MIKAH 1 - SHEEYU BAIBEL (BSI)

¹ Jotham, Ahaz ae Hezekiah nou Judah hi veo souyu phaki, Moresheth puona Mikah hi Mapao vei chipao hai Samaria ae Jerusalem vanou haibüa ve ngaopeie.

Samaria ae Jerusalem donou Dopfüa Kouliliyu

² Tyahrü hrülai, haisü keilo; Deiphao hi hrüa buyu hrülai, haisü keinoulo! Ramai Mapao nou neye sü paoduka peilai, Mapao nou puhvei sheeyu rathoki hinou paolai.

³ Zhukhaio, Mapao nou puhvei sheeyu buh hinou tavelai; ae puhnou takouloua deichi peitaoh hisünou talai.

⁴ Süthaisü deichitao hai puh khehinou laiphoro ali hai mei hinou dzü kütayu büa küta bailai; ae puletao nou deikho hisü kü koulai, deichi vanou dzü lakouyu büa koulai.

⁵ Haibüa nou vepakhai toulai, daiolouzü Israel maitao nou mah soure ae Ramai chi zümoa khaityare. Israel maitao nou khaityayu sü thao hi paoka laige? Puletao vei nuhbei Samaria nou baie! Judah teidei hi bashara ye thota-a mah souyu sü thaonoue? Jerusalem nou baie!

⁶ Südonou Mapao nou haibüa paoe, “Enou Samaria sü soushikhaiwua panou houshi laikhaiyu buh ali soupeilai, ae panou darkhabe kipei souwulai. Enou nuhdu hinou poa deikho hi koute sü houshi laikhai peilai, ae puhvei beikhei sü panou sakhai-a bulai.

⁷ Puhvei bashara khesü dakhosa sawulai, rathoki hi khakhapfü taoye peiyu na veishi sü mei nou deihalai, ae bashara teitei sü souhalai. Daiolouzü Samaria nou hai khesü taimou panou veiloure donou pojükhai toue, ae chuo ngaobamai nou sütao sü khakhayu rathoki kukhe hisü pove khaiwulai.”

⁸ Süthaisü Mikah nou paoe, “Hai vanou E dopfüa kouli lilai. Enou leveayu sü soungao-a aphi sakhai-a talai. Lakhao nou rayu büa ae ostrik rehou nou rayu büa Enou dopfüa kralai.

⁹ Daiolouzü Samaria vei zhimü souveilou hore; ae Judah-a sübütoua veaho laire; haisü avei maitao nou hrüa buyu Jerusalem vei rokhubomü hi vere.”

Ngaoba Mainou Jerusalem hi Velouyu

¹⁰ Haisü Etaoye ngaobayu Gath hi buyu maitao hisü paoso, puletaoye panou nenou krayu sü ngaolouso. Beth Leaphrah hi maitaore, neletao nou levea-a dopfüyu sü konai hinou lah danakhaio.

¹¹ Shaphir hinou hrüyu maitao, baitou toua ae hraongu pfüa vakou tawo. Zaanan hi hrüyu mai nou vakou tapalou hore. Beth-Ezel hi mai nou dopfüa krayu sü choulouyu phaki, nenou sühisü tuchü loure buh hare touyu sü süloulai.

¹² Maroth hi hrüyu mainou teile aveih nasü vere vuzhi shoa nou bue, daiolouzü Mapao nou veahoyu nasü Jerusalem nghitei-a nou pove peire.

¹³ Lakhish hinou hrüa buyu maitao, rhei khesü rheiluki hi khipalo; daiolouzü neletao hai Israel mainou mah souyu khesü douloua Jerusalem ye panou mah soutare.

¹⁴ Südonou chuo Judah hi maitaore, Moresheth Gath nuhdu sü vei-a buo tea akhai chi paopeio. Israel hi vemaitao nou Akzib nuhdu soukha peiyu sü ngaopulou hore.

¹⁵ Mareshah hinou hrüa buyu maitaore, Mapao nou neletaoye sü ngaobamai bah hi thoupeiwu laire, ae puletao nou neletao vei nuhdu khesü poloulai. Israel maivei süthai-apei maitao hai Adullam lyaqulu hinou tuve tutsülai.

¹⁶ Judah hi maitaore, neletao nou leshi-a buyu nahmaitao donou dopfüa nou pei sailai-o. Neletao vei pei sü rashopeiki vei pei büa sai-o, daiolouzü neletao vei nahmaitao hai hukhamai soua vakou nüpoa ta-a bailai.