NEHEMIAH 5 - SHEEYU BAIBEL (BSI)

Veaho-a Laiyu Maiye Souveayu

¹ Chuo maitaoli hai, naotu poutu soumoa lah puletao vei thaihou jürai soua buyu Jihudimai hisü vamoa raoloure.

² Daiolouzü kamai-a nou haibüa paoe, “Avei kihikhamai hai nah naotu ae poutu mai taoli bue, südonou touloua hriloure donou Etao hai thou jüpawe.”

³ Kamai-a nou haibüa paoe, “Etao hai hou-zü moa teithe teithe vei touso ngaotou loure donou Etao vei ki-lu ae kipei khesü mai hinou bandha khaiwure.”

⁴ Kukhe maitao nou haibüa paoe, “Veo vei kikha peire donou Etao hai mai hinou pousha sü poloua Etao vei ki-lu nou pousha nasü khapei molouzü polo tea mai hinou pousha sü pou-pao loure.

⁵ Etao-a Etao vei thaihou jürai soua buyu Jihudimai raibütoua baie. Etao vei nahmaitao hai puletao vei nahmaitao büa vei-a baimowu? Ana Etao vei nahmai hai panou maivei qila soure donou zholaiwure. Etao hai haibüa soumolou hore, daiolouzü Etao vei ki-lu hai mainou poloure.”

⁶ Puletao nou vamoa raoyu khesü Enou chouloua raroure.

⁷ Enou vah souta laire tea lela loure, ae Enou peikho maitao ae aduso maitaoye kaomore tea puletao hi haibüa paoe, “Neletao hai lah neletao vei thaihou jürai maitaoye souvea peiwe.” Enou maisouye sü kabülai tea kuve jüloure,

⁸ ae Enou puletao hi paoe, “Etao nou soulou süyu koute hai tyahrü kukhe mai bah hi zhothou khaitouyu Etao vei thaihou jürai soua buyu Jihudimaiye sü Etao nou hrüdakhai louwe. Ana chuo neletao hai lah neletao vei thaihou jürai maiye qila soua hrüloure donou bure.” Süthai-apei maitao hai chi lia paoloure ha-a zei tea bure.

⁹ Süthaisü Enou puletao hi paoe, “Neletao nou soua buyu na hai kaomoe. Neletao hai Ramai chi züa vah kaoyu nasü souyu pha-e. Sükuyu thaio Etaoye ngaobayu vakou mainou Etaoye konülai moe.

¹⁰ Enou avei samai khamai ae Eye donou vah soua buyu maitao hi pousha ae thoudzü hai poupao peikhai toue. Ana Etao mai hrülai nou mai hi pou-pao peikhai touyu khesü khapeio tea kholai mo khe.

¹¹ Neletao hinou pousha moa thou moa zhaoh moa theadzü pou-pao khaitouyu veishi hai khaipeio. Alia teile ali hi neletao nou maivei polouyu dou, darkha kipei, oliv kipei ae ki khesü lukhai peio.”

¹² Süthai-apei maitao nou chila peie, “Nenou paoyu thaifüa Etao nou soupeilai. Etao nou polouyu ki-lu khesü dakhai peiwulai, ae paozho pfüa buyu khesü khopu laimoe.”

¹³ Süthaisü Enou avei khya phupfüa laiyu sah nasü phaloua nou poa süngaoa paoe, “Mai taralia chaachou soukhai touyu nasü pfüthoyu maiye sü Ramai nou haibüa sülai. Ramai nou puhvei ki ae navei buyu veishi sü polai khaiwua halia shokhai peilai moe.” Sühi buyu mai hrülai nou “Amen” tea paoe, ae Mapao ye paosho-e. Maikhe mai hai puletao nou chaachou soukhai touyu thaifüa soupeie.

Nehemiah nou Lahvei Kaozhou Aveih Phoumoyu

¹⁴ Enou Judah teidei khowo soua buyu po kiahai koute hai, süolouzü Artexerxes nou veo soulouyu po shiahai koute sü Enou ae avei kihikhamai nou teidei khoyu mainou toure touso khesü toumoe.

¹⁵ Ajünou rai-a teidei khoyu maitao hai maisouye souvea peie, ae puletao nou tousore donou teithe ali hinou shahu raidai hai powe. Süpei hinou puletao vei kilai maitao nou maikhe maiye sü souvea souchoro peie. Ana Ewo louzü maiye raimoa tyakuvou tea nou soupeie, daiolouzü Enou Ramai ye tsükhouwe.

¹⁶ Enou kivo soushuyu hisü avei khouko teitei nou peia sou-e, südonou Enou avei soure donou kini ali koute-a pojü khai moe. Eye koa babou-a vah souyu mai hrülai nou kivo sü soua baie.

¹⁷ Enou teithetsü hai Jihudimai, süthai-apei maitao, ae pehao hinou hrüa buyu maitao nou ahi veyu hai mai kaihlia raingou phali hai Eye koa vaizho koute-a baie.

¹⁸ Enou teithe ali hinou chode ali, hübo veishoyu zhaotu arou, ae hou taoli hai dathaloua khokou tewe, ae teithe kirou hinou darkha zhaoh ashu tya hai peikoute-e. Ana Enou maikhe mai hai veawe touyu süyu donou teidei khasa-a hrüyu mai ali nou ngaozü natao hai khomoe.

¹⁹ Oh Ramai, Enou maikhe maiye donou tea vah soukhai touyu hai khesü licho peio.