PONGAOPEIYU 5 - SHEEYU BAIBEL (BSI)

Larübvü ea Zhaotu

¹ Alia vebuh süna vahi buyu mai süna bah zhoulo vanou Enou larübvü ali ngaoe; Sühavei phao-le ahai hisü larüchah rüthou phoutsü khaitoua paoshee anai nokhaitoue.

² Alia haibüa, “Thaohnou paoshee taosü soukholoua larübvü nasü hapalou süe?” tea pai kushoa paoyu khou-chihshoyu rakivamai aliye Enou ngaoe.

³ Ana rakihi-a, deiphao hi-a moa deikhehi-a larübvü sünasü hapalou süyu mo-a sühi zhuthoulou süyu maitalia hare.

⁴ Larübvü süna hapalou süyu moa sühi zhuthoulou süyu maitalia ngaolou hoyu donou Esü krasho loure.

⁵ Sühinou tsümaitao hrohinou mai alinou Ahi paoe, “Kraso, zhukhaio! Judah khühi Souveo, David vei Ma sünanou reih koloure, alia puhnou paoshee anaitaosü soukholoua larübvü nasü hapalou süre.”

⁶ Süthaisü Enou Zhaotu aliye vebuh tsüle hinou, hrikhaona adaitaonou ea tsümaitao nou sühao-a buyu sü ngaoe. Zhaotu sünasü raichoki datheayu kue. Sünavei kai anai ea nghithou anai bue. Nghithou sütaosü deiphao teiteihi seitayu Ramai vei rako anaitaoe.

⁷ Zhaotu sünanou taloua vebuh süna vahi buyu mai süna bah zhoulo vanou larübvü sünasü poloure.

⁸ Alia puhnou süsü polouyu kisü, hrikhaona adai sütao ea tsümai kaidai taosü kou Zhaotu nghojünou kaotare. Puletao mailili bah hisü lanabvü aduna chekhei bue, alia mei deiloure kaivei shoyu nanou phoua buyu sana paitao-a bue, sütaosü sheeyu maitao vei veachi nasüe.

⁹ Alia puletao nou haibüa ashu lousü souwe: “Newo larübvü süna poyu ea sünavei paosheetao hapayu züdoue. Daiolouzü neye sü southeare, alia khü, la, mai ea tahrüh liki hinou maikhe maiye ne zhenou Ramaiye donou hrüloue.

¹⁰ Alia nenou panou Eletao Ramaiye kuvah soure donou puletaoye napaomai vedei ali soupeire alia puletao nou deiphaosü tukha-sahrülai.”

¹¹ Süthai-a Enou zhukhaie, alia Enou rakivamai thethe ea zzü zzü paisü chouwe! Puletao sü vebuh süna, hrikhaona sütao ea tsümai sütaoye sühao poa la-a bue,

¹² alia haibüa pai kushoa lou soue: “Southeawuyu Zhaotu puhsü khouko, kini, ratsü, khou-chihyu, tsükhouyu, adusho, alia paoshoyu sü ngaozüdoue!”

¹³ Süthaisü Enou raki hi, deiphao hi, deikhe hi, zai hi, alia teideiphao teitei hi buyu hrikhaona hrülai nou haibüa lou souyu sü choue: “Vebuh hinou buyu puh ea Zhaotu hisü paoshoyu, tsükhouyu, adusho ea khou-chihyu buyu sü teisanou souloukhaio, teisanou!”

¹⁴ Sükisü hrikhaona adaitao nou chila peie, “Amen!” Alia tsümaitao nou deiphinou kou kaoloua khurü loure.