NAHUM 1 - SHEEYU BAIBEL (BSI)

¹ Chipao haitao hai Nineveh donou Elkosh puona Nahum vei zho kounou ngaoyutao-e.

Nineveh pei hi Mapao nou Rarouyu

² Ramai hai puhye hraiyu mai hi healou hoyu alia khürüyu Mapao-e, Mapao hai khüphouwe alia lekha shiwe, Mapao hai puhye hraimai hi khü phoue alia puh ngaoba maiye lekha rarou nou soushi peiwe.

³ Mapao hai shososoua lekha baiwe ana khouko dushoe, alia Mapao nou hatakilia mahye soushee moa phapei louhoe. Puh ludu hai rürai alia teikhai raroshi hinou bue, alia teihao hai Puh phi hi nai khao-e.

⁴ Puhnou zai hi kharochi peikhaige, süna hai theta baiwe, Bashan alia Karmel hai-a kitare, alia Lebanon hi poupa khea raitare.

⁵ Deichi khea puh nghoujünou nguwe, alia deitao khea dzükü tawe, dei-a puh nghoujü hio shita baiwe, deiphao alia sühi hrüa bumai hrülai nou pinguwe.

⁶ Puh vei rarou nghoujü hi thaonou lalou süe? Souhyu puhvei lekha nasü thaonou healou süe? Puh lekha sü mei büa lakou peilai, alia puhnou chuhdu nasü dakhosa peilai.

⁷ Mapao hai veishoe, kaozhoushi veyu phakia khoushoa bailoure bue; Puh hinou bailou maisü puh nou khupeie.

⁸ Ana puhye hraiyu maisü dzüdu veyu büa souhakhai bailai, ae puhye ngaobayu maisü azhi hi ngouthouwu bailai.

⁹ Neletao daisounou Mapao ye ba-a duwe? Puh nou souhazhi bailai dao; Puhye hraiyu mai linoua vu ahai lashu puhye dulou tyamoe.

¹⁰ Rai-shuhro nou vaolouyu büa, alia rouvao büa puletaoye sü deiwulai.

¹¹ Neletao hrohinou Mapao pei hi hashi soupeilai tea do-ashi phouyu alia paoshia duyu mai pamowu?

¹² Mapao nou haibüa paoe, “Puletao nou khoushoa alia mai poushoa buyuma, puletaoye sü daodea alia souhalai bailai.

¹³ Alia chuo, E nou puletao vei phaodao sü neletao hinou daphe laiwulai ae neletao ye phukhai touyu rai nasü soude peilai.”

¹⁴ Neletao ye donou Mapao nou kharochi peiwe, “Ne zhih sü panou süpulai moe, neletao vei bashara ki hinou daokhai touyu zhu alia kukhai touyu zhu khesü Enou souhalai.”

¹⁵ Zhukhaio, deichi pei vanou ko aveih pove peiyu nasü laire, kaonayu ko shapao peiyu na phihea sü daizhou koute veisa! Nevei khonüh sü reilou khaio, Oh Judah, nenou chaachou soukhai touyu nasü souve telouo, daiolouzü maishi mainou neletaoye sü reih soupu laimode; puletaoye sü souhakhai touwure.