PHILIPPIMAI 1 - SHEEYU BAIBEL (BSI)

¹ Khrista Jisu kilai Paul ea Timothi nou— Philippi hi buyu lüloumaimevei süthai-apeimaitao ea vahlümaitao-a loua Khrista Jisu ye koa ali soulouyu sheeyumaitao hrülaihi rüwe:

² Ramai Eletao Puo ea Mapao Jisu Khrista nou neletaoye zhuvea ea kaonayu peiyu sü souloutheo.

Kalo Paoyu Veachi

³ Enou neletaoye lichoyusasü neletaoye donou Enou Aramai hi kalo paowe;

⁴ alia Enou neletao hrülai donou veachi paosasü, Enou sashoa veachi paowe

⁵ daiolouzü shurai hinou chu koutesü neletao nou Ko Avei paodouyu kuvah hi Eye soukha peie.

⁶ Alia neletao hrohi vah avei soushu peiyu Ramai puhnou süsü Khrista Jisu vei teitheki koute soucheloumo sasü koa soukoute peilai touyu sü Enou sütoupoa bue.

⁷ Neletao hai teisanou Alekhe hinou bue! Alia sübüa neletaoye Alekhe hinou choa buyu sü Eye donou souzüshoe. Daiolouzü chu Enou hukhahi bubuki-a, Ko Aveinaye donou dua vah souloure donou madosoua hrübuki hi-a ea kukhemai hi süna vanou paodoupeia bubuki hi-a Ramai nou Ahi puhvei zhuvea peikhai touyu hisü neletao hrülainou koa zha ngaozho loure.

⁸ Enou neletao hrülaiye lah Khrista Jisu puhvei leshana hinou leshibaie tea paoyuhai cheche-a paowe touyu sü Ramai nou Avei zhopaoh souwe.

⁹ Alia Enou veachi paoa buyuwo louzü neletao vei leshiyuhai tsü chechena ea liche-a chikuyu naye koa dushupu lailaiyu sünasüe,

¹⁰ sübüa neletao nou veiveilai nasü dolou sülai. Süthaisü neletao nou Khrista Teithe kisü sheemoyu ea cha buyu teitei hinou mado souloulai.

¹¹ Neletao hrümaisü Ramai kathe paoloure ea puhye paosho loure Jisu Khrista likhei hinou vebaiyu acheche vei rashithou sünanou phoupei loulai.

Hri-a buyu hai Khrista vei baie

¹² Athaihou jürai khemai, Enou neletaoye panou sülou nüwe, süolouzü Ahi pa-a buyu sütaonou chekhao-a Ko Aveina paodou puloure donou soukhasho peiwure.

¹³ Süvanou, Ehai Khrista vei kilai aliyu donou hukhahi loubaie touyuhai reihmai fühaohi reihkhaomai taonou ea haihi buyu kukhe maitao hrülainou-a sükhaiwe.

¹⁴ Alia Enou hukhahi louyu vanou thaihou jürai maitaoliye panou Mapaoye louche puloure, alia sübüa puletaosü Ramai chipao paodouyu hisü pikhai moa teisa nou khuvei pusho loure.

¹⁵ Chechenou puletao kamaisü ngaoba-ngaoraiyu vanou Khrista ko paodouwe, ana kukhemaiwo le sheetoua paodouwe.

¹⁶ Mai haitaowo leshi hinou paodouwe, daiolouzü Ramai nou Ahi Ko Aveinaye khotou loure vah peikhaitoue touyu sü puletao nou süwe.

¹⁷ Ana raimaitaowo le sheetoua Khrista vanou paodoumoa, souphe-soukhoyu rako hinou paodoubaie; sübüa souyu hinou Enou hukhahi bubuki puletao nou Apei hi souveapu peilousüe tea chowe.

¹⁸ Süsü halia moe! Süvanou Ewo le sabaie; ha zhaido tali hinou Khrista vanou paodou louyu, süsü khokho soubai-a, cheche-a paodou-a Ewo lesa-a bubailai,

¹⁹ daiolouzü neletao vei veachipao ea Jisu Khrista vei Rako vanou soukha veyu vanou Ehai mado souloulai touyu sü Enou süwe.

²⁰ Enou züpashoa ea rei-a buwe süolouzü Eye panou hakia sou ahraowu laimoe, ana teisanou, alia koulihsoua chuo, Enou khuvei sholai, sübüa Ahrümai teiteinou Ehai hri-a, thai-a, Apfüphao hinou Khristaye khuhaoyu sü pongaolai.

²¹ Eye donou hriyu hai Khrista baie, alia thaiyu hai louzü zhipubaie.

²² Sütoukhaia Enou kezhe hinou hripua bue toulouzü, süsü Eye donou shithou shiloure te-a vah souyu sünasüe. Sübülouzü kana dolaisa touyuhai Enou paolouhoe.

²³ Südonou Ehai tsü ahai kole hinou ro saova-a buloure. Azüpanawo louzü hrü haina hai thaowu-a Khristaye koa ho buyu sünasüe, daiolouzü sünasü veikou shohie.

²⁴ Ana neletaoye donou Enou hri-a buyu nanou veikou shohie.

²⁵ Alia Ehai hripu shulaihie touyu sü louche-a neletao vei vah veipure ea lü hinou lesa-a buloure donou Ehai neletao hrülaiye koa hri-a bupushu laihie touyu sü Enou süwe,

²⁶ sübüa Enou neletao hi tave puyu vanou, neletao nou Khrista Jisu hinou Avanou alaosou paosho louresü buloulai.

Khrista vei Zhaido

²⁷ Chuo neletao hrümaihai Khrista vei Ko Aveinanou moshilaiyu zhaido süna thaifüa hrülo, sübüa Enou neletaoye tave zhulou süa, zhulou ho-a neletao hai aroh alikhei hinou koa latoupoa Ko Aveinavei lü süna donou tsü-leli soupoa reih züyu sünavei kosü Enou chouloulai.

²⁸ Neletao vei ngaobamaiye piwuso; teisanou khuveilo, alia sükuyu nanou puletao hisü neletao nou koloua puletaosü ha-kata bailai touyuvei shee nasü sheetoua soungaowe, daiolouzü neletaoye panou kolouyu hai Ramai hinou vebaie.

²⁹ Daiolouzü Khristaye donou neletao hisü puhye lü loucheyu likhei baimoa puhye donou veaho loure zhou aveina-a peikhaitoue.

³⁰ Chuo neletao nou Eye koa reih hisü zha ngaozhoa bure. Reih hainasü raiki neletao nou Enou züa buyu ngaoyu sünasüe, alia neletao nou chouyu büa, sünasü chukoute Enou züa buyu nasüe.