MATHIU 7 - SHEEYU BAIBEL (BSI)

Kukhemaiye Chikuyu

¹ “Neletaoye chