MIKAH 4 - SHEEYU BAIBEL (BSI)

Mapao nou Teideiphao Veishi Kaona-a Khasa-a Hrülaiyu

¹ Vere teithetao hisü Mapao vei Rathoki buyu deichi nanou deichi kukhe jünou kukalai, deichi veishi jünou kukayu nasü soulai. Tyahrü khenou hai hisü zhapoa nou velai,

² ae puletao nou haibüa paolai, “She, Mapao vei deichi vasü talai khe, Israel maivei Ramai Rathoki hisü velai khe. Puhnou Etaoye puhnou jüpayu nasü doupeilai; Puhnou dopa khaitouyu ludu hisü Etao nou talai. Daiolouzü Mapao vei chipao hai Jerusalem hinou vewe; Puhnou Zion hinou puhvei maitaoye chaku peiwe.”

³ Puhnou tyahrütao vei chiku peilai, ae puhnou khouko buyu tyahrü veishi vei chilou khesü kupeilai. Puletao vei khoche sü hubao poa soulai, ae puletao vei ngheu sü poa tatayu shi souwulai. Tyahrü khenou soureih hai soupulai moe, soureih soure donou tudapu khailai more.

⁴ Mai hrülai nou kaona-a bua bailai, linaonao vei darkha peida ae doushibe hinou kaonaphi tea hrülai, ae puletaoye halinoua soupi laimoe. Haisü Khoukhoulai Mapao nou paoh peiwure.

⁵ Tyahrü hrülai nou lahkuku vei rah sü thowe, ana Etao louzü teisa nou Etao Ramai Mapao chi züa puhye tho-a bailai.

Vakou Nüpoa Tayu Israel Maitao nou Dakhai Vere

⁶ Mapao nou paoe, “Phibah shimai, ae vakou hulai khaitouyu mai, ae Enou souvea peikhai touyu maitaoye save jüpeire teithe nasü velaire.

⁷ Puletao hai shovaire ae ki hinou kadou sho-a tare, ana ki thaowua vakou tayu maitaoye Enou hrü ashu panou hrütalai, ae duso shoyu tyahrü ali soupeilai. Süzhou sü Mapao nou puletaoye teisa donou Zion Deichi hinou khasa-a hrülai.”

⁸ Jerusalem, neye sü Ramai nou zhaokhowo ali büa puhvei maitaoye sü khopeilai, ae neletao vedei vei nuhbei ali soupu peilai.

⁹ Neletao daisounou shusoua krawe? Neletao daisounou nah nalaiyu phaki khya souyu büa bue? Neletao vei veo sü harevu, molouzü neletaoye paodou peire mai hadou?

¹⁰ Jerusalem hi maitaore, naotumai ali nou tounah nare phaki souyu büa neletao sü lüa nou dakhaio, daiolouzü chuo neletao hai nuhdu sü thaokhaiwua hihro vaohro hinou ho hrüta laire. Neletao nou Babilon hisü tawulaire, ana sühi hoyuma Mapao nou neletaoye sü ngaoba maitao hinou vupeilai.

¹¹ Tyahrü taoli nou tave jüloua neletaoye dure donou bure, ae puletao nou haibüa paoe, “Jerusalem sü soushilai deinou shire! Etao nou nuhdu hai nasü haka-a shitayu sü zhulai.”

¹² Ana Mapao nou tsü choyu nasü puletao nou sümoe. Puletao nou tave jüa buyu hai routhoube taosü thai hi dathoure donou pove jükhai touyu raibütoua puletaoye tudeere donoue touyu nasü puletao nou sümoe.

¹³ Mapao nou haibüa paoe, “Jerusalem hi maitaore, taho neletaoye ngaobayu maitaoye sü tudee peikhaio. Enou neletaoye sü hu nou kai soukhai touyu ae baosahu nou phimou soupfüyu chode ali büa soukhouchi peilai. Nenou tyahrü taoli hai sousasa peilai, ae zhaipou shiyu hinou pojükhai touyu nangi khesü teideiphao veishi vei Mapao ahi pove sheela peilai.”