PONGAOPEIYU 18 - SHEEYU BAIBEL (BSI)

Babilon Kaotayu

¹ Haithaisü Enou kukhe rakivamai alinou rakivanou takouyu ngaoe. Puhvei dushoyu soulousü khouko bue, alia puhvei khouko avanou deiphao teiteisü varu loure.

² Puhnou puhvei chihshoyu painou haibüa shapae: “Kaotare, kaotare Babilon adunasü! Chuwo puhsü rashitao ea sheemoyu rakotaonou haoyubuh datare; alia sheemoyu ea ngaorayu raohou tyalinou buyubuh soubaire.

³ Daiolouzü tahrüh khemai hrülainou puhvei khulou souyu vei chihshoyu zhaoh nasü shozhi loure. Deiphaohi vemaitao nou puhye koa khulou vah souloure, alia deiphao hi huh-ha souyu maitao nou puhvei loküyu kini sütao vanou hanisho loure.”

⁴ Süthaisü kukhe pai alinou rakivanou haibüa paoyu Enou choue, “Amaikhemai, puh hinou tapalo! Molouzü neletao-a puhvei mah hisü koa zha ngaozho shulai; molouzü neletao-a puhvei veahoyu hisü koa zha ngaozho shulai!

⁵ Daiolouzü puhvei mahtaosü rakicha kukhere, alia Ramai nou puhvei vah ashitaosü licho loure.

⁶ Puhnou peiyu kua puh hisü peikhaio; alia puhnou souyu vahtao thaifüa puh hisü zha ahai koua paorü peikhaio. Puhnou neletaoye donou lathou chohpeiyu pai süna hinou puhye donou zha ahai chihkoua lathou chopeikhaio.

⁷ Puhnou daizhozhou lah puhye sü paosho peiresa ea souvasho peiresa, süzhou veahoyu ea dopfüyu sü puh hia peikhaio. Daiolouzü puhlah puhle hinou haibüa paoe: ‘Veopai Esü buh haihinou chobue, Ewo meamaipfü moe, Ewo dopfüyu ngaokhai laimoe!’

⁸ Südonou puhvei veahoyu, süolouzü sounou, dopfüyu ea tokaayu sü teithe alikhei hinou puh hi velai; Alia puhye sü meinou deiwulai; daiolouzü puhye chikuyu Ramai Mapaowosü khou-chihwe.”

⁹ Alia puhye koa khulou vah souyu ea vashoa hrüyu deiphao hi vemaitao nou puhye meideiyu meikhao süna ngaolouyu kisü puhye donou puletaosü kralai ea dopfülai.

¹⁰ Puhvei veahoyu hi lou zha ngaozhoyu sü ngaopi-a puletaosü adou konou la-a haibüa paolai, Daizhozhou ngaopisa! Daizhozhou ngaohisa! Oh dushoyu nuhdu, Oh khoukhoulai nuhdu, Babilon! Teilecho ali levai hinou nevei hakayu sü veloure!

¹¹ Deiphao hi huh-ha souyu maitao-a puhye donou krae ea dopfüe, daiolouzü maitalinoua puletao huhsü hüpupeikhai more;

¹² huh sütaowo louzü sana, shahu, muhteiyu chuh, mukta chuh, puletao vei jüyusah, maomüyu sah, soumai sah, alia horoyu sah; kai veiyu süütya veishi, pao huhnou souyu na teitei, muhteiyu süü, baosa hu, hu, chara chuh;

¹³ alia sheesükao, vusa vunou, kaivei süüthea, theadzü kaivei, mei taoloure kaivei süüthea; darkha zhaoh, theadzü, sou avei ea sou thouh, cho ea zhaotu, rhei ea rhei lukitao, qilatao, alia emai, hrirai koute, haitaoe.

¹⁴ Huh souyu maitao nou puh hi paoe, “Nenou züpayu na teiteisü ne hinou takhaire, alia nevei kini ea nevei avei veilai taosü hazhei tare, alia nenou sütaosü hakia ngaopu khailou hore;”

¹⁵ Nuhdu süna hinou na sütao zholoua hani louyu huh-ha souyu maitaosü adou kounou la-a bulai, daiolouzü puletaosü puhvei veahoyuhi lou zha ngaozhoyu sü ngaopiwe. Puletao sü kralai ea dopfüa

¹⁶ haibüa paolai, “Daizhozhou ngaopisa! Veishoyu jüyu sah, maomüyu sah ea horoyu sahnou banouyu, alia sana, muhtei chuh ea mukta chuhnou tupfüa laiyu dushoyu nuhdu süna donou daizhozhou ngaopisa!

¹⁷ Alia teilecho alikhei hinou sübüyu puhvei dushoyu kini teiteisü souhare.” Alia dzüluki paopu maitao, dzüluki hinou veih-hao souyu maitao, dzüluki veimaitao ea kukhe zai hinou huhsoutoua hrüyu maitao hrülainou adoukou nou laloure,

¹⁸ alia puhye meideiyu vei meikhao sünasü puletao nou ngaolouyu kisü haibüa shusoua raoloure. “Dushoyu nuhdu haina büyu kukhe nuhdu lia bukhai mohie!”

¹⁹ Alia puletao nou puletao peiva nai polaipa khailoua kra-a ea dopfüa paoe: “Daizhozhou ngaopisa! Dushoyu nuhdu haina donou daizhozhou ngaohisa! Puhsü puhvei kini vanou zai hinou dzüluki pfüa laiyu maikhemai hrülaiye panou hani louyu nuhdu sünasüe! Alia teilecho alikhei hinou puhvei na teiteisü souhare!”

²⁰ Oh raki! Oh sheeyu maitao, sei-atamaitao ea rachi paolamaitao, neletao puh vanou lesalo, daiolouzü puhnou neletao pei hi soupeiyu süna thaifüa Ramai nou puhpei hisü khühphou peire!

²¹ Sükisü khoushoyu rakivamai alinou dushoyu thouh veiyu chuhpa deiyu chuhli poloua süsü zaihi polaithouloua paoe, “Haibüyu zhai hinou dushoyu Babilon nuhduye sü chihsho-a polaithouwu-a panou ngaopukhai laimoe.

²² Alia lanabvü aduna kho, emai pai, shaa houngyumai pai ea bekhosü hakia nehinou choupukhai laimoe! Alia bahsha vah hinou raiyumai taliye hakia nehinou ngaopukhai laimoe; alia thouh veiyu chuhpa vei kholia nehinou choupukhai laimoe!

²³ Meibvü vei avasü ne hinou hakia ngaopukhai laimoe. Sheerepu ea nghirepai lapaisü hakia ne hinou choupukhai laimoe. Nevei huhsouyu maitaosü deiphao buh veishi hinou dukayu maitaoe, alia nevei madayu khei-khupado nou deiphao hi maikhemai hrülaiye sümah-sümo peire!”

²⁴ Alia rachi paolamai, sheeyu maitao ea deiphao hinou southeawuyu maikhemai hrülai vei zhesü puh hinou ngaolouyu vanou Babilon ye sü tudee peire.