NEHEMIAH 13 - SHEEYU BAIBEL (BSI)

Shetu Maitao hinou Kutayu

¹ Moses vei Chikha hai maisou hi pai chisho-a phoungao peiyu phaki, Amon mai ae Moab mai hai Ramai vei maitaoye koa panou buzholai moe tea chokou ngaoloue.

² Haisü daivanoue toulouzü Israel maitao nou Ejipt teidei hinou tapayu phaki Amon mai ae Moab mainou Israel maiye touso ae dzü hai peibare. Puletao nou soukha peiyu thaosü Balaam ye pousha peia panou Israel maiye chaa peie, ana Ramai nou chaa nasü shiha hi souda thoupeie.

³ Israel maitao nou Chikha Larübvü nasü phoukouyu phaki, puletao nou vakou maiye panou puletao vei meime hi bulou shi-e touyu hai süloua puletaoye sü hulaiwure.

Nehemiah nou Soudakuyu Vahtao

⁴ Rathoki hi kini pojüyu kidetao hai napao Eliashib ye panou zhupeire donou vahbu thoupei khaitoue, ae puhnou Tobiah ye raichoki nou chavei-a nou bue.

⁵ Puhnou kide aduli hai posheela khaitouyu thoudzü, poukai nüvei, Rathoki hi poa vah soure natao, napao maitaoye posheela peikhai touyu natao, ae zha kirou hinou zha ali taith peiyu thou, rashidzü, theadzü ae Levi maitao, lou souyu maitao alia rathoki khoyu maitaoye peire natao khaitouyu kide nasü Tobiah ye panou buloure.

⁶ Teile hai phaki, E hai Jerusalem hisü bumoe, daiolouzü Babilon hi Artexerxes nou veo soulouyu po shiahai kou hai Enou puhye taho daore donou tare. Teile phajütou thaisü Enou veo hinou nouloua

⁷ Jerusalem hisü dakhai vere. Enou dakhai veyu phaki, Eliashib nou Rathoki hi kini pojüyu kide nasü panou Tobiah ye buyu hai ngaoloua khupa shore.

⁸ Enou rarouloua Tobiah vei na veishi hai vakou popa laipeie.

⁹ Süthaisü Enou kidetao hai sousheelo ae rathoki vei natao, thoudzü posheela khaitou, ae meideire poukai nüveitao hai polou khailo tea kharochi peie.

¹⁰ Rathoki hi lou souyu maitao alia Levi mai taoli hai lah puletao vei ki-lu buyu nuh teidei hisü dakhaiho butare tea Enou süloue, daiolouzü maikhe mainou puletaoye peizüyu natao hai peimoyu donou puletao hai hrilou hore.

¹¹ Ramai vei Rathoki nasü maikhe maiye panou ngaophou moyu donou Enou peikho maitaoye züpeie. Enou Levi maitao ae rathoki hi lou souyu maitaoye puletao vei vahbu hi dothou dakhai peie.

¹² Süthaisü Israel mai hrülai nou rathoki vei kini khaiyu buh hisü puletao nou peizüa buyu zha kirou hinou zha ali hai pove peie.

¹³ Kini sütao hai panou zhupeire donou Enou mai haitaoye dothou peie: Napao Shelemiah; larü süveio Zadok; ae Levi puona Pedaiah. Puletaoye soukha peire donou Mattaniah tyao, Zakkur nahpoutu Hanan ye dothou peie. Mai haitao hai tsüle sheesha tea nou vah souyu puletao vei thaihou jürai maitaoye na khesü zhipei-a bailai touyu hai Enou louche-e.

¹⁴ Oh avei Ramai, Enou Rathoki donou ae rathore donou soupei khaitouyu vahtao hai licho peio.

¹⁵ Teile süphaki Enou Israel maitao hai Soteithe zhou koute-a darkhadzü süyu hai ngao-e. Mai taoli hai thoudzü, darkhashi, doushi, ae na tyatyali hai rheisüh phao hinou pfüa Jerusalem hi veyu hai Enou ngao-e. Enou Soteithe zhou hai hanalia zhoso tea paopi peie.

¹⁶ Tair vei nuhdu hinou kamai-a nou Jerusalem hinou hrüwe, ae puletao nou kha ae na tyatyali hai Etao maiye Soteithe zhou zhopeiwe.

¹⁷ Enou Jihudimai hi süthai-apei maitaoye züpeie ae haibüa paoe, “Neletao nou vah ashi souyu khesü zhukhaio! Neletao nou Soteithe hai souzhai soushiwure.

¹⁸ Hai vanou Ramai nou neletao vei puopaoh maitaoye tudee peie, ae nuhdu hai nasü soushi peie. Chua neletao nou Soteithe nasü souzhai peia Ramai vei lekha rarou nasü Israel mai hi povere donou soua bure.”

¹⁹ Südonou Enou nuhdu vei rokhubomütao hai Soteithe koumojü koukhe nou khulo ae Soteithe chemo koute houso tea kharochi peie. Enou avei kilai maitaoye seiho panou Soteithe zhou hana taralia panou pfüvelou more donou kho-e.

²⁰ Huha souyu mai ae na zhoyu mai hai vu ahai asü hai nuhdu vei kivo vakou nou kheiki hai bue.

²¹ Enou puletaoye pi-a haibüa paoe, “Neletao nou vakou nou kho-a buyu hai hamako baie. Neletao nou haibüa soupu louzü Enou avei maitaoye seithoulai.” Süthai hai puletao nou Soteithe zhou vepu more.

²² Enou Levi maitaoye lah sousheeloua taho rokhubomü khesü kholo ae Soteithe hai shee-a khailo tea kharochi peie. Oh Ramai, haina vanoua Eye licho peio, ae nevei dushoyu leshi hinou Eye vupeio.

²³ Teile süphaki Jihudimai taoli hai Ashdod, Ammon ae Moab maipfüye nayu hai bua Enou ngaoloue.

²⁴ Puletao vei nahmaitao hai mai dali nou Ashdod maila raotare ae vakou maivei la soutare, alia lah Etao pfüla hai sümore.

²⁵ Enou puletaoye sü züa nou chaa peie, kamai-a Enou da-a puletao vei peishu koute-a hülai peie. Süthaisü Enou puletaoye panou Ramai zhih hinou puletao ae puletao vei nahmaiye panou vakou maipfüye napulai moe tea chaachou souloue.

²⁶ Enou paoe, “Veo Solomon nou vakou maipfü nayu donou mah sü souta-e. Puh hai tyahrü kukhe maivei veo maitao jünou dupu hie. Ramai nou puhye leshi peia panou Israel mai hrülai pei hi veo sü soupeie, ana puh-a mah sü soutare.

²⁷ Etao-a puh thaifüa vakou maipfü naloua Ramai vei chi züba laiwu?”

²⁸ Joiada hai Napao Peichana Eliashib vei nahpoutu-e, ana puh nahpoutu mai ali nou Beth Horon nuhdu hinou hrüyu Sanballat nah naotu paiye na-e, südonou Enou Joiada ye sü Jerusalem hinou hutawure.

²⁹ Oh Ramai, napao maitao vei vahbu souzhaiyu maitao alia neye koa vo soukhai touyu napao maitao ae Levi maitaoye licho peio.

³⁰ Sübüa Enou puletaoye vakou mai hinou soushee peie, ae Enou napao maitao alia Levi maitao nou soupfüre vahtao hai-a soushee peie.

³¹ Enou teile macha hinou posheela khesü poa mei deire süütao, ae potei hi ngaolou raikayu thoudzü ae shinamara hai pove peire donou souda khaipeie. Oh Ramai, Enou souyu vah hai khesü licho peio.