NAHUM 3 - SHEEYU BAIBEL (BSI)

¹ Iyaho! Zhe kükou shoyu nuhdu, Dayu alia mai na saoyu nou phoutaoa ae vah ashi souyu akhai hayu nuhdu.

² Keikhaio, sürah dayu kho, rheiluki phi veiyu kho, rhei nou tuyu alia rheiluki nou sheyu khosü!

³ Rhei pfümai nou hupoa kouyu, khoche peiyu alia heung reivavayu, southa khaitouyu khe, khokhai touyu thaiphao, khai hanou thaiyu pfüphao- puletao nou thaimai phaonou phisü louwe.

⁴ Hai veishi hai hrüshia khakhayu donoue, puhvei hüvei moyu alia maishu-zhai souyu tyahrü alia maikhe maiye zhotouyu kipaopai nou khakha vah sü jüpae.

⁵ “Zhukhaio, E ne hi aetimoyu bue,” teanou hrülai peinou buyu Mapao nou paoe, alia ne nühsü ne pah hi laokhe khaipeilai; alia nenou baitoua buyu nasü panou tyahrü kukheye zhulai ae veteidei khemai pa nevei hraosü sülai.

⁶ Enou ne hisü ngaorayu ashi laikhai peilai, alia Enou neye ngaophou moyu vah sou peilai, ae mainou pa neye khupa-a zhuteiyu souwulai.

⁷ Alia neye ngaolouyu mai hrülaiye panou pia tutalai alia haibüa paolai, “Nineveh sü soushi souhawure, thaonou puhye donou dopfü peilai? Duki Eh puhye le sousa peimai phoulai?”

⁸ Nineveh, ne Thebes nuhdu jünou veihpu hiwu? Puh hai Ejipt maivei Nail reipe hinou bue, dzünou sühao-a bue, puh kaoro sü zai-e alia dzünou puhvei kivo soua bue.

⁹ Ethiopia sü puhvei khoukoe, Ejipt hai-a louwe, alia puhvei khouko sü akhai hae; Put ae Libia mai sü puhye soukhayu mai-e.

¹⁰ Ana puh-a pota baire, puhye sü mainou nüpoa tare; ducho teitei hinou puh nah khemai sü taida-a soude souha peie; tsükhou shoyu puhvei maitao koutea poa rako zhue, alia dushoyu puh mai khesü hurai nou phuloue.

¹¹ Ne-a zhaoh shozhilai, ne-a tsü talai, alia ngaobamai bah hinou bailoure buh phoulai.

¹² Nevei reih khoyu buh buyu nuhdu khesü doushi mei arai soua buyu doube büa baie; mainou ngupei shoko-o, toure mai mü hi dekouh loua bailai.

¹³ Zhukhaio, nevei reihme haio neletao hrohinou naotumai büe, nevei teidei romü khesü neletaoye ngaoba mai hi houpha papei khaitoue; neletao vei kikhu khesü meinou deiwure.

¹⁴ Mainou nuh hi hulouyuki kere dzü soudalo, nevei reih khoyu buh sü soukhou pulouo, nai talouo, khoushoyu naike soure donou taideilo, soukhai touyu naike sü polouo.

¹⁵ Sühinou neye meinou deihawulai, khoche nou neye daodelai. Khazü nou pouhou toulouyu büa neye souhawulai. Khazü alia khatsüku büa neletao poupalouo.

¹⁶ Neletao vei husouyu mai hai teivu jünoua poua bue, ana chuo puletao hai khazü nou shou hepa loua yaotayu büa hatare.

¹⁷ Neletao vei vemai nahpoututao sü khaikhre büe, neletao vei hasü maitao hai khazü nou tei kao-a buki bouvo vanou taoloua teinghi pakhaie daiki yaotare touyu hai mai linoua sümoyu büa baie.

¹⁸ Oh Assaria veo, nevei zhaokho maitao hai zhitare; ne khenou vah adu souyu maitao hai zhitei tare. Nevei maitao sü mai linoua kujü peire mai ha-a nou deichi khonou ramacha takhai baire.

¹⁹ Zhikhai touyu nahai hasou kilia souveih louhore, ne zhimü nasü shisho loure. Nevei ko keilouyu mai hrülai nou asa-a bah taore, Daiolouzü nenou soushi souvea peimoyu mai thao bue?