthaisü rakivamai adai chenanou puh besü houng-e. Alia teinghi, khouh ea teivuh taoye zha asü hinou zha liye sü dapeire, alia sübüyu vanou sütao vei avasü zha asü hinou zha lisü maitare; alia heako zha asü hinou zhali ea kheikou-a sübüa zha asü hinou zha lisü vakhai more.

¹³ Süthaisü Enou zhue, alia lühche alinou kushoa ratei tsüle hinou zhaopoa haibüa paikushoa paoyu sü Enou choue, “Kukhe rakivamai asütaonou houngpa laiyu bekho sütao vanou deiphao hi hrüa bumai hrülai donou daizhozhou ngaopisa! Daizho zhou ngaopisa! Daizhozhou ngaopisa!”