PAODAKHAIYU CHIKHA 1 - SHEEYU BAIBEL (BSI)

Paochapa Chi

¹ Chipao haitao hai Moses nou Israel maitao hi puletao nou Jordan rei vei teinghi palovatha buyu Suph tea kuyu Jordan Deikho hinou paoe. Buh sünasü Paran nuhdu alia Tophel, Laban, Hazeroth ae Dizahab nuhtao kohinou bue.

² Sinai Deichi hinou Kadesh Barnea hi veyu hai Edom maivei deichi ludu hilonou tayu hai teithe kiali tawe.

³ Israel mainou Ejipt hinou tapa louyu po raidai, khouh kiali navei khoukha araina zhou Mapao nou Moses hi kharochi peikhai touyu pfüphou sü maikhe mai hi paopeie.

⁴ Haihai Mapao nou Israel maiye panou Heshbon hinou buyu Amor maivei veo Sihon, alia Ashtaroth ae Edrei nuhdu hinou hrüyu Bashan maivei veo Og puhai jünou reih veilouyu thainoue.

⁵ Israel mainou Jordan vei teinghi palova buyu Moab maivei teidei hinou hrüa buyu teile hinou Moses nou Ramai vei chikha khesü soutaosoua haibüa paopeie.

⁶ “Etao Ramai Mapao nou Etao hi Sinai Deichi hinou hrüa buki haibüa paoe, ‘Neletao hai deichi hai hinou phasho-a bure.

⁷ Neletao vei fühao khesü hraloua tapoa kou Amor maivei deichitao alia süpehao hinou buyu Jordan Deikho, reilo buyu deichitao ae deikhotao, khelo kou Mediterranean zaipetao, alia Kanaan ae Lebanon maivei teideitao, ae Euphrat rei adu hi koute taho hrütawo.

⁸ Teidei haitao teitei sü Mapao, Enou neletao puopao Abraham, Isaak, Jakob alia puletao vei tyaosholea hi peilai tea paokhai toue, südonou taho teidei sütaosü polowo.’”

Moses nou Chiku-apei Maitaoye Dolouyu

⁹ Moses nou maikhe mai hi paoe, “Etao nou Sinai Deichi hi buyu phaki Enou neletao hi paoe, ‘Neletaoye khosa-a tayu hai E lalikhei soulou hore.

¹⁰ Neletao Ramai Mapao nou neletaoye teivuh zhoua panou tyaka paloure.

¹¹ Neletao puopao Ramai Mapao nou apaopei khaitouyu thaifüa neletaoye sü panou chu jünou pua zha theli poupalou theo alia shiha peiyu sü soulou theo.

¹² Ana E likhei nou kabüa haizhou koute duyu neletaoye kholou khailaige?

¹³ Neletao lahkuku vei khü thaifüa tsüveiyu mai, dokai aveih mai ae soulousü mai phoupalo, Enou puletaoye panou neletao peikhomai soure donou vahbu thoupeilai.’

¹⁴ ‘Nenou paoyu hai Etao donou veishore’ tea neletao nou ahi chila peie.

¹⁵ Südonou neletao nou khü khü hinou dopapei khaitouyu tsü-aveih ae soulou süyu süthai-apei maitaoye vahbu thoupeie. Enou puletaoye sü kamai-a panou mai theli pei khore donou, kamai-a panou mai kaihli, kamai-a panou mai raingou ae kamai-a panou mai kirou pei khore donou vahbu thoupeie. Süpeinou kamai-a panou vah kukhe-a soure donou Enou vahbu thoupeie.

¹⁶ “Süphaki Enou puletao hisü haibüa soulo tea doupeie, ‘Neletao thaihou-jürai maitao vei chi sü keipeio, alia nevei maitao hrohinou mokhaiyuma shetumai hinou büroyu payu phaki acheche hinou soutaosou chiku peio.

¹⁷ Neletao nou chikuyu phaki soude-souku laimoe, neletao nou taimai chi-a ae adumai chi-a kaozü hinou kupei bailai, mai zhai nou zhuloua ngaopi laimoe, daiolouzü chikuyu phaki chidei nasü Ramai hinou ve-a baie. Hakinou neletao donou tateiyu bulouzü ahi pove-o, Enou keiloua chiku peilai.’

¹⁸ Sübüyu teile hinou neletaoye panou kabüa soulai touyu teitei sü Enou doupeilai.

Kadesh Barnea hinou Reikeih Pomaiye Seitayu

¹⁹ “Etao Ramai Mapao nou kharochi peikhai touyu thaifüa Etao nou Sinai Deichi thaokhaiwua dushoyu ae ngaopisho-a buyu radeiki hinou tachopoa Amor maivei deichiva hinou tapoa ve Kadesh Barnea hi velou louyu phaki,

²⁰ Enou neletao hi paoe, ‘Etao Ramai Mapao nou Etao hi peilai tea apaokhai touyu teidei, Amor maivei deichiva hisü velou loure.

²¹ Zhukhaio, neletao Ramai Mapao nou teidei nasü neletao hi peiwure, neletao puopao Ramai nou apaopei khaitouyu thaifüa tapa teidei sü poloua thaolo, ngaopiso moa chathaiso.’

