NEHEMIAH 6 - SHEEYU BAIBEL (BSI)

Nehemiah ye Soushire donou Shodo Souyu

¹ Sanballat, Tobiah, Geshen ae Etaoye ngaobayu maitao nou Etao nou kivo sü khochewure, anou rokhubomü khesü soucheloumo hie touyu hai chouloure.

² Südonou Sanballat ae Geshem nou Eye Ono vei Deikho nuh ali hinou puhaiye tave daopeio tea kopo maiye seive paopeie. Puletao nou shodo ashi souloua Eye soushi peilai toure.

³ Enou puhai hisü kopomaiye panou haibüa paota-e, “Ewo matsü shoyu vah ali souhie, neletaoye taho daolou hore. Neletaoye taho daore donou avah nasü panou sochao loushie.”

⁴ Puletao nou raibütoua vu adai koute hai kopomaiye ahi seive paoe, ae Enou raibütoua puletao hisü chila hai peiwure.

⁵ Süthaisü Sanballat nou bakha angou chena hai puhvei kilai mai aliye panou seiko nahai mü dakhamoa haibüa rüloua ahi seive-e:

⁶ “Kinapa soua buyu maikhe mainou haibüa pao-a bure tea Geshem nou ahi paowe, süolouzü ne alia Jihudimai nou veo pei hi soureih soure donou kivo sü khowe. Süpei hinou ne hai veo soure donou tuda-a bure,

⁷ ae rachipaola maitaoye panou neye Jerusalem hinou Judah maivei veo soure donou pa shapaopalai tea bure tea paowe. Ko hai khesü Veo nou chouvu zülai, südonou ahai koa tave daoloua kabülai touyu chi phayu kao-e tea Enou ne hi paowe.”

⁸ Enou puh hi haibüa chila peie, “Nenou paoyu chi khesü da-a baie, hai teitei hai lah nenou dahrührüa paopaloua baie.”

⁹ Etaoye panou vah souche louhore donou puletao nou Etaoye soupi peilai tea tewe. Enou haibüa veachi paoe, “Ana Ramai, chuo Eye soukhoupu peio.”

¹⁰ Teile süphaki, Enou taho Mehetabel tyao, Delaiah nahpoutu Shemaiah ye dao-e, puh hai lah puh ki hinou talou hore. Puhnou ahi paoe, “Ahai koa nou Sheeyu Buh Rathoki hinou tutsü talai she, daiolouzü puletao nou neye sü khei teile tarali hinou southare donou velai.”

¹¹ Enou chila peie, “E hai maiye ngaopi-a tutsüa laiyu mai moe. Avei hrirai vupa loure donou E hai Rathoki hinou tutsüa bushulai tea ne tsüchovu? Enou sübüa soulai moe.”

¹² Enou tsü choyu phaki, Ramai nou Shemaiah hisü pao moe, ana Tobiah ae Sanballat nou puhye sü seihla peia panou Eye paopire donou soua baie touyu hai Enou süloure.

¹³ Puletao nou puhye sü ngaloua panou Eye paopi peia mah soure donou soue, ae puletao nou Eye hraongu soupeia panou avei zhih shire donou soua baie.

¹⁴ Enou haibüa veachi paoe, “Oh Ramai, Tobiah ae Sanballat nou souyu vah khesü licho peio ae puhaiye tudee peio. Eye soupi peilai tea buyu rachipaola pfüpai Nodiah ae rachipaolayu kukhe maitao-a ngaipeiso.”

Vah Souche Louyu

¹⁵ Kivo teitei hai teithe raingouahai loua nou Elul khoukha kaingou zhou hai soucheloue.

¹⁶ Etaoye ngaoba-a buyu tyahrütao nou ko haisü choulouyu phaki, puletao hai pah shire, daiolouzü Ramai vei soukha vanou vah hainasü souche loue touyu hai mai hrülai nou süloure.

¹⁷ Kivo soua buyu teile teitei hinou Jihudimai vei süthai-apei maitaoli hai Tobiah hi ko veishi hai rüla peia bue.

¹⁸ Judah hi buyu mai taoli hai puh thaiko-e, daiolouzü puh hai Jihudimai Arah nahpoutu Shekaniah vei tyao-e. Süpei hinou puh nahpoutu Jehohanan nou Berekhiah nahpoutu Meshullam nah naotu paiye nawe.

¹⁹ Maikhe mai hai anghoujü hinoua Tobiah nou vah haso aveih soupei khaitouyu khesü paowe, ae Enou chi paoyu veishi hai taho puh hi paopeiwe. Puhnou Eye soupi peilai tea seiko alao seive peie.