PHILIPPIMAI 3 - SHEEYU BAIBEL (BSI)

Acheche Hrümai

¹ Akhai hinou, Athaihou jürai maitao, Mapaowo hinou sasa-a bulo. Enou raiki rüyutao rüpuyu vanou E vamoyu hae, alia sübüa souyu sü neletaoye donou veipue.

² Sei sütaoye zhutoulo, ashi vah souyu sütaoye zhutoulo, vasou vade vuzülai tea paoyu puletaoye sü zhutoulo.

³ Acheche hee vadeyu ngaolouyu taosü Eletao baie, puletao moe; daiolouzü Eletaowo Ramaiye puhvei rako vanou puhye thowe ea Khrista Jisu ye koa ali soulouyu hinou sasa-a bue. Eletaowo vakou naanou taliye lü-a hrümoe.

⁴ Sütoukhaia Eye donou sübüyu vakouvei nataoye louchelou veiyu bue. Maitalinou vakouvei naanou taoye louchelou veiyu bue tea cholouzü, Eye donou sübüa cholou veiyu qo alaosou veikoushoa bue.

⁵ Ehai teithe acha tsüpayu kihinou hee rode-e. Pfüna hinou Esü Israel mai alie, Esü Benjamin khü hinou ve, Ebriamai nou nayu Ebriamai alie. Razhai hilonou zhulai toulouzü Esü Phariseemai alie,

⁶ alia lenouyu hilonou paolai toulouzü Esü lüloumai meye souveayu mai alie. Cheche hrü hrüyu hilonou paolai toulouzü, Esü chaa ali-a hazheiyu mai alie.

⁷ Ana Enou zhiloue tea cholouyu na teiteisü chuo Khristaye donou halia komoyu nataobaie tea Enou choloure.

⁸ Chechenou na sütao likhei baimoe, ana muhtei koushoyu A Mapao Khrista Jisu vei tsü süna donou Enou ha teitei hai halia kokhaimoe tea choloure, puhye donou Enou ha teiteisü polaiwure; Enou Khristaye zhiloure donou sütao teiteisü nghouh büa choloure,

⁹ alia sübüa souyu sü puhye koa alikhei souloure donoue. Razhai zülouyu vanou ngaolouyu lah Ahrümai chechena hare; ana chuo Ramai hinou veyu ea lü hinou soushu louyu Khristaye loucheyu vanou peikhai touyu Ahrümai chechena bue.

¹⁰ Enou züpayu teitei sütaowo louzü Khristaye süyu, puh hrishuyuvei khouko sülouyu, puhvei veahoyu koa zha ngaozhoyu ea puhvei athai hinou koa puh büyu süsüe,

¹¹ süolouzü soulou veisa lah E-a athai hinou hrishu loure süsüe.

Rakiva Hilonou Kuyu

¹² Enou haisü ngaoche loure moa liche chekhou loure tea paomoe; ana süsü Enou lah Avei souloure donou nghojü hilo hupoa kouwe, daiolouzü Khrista Jisu nou Eye sü lah puhvei soupeire.

¹³ Thaihou jürai khemai, Enou süsü lah Avei souloure tea chomoe; sütoukhaia Enou hali soua buyu sünawo louzü Athailova buyutao thaowu-a Anghojülova buyutaoye hupoa kouyu sünasüe.

¹⁴ Südonou Enou Khrista Jisu hinou rakiva hilonou Ramai nou kuyuvei bu süna donou koyubuhmü hilova hupoa kouwe.

¹⁵ Rako hilo vanou licheyu Eletao hrülainou haibüa chokhailai. Ana neletao kamainou takua cholouzü, Ramai nou süna-a neletao hi ngaopeilai.

¹⁶ Sütoukhaia chu koute Eletao nou füa laiyu zhai sütao thaifüa Eletao nou nghojü hilo takoulou laikhe.

¹⁷ Athaihou jürai khemai, Azhai douyumai soulouwo. Ehnou neletao hi cheche zhai soungao khaitouyu sütao thaifüa laiyu puletao hisü le peitou loukhaio.

¹⁸ Raikinou haisü lüh taoli Enou neletao hi paowure, alia chu-a Enou haisü nghidzü noupu paopuwe, süolouzü Khrista kros vei ngaobamai büa hrüyu mai alaosou bue.

¹⁹ Puletao vei akhai nasü ha-kayu baie, puletao ra nasü puletao poubaie. Puletao nou ahrao laiyu hinou kathe souwe, alia puletaosü deiphao hainavei natao likhei vanou cho-a bue.

²⁰ Sütoukhaia Eletaowo rakiva maitao baie, alia Eletaowo Ehye khailu-apeio Mapao Jisu Khrista nou raki vanou vekou laiyu sü zhishoa bue.

²¹ Puhnou Eletao vei lülou hoyu thailouvei pfüphao nasü soudawulai ea puhnou ha teiteiye panou puh khehi hrülou süyu khouko sünasü seia pfüphao sütaosü lah puhvei vaveishoyu pfüphao sübüa souwulai.