²² “Ana neletao nou ahi tave haibüa paoe, ‘Etao jünou rai-a reikeih pomaiye seitalai she, sübüa puletaoye panou teidei sü zhuloua ludu talakayu nasü phoupa loulai, ae nuhdu khesü kabüa busa touyu sü sülou laikhe.’

²³ “E-a sünasü veire tea khü chekhei hinou mai alili, mai kiahai sü dopaloue.

²⁴ Puletao nou deichiva buyu nuhtao hinou zhupoa Eshkol deikho hi koute taho zhuta-e.

²⁵ Puletao nou teidei sühinou payu rashi khesü pove ngao-e, alia Etao Ramai Mapao nou Etaoye peire teidei nasü veishore tea dakhai ve paopeie.

²⁶ “Ana neletao nou Ramai Mapao vei kharochi sü züba-a teidei nasü talou polou more.

²⁷ Neletao nou noulealea-a haibüa paoe, ‘Mapao sü Etaoye ngaorayu hinou Ejipt teidei hinou sapa-a baie, Etaoye sü Amor maiye panou southare donou save-a baie.’

²⁸ Etao kabüa teidei sühisü taloulai? Etao nou seitayu reikeih pomaitao nou haibüa paoe, ‘Teidei sühi hrüa buyu maitao hai Etao jünou khoupu hie alia sha-a Etao jünou sho hie; puletao nou hrüa buyu nuhdutao vei bouvo sü rakiva khokhe khaitoue. Süpeinou nuh sütao hisü Anakim tyaosholea mainou hrüa buyu sü ngaoe.’

²⁹ “Ana Enou paoe, ‘Puletaoye sü ngaopiso!

³⁰ Neletao Ramai Mapao nou neletaoye süthai sa-a tapeilai, alia puhnou Ejipt hinou souyu vah neletao nou ngaoyu büa neletaoye donou puhnou reih soupeilai,

³¹ alia pfüpuo mainou nahmai aliye satayu büa radeiki hinou buh haihi koute neletaoye savete peiyu sü neletao-a ngaore.’

³² Haibüa neletao hi paopeiyuma neletao nou Ramai Mapao ye sü louche more.

³³ Puhnou neletao jünou rai-a kheiki mei deka nou sata peie ae heaki teihao deka nou sata peie, alia neletao vei fühao ngaopeie ae neletao nou tare ludu ngaopeia buyuma neletao nou neletao Ramai Mapao sü louchepei more.

Mapao nou Israel Maiye Tudeeyu

³⁴ “Mapao nou neletao vei chipao khesü chouloua rarou shore alia haibüa chaachou souwure:

³⁵ ‘Mai shiyu khaphao haina hai mai ali koute-a panou teidei aveih Enou peilai tea neletao puopao maitao hi paopei khaitouyu hisü panou loulai moe.

³⁶ Jephunneh nahpoutu Kaleb likhei panou teidei sühisü talou ngao-a bailai. Puh ae puhvei nahmaitao hi puhnou velou ngaoyu teidei taosü Enou peilai, daiolouzü puh hai tsüle teitei nou peia Eye louchewe.’

³⁷ Neletaoye donou Mapao nou apei hi-a rarou loure alia ‘E-a panou teidei sühisü loulai more’ tea paore.

³⁸ Ana neye soukha-apeio Nun nahpoutu Joshua louzü Israel maiye süthaisa-a teidei sühisü panou veloulai, puh le soudu peikhaio.

³⁹ “Süthaisü Mapao nou Etao mai hrülai hi paoe, ‘Veishi sümoyu taishoyu nahmaitao, soureih mainou nüpoa tabai shulai tea neletao nou choa buyu puletao nou teidei sühisü loulai, teidei sünasü Enou puletao hi peilai ae teidei sünasü puletao vei souloulai.

⁴⁰ Ana neletao louzü Zai Ho hilova radeiki ludulotha dakhai tabaio.’

⁴¹ “Neletao nou ahi chila peie, ‘Etao hai Mapao nou aetou moyu mah soure! Etao Ramai Mapao nou paoyu thaifüa Etao tapa reih soure donou souda chewure.’ Deichi hilao buyu nuhtao hi tapa reih souyu sü talabai shulai tea choloua neletao mai hrülai nou reih basei sü pokhai touloure.

⁴² “Ana Mapao nou ahi paoe, ‘Tapa reih souso tea puletao hi paopeio, daiolouzü Enou puletaoye salai peilai more, alia reih souyuma puletao ngaoba mainou reih sü veiloua bailai.’

⁴³ Enou neletao hi paopeiyuma, neletao nou choumore. Neletao nou Mapao chi choumoa deichi hi buyu teidei hilosü patare.

⁴⁴ Deichi hilonou hrüa buyu Amor mainou neletaoye sü laivou tounou ngouyu büa ngoulai peie. Puletao nou neletaoye sü Hormah hi koute ngoukou peie alia puletao nou Edom maivei deichi hinou neletao jünou reih veiloure.

⁴⁵ Süphaki neletao nou kra-a Mapao hi dakhai veyu phaki, puhnou neletao paisü chou-a choupei more ae kei-a keipei more.

Radeiki hinou buyu Potao

⁴⁶ “Südonou teile taoli neletao nou Kadesh hinou bue.