NEHEMIAH 9 - SHEEYU BAIBEL (BSI)

Maikhe Mainou Mah Layu

^1-2 Khouh haina vei khoukha kaidai zhou hai Israel maisou nou vejüloua puletao nou mahmo soukhai touyu donou levea-a hatou moa lüh-a veachi paoe. Puletao hai vakou maitao hinou kupa loure, ae puletao nou leveayu vei sheesoua soukousah nou banou loure alia puletao vei pei vasü vounai posho khailoure. Süthaisü puletao vei mahmo ae puletao vei puopaoh maitao nou mah soukhai touyu khesü mah lare.

³ Teilecho asü phali hai Ramai Mapao vei Chikha hai puletao hi phoungao peie, ae süthailo teilecho asü phali hai puletao nou soumah khaitouyu mahmo khesü mahla-e, alia puletao vei Ramai Mapao ye tho-e.

⁴ Lo doku khaitouyu hinou Levi mai haitao nou puletao vei Ramai Mapao hi pai chisho-a veachi paoe: Jeshua, Bani, Kadmiel, Shebaniah, Bunni, Sherebiah, Bani, ae Chenani.

⁵ Süthaisü Levi mai haitao nou maisouye ratho laishe tea nou ku-e: Jeshua, Kadmiel, Bani, Hashabneiah, Sherebiah, Hodiah, Shebaniah, ae Pithahiah. Puletao nou haibüa paoe, “Tashu laloua neletao vei Ramai Mapao ye paosho khaio; puhye teisa nou paosholo! Deiphao mainou paoshoyu haio louzü chemoe, anou mai hrülaiye panou puhvei zhih aveih nasü paosho khaio.”

Mah Layu Veachi

⁶ Süthaisü Israel mainou haibüa veachi paoe: “Oh Mapaowo, ne likhei Mapao sü baie; nenou raki ae tei hi vutao hai soupeie. Nenou dei ae zai alia sühinou buyu na veishi hai soupeie; nenou sütao veishi hi hrirai thoupeie. Rakiva khouko khenou neye nakou khurüwe ae thowe.

⁷ Oh Ramai Mapaowo, nenou Abram ye sü doloue ae puhye sü Babilon teidei hi buyu Ur nuhdu hinou süthaisa-a papeie; nenou puh zhih sü Abraham tea sadapeie.

⁸ Nenou puh hai chilee chechewe touyu süloue, ae nenou puhye koa vo soupeie. Nenou puhye Kanaan maivei teidei, Hit maivei teidei, Amor maivei teidei, Periz maivei teidei, Jebus maivei teidei, ae Girgash maivei teidei hai puhvei tyaosholea hi peilai tea chaachou soupeie. Nenou apaokhai touyu nasü souvete peie, daiolouzü ne hai cheche-e.

⁹ “Eh puopaoh mainou Ejipt teidei hinou veahoyu sü nenou ngao-e; Zai Ho hinou soukha peio tea khoyu pai sü nenou kei-nou peie.

¹⁰ Nenou Pharaoh pei hi, puhvei peikho maitao hi, ae puhvei teidei hi buyu mai hrülai hi khupayu vah haso khesü soungao peie, daiolouzü puletao nou nevei maitaoye souvea peiyu hai nenou ngao-e. Zhou koute ne zhih tayu hai nasü nenou veiloue.

¹¹ Nevei maitaoye panou tare donou zai hisü nou nenou ludu soupeie ae dei theyu hinou puletaoye nenou süthaisa-a tapeie. Puletaoye thaihu tayu maitaoye sü zai hi chuh alinou leitayu büa maotha khaiwure.

¹² Hea teile hi nenou puletaoye teihao panou sa-a tapeie, ae khei teile hi mei nou ludu ngaopeie.

¹³ Nenou raki vanou Sinai Deichi hisü takou peie, nevei maitaoye nenou kea peie, ae puletao hi veishoyu chikha ae kharochi khesü peie.

¹⁴ Nenou puletaoye sheeyu Soteithe nasü reilo tea paodou peie, ae nevei kilai Moses ye panou nevei chikha khesü puletao hi peie.

¹⁵ “Puletao nou hou züyu phaki, nenou puletaoye sü raki vanou raokhao seikou peie, ae puletao nou reiyu phaki nenou chuh hinou dzü sü peie. Nenou puletao hi peilai tea apaokhai touyu teidei nasü talou polouo tea paopeie.

¹⁶ Ana Etao vei puopaoh maitao hai khaophu souloure ae rochi sholoure alia nenou kharochi peiyu khesü zübare.

¹⁷ Puletao nou paochi zübare; puletao hai nenou soupeikhai touyu vah haso khesü ngaiwure; nenou khupayu vah soupeikhai touyu khesü puletao nou ngaiwure. Puletao vei khaophu hinou puletaoye süthaisa-a Ejipt hi dakhaiho maivei qila soure donou süthai-apei maiye sü dopa loure. Ana ne hai khailu peiyu Ramai-e; ne hai maiye zhuvea leshi süyu Ramai-e, lekha rarou haha chamoe. Nevei zhuveayu hai dusho-e; nenou puletaoye sü thaokhai toumoe.

¹⁸ Puletao nou bashara ali hai chotoutu zhai hinou souloure ae rah sünanou puletaoye Ejipt teidei hinou sapa peie tea paore! Oh Mapao, puletao nou neye daizhou koute hraongu sü soupeie!

¹⁹ Ana nenou puletaoye sü radeiki hinou thaokhai peimoe, daiolouzü nevei zhuveayu hai dusho-e. Puletaoye hea-khei süthaisa-a tapeiyu teihao ae mei nasü nenou puletao hinou povai pota peimoe.

²⁰ Nevei zhai aveih hinou puletaoye panou dai-e soulai touyu khesü nenou paopeie; nenou puletaoye sü manna nou vaipeie ae puletaoye panou kere donou dzü sü peie.

²¹ Puletao nou rekounou po raidai ta-a buki sasü nenou puletaoye touso peie; puletao vei sabanü sü panou shitakhai moe, ae puletao vei phi sü panou maa-a soumoe.

²² “Nenou puletaoye panou puletao vei teidei nghia buyu tyahrütao ae vedeitao jünou reih veiloue. Puletaoye panou Sihon nou khasa-a buyu Heshbon maivei teidei, ae Og nou veo soua buyu Bashan maivei teidei sü reih koloue.

²³ Ratei hi buyu teivuh zhoua nenou puletaoye sü toudzü hai peie, ae nenou puletao vei puopaoh maitao hi peilai tea apaokhai touyu teidei nasü puletaoye panou reih veiloua teidei sühinou buloue.

²⁴ Puletao nou Kanaan maivei teidei sü poloue; ae sühinou hrüa buyu maitao jünou reih veiloue. Nenou nevei maitao hisü Kanaan teidei hinou veo maitao ae sühinou hrüyu maitao hi sounü soulou süyu khouko hai thoupeie.

²⁵ Nevei maitaoye panou kaopo veisho-a soukhai touyu nuhdu khesü poloue, veishoyu teidei, thoudzü phoutao-a buyu kitao, dzükhao heche khaitouyu, oliv süübe, rashibe, ae kipei khesü panou poloue. Puletao nou tounüyu veishi hai panou touloue ae puletaoye panou hrübo hai veishoa hrüe; nenou puletao hi haveih peikhai touyu teitei hinou puletao hai savasho-a nou bure.

²⁶ “Ana nevei maitao nou ne chi züba-a khaityare; puletao nou nevei Chikha khesü thaifü bare. Ne hi dakhai velo tea puletao hi paopi peiyu nevei rachipaola peiyu maitaoye sü puletao nou datha peie. Puletao nou neye sü tobai soumoa paoshi peie,

²⁷ südonou nenou puletaoye sü panou ngaobayu maitaoye reih veiloue ae puletao vei khakhe hinou pa hrüe. Puletao nou veahoyu hinou ne hi soukha sü kho-e, ae nenou puletaoye sü rakiva nou chila peie. Nevei dushoyu zhuvea hisünou puletaoye süthai-apei maiye seive peia puletaoye ngaobayu maitao hinou khailupa peie.

²⁸ Puletao nou kaona-a soyu ngaolou khaie, mahmo khesü soutapure, ae nenou puletaoye sü ngaobayu mai bah hi thaothou peie. Ana puletao nou ledaloua ne hinou veachi pao-a soukha khoyu phaki, raki vanou nenou puletao vei akho sü kei-nou peie ae nevei dushoa zhuveayu hinou tobai soumoa puletaoye sü khailupa peie.

²⁹ Nenou paodou peikhai touyu khesü panou zü loure donou puletaoye paopi peie, nevei Chikha züyu hai hriloure ludu nasüe, ana puletao nou khaophu souloua nevei chikha khesü malaiwure. Puletao nou rochi sholoua ne chi zübare.

³⁰ Po taoli hai nenou heamea poa nou puletaoye paopi peie. Rachipaola peiyu maitaoye panou puletaoye paodou peie, ana nevei maitao nou sükhesü keipei bare, südonou puletaoye sü nenou tyahrü kukhe maitao bah hi thoupeie.

³¹ Anou nevei zhuvea leshiyu hai dusho-e, nenou puletaoye thaopei moe moa souha peimoe. Ne hai zhuvea leshi süshoyu Ramai-e!

³² “Oh Ramai, Etao vei Ramai, ne hai daizhou koute dusa! Ne hai daizhou koute ngaopi-e, daizhou koute khouko bue! Vo soukhai touyutao hai newo louzü chilee cheche-a souvete peie. Assaria maivei veo maitao nou Etaoye souvea peiyu teile hinou poa zhou koute hai Etao nou veaho-a nou bue! Etao vei veo maitao, süthai-apei maitao, napao maitao, ae rachipaola peiyu maitao, Etao vei puopaoh maitao, ae Etao mai hrülai nou veaho sho-a nou bue. Etao nou daizhou koute veaho-e touyu khesü licho peio!

³³ Nenou Etaoye tudee peiyu hai kaozü hinou soupei-a baie, Etao nou mahmo souyuma, newo louzü chilee cheche-a baie.

³⁴ Etao vei puopaoh maitao, veo maitao, süthai-apei maitao, ae napao maitao nou nevei Chikha khesü zümore. Puletao nou nevei kharochi ae paodou peiyu khesü keipei more.

³⁵ Nevei maitao hi veishoyu teidei sü nenou peie, ae nevei shiha hinou veo maitao nou puletaoye khasa-a nou hrüe; ana puletao nou mahmo souyu nasü thaomoe ae nevei kuvah sü soumore.

³⁶ Ana chuo nenou veisho-a peikhai touyu Etao vei teidei hinou Etao hai maivei qila soutare.

³⁷ Etao vei teidei hinou veisho-a peiyu thoudzü khesü veo maitao nou poloure, daiolouzü Etao nou mahmo khesü souwure. Puletao nou Etao hi ae Etao vei kikhaorü hi sounü thaifüa souloure, ae Etao hai veaho sholoure!”

Maikhe Mainou Ae-ao tea Chidei Soulouyu

³⁸ Vepa-a buyu haikhe veishi donou, Israel mai soua buyu Etao nou ae-ao touyu chidei ali hai soulai tea chaachou souloure, ae Etao vei süthai-apei maitao, Levi maitao, ae napao maitao nou puletao vei ae-ao touyu sheeshao nasü thoupeiwure.