NEHEMIAH 1 - SHEEYU BAIBEL (BSI)

¹ Hakaliah nahpoutu Nehemiah nou souyu vah khesü haitaoe. Artaxerxes nou Parsia hi veo soulouyu po kai payukou Kislev tea kuyu khouh hisü Nehemiah, E hai Susa nuhbei hinou bue.

Nehemiah nou Jerusalem donou Levea-a Tsüchoyu

² Hanani touyu athaihou mai ali nou Judah teidei hinou kamai-a sapoa ahi ve-e. ae Enou puletao hi hukhamai soua nüpoa tamoyu Jihudimai ae Jerusalem sü kabüa nou bue tea noue.

³ Puletao nou ahi haibüa chila peie, “Soureih mainou nüpoa talou moyu maitao hai veashoa nou ae hraosho-a nou bure. Jerusalem vei kivo khesü pepo takhai toure ae rokhubomü khesü meidei laikhaiwure.”

⁴ Enou ko hai khesü choulou khaie, kou chobuloua kra-a bure. Teithe taoli hai Enou dopfüa halia toumoa lüh-a nou bue ae Ramai hi Enou haibüa veachi paoe,

⁵ “Rakiva buyu Ramai Mapaowo, ne hai dusho-e, ae Etao nou neye sü ngaopi-e. Neye leshiyu mai ae nevei kharochi züa buyu maitao hisü nenou vo soukhai touyu nasü chilee cheche-a souvete peie.

⁶ Enou nevei kilai, Israel maitaoye donou hea-khei veachi pao-a buyu avei veachi sü kei peio ae Eye zhupeio. Etao Israel mainou mah soukhai touyu khesü Enou ne hi mahlawe. Avei puopaoh maitao ae Enou mah sü souwure.

⁷ Etao nou ne nghoujü hinou mah khesü soushowure, ae nevei kharochi alia ne kilaio Moses hinou peikhai touyu nevei Chikha khesü zülo more.

⁸ Chuo nenou nevei kilaio Moses hi paokhai touyu nasü licho peio: ‘Israel maitao nou ahi chilee cheche molouzü, Enou neletaoye sü tyahrütao hrohi sourarou laiwulai.

⁹ Ana neletao nou ahi dakhai veloua Enou peikhai touyu chikha khesü souloure touyu thaio, Enou neletaoye deiphao akhai hi huve khaitoua buyuma, Enou neletaoye panou Eye thore donou dopakhai touyu buh, neletao vei teidei hisü sa-a dakhaive peilai.’

¹⁰ “Oh Mapao, mai haitao sü nevei kilai, nevei maitao baie. Nenou puletaoye sü nevei khouko sünou khailupa peikhaitoue.

¹¹ Südonou avei veachi ae neye tsükhoua buyu nevei kilai maitao nou paoyu veachi sü kei-nou peio. Zhou teithe Eye veilouyu nasü peio ae veoye sü panou Eye zhuveayu sü soupeio.” Teile süphaki E hai veo vei kuvah soua puhvei pai hai pola-a nou bue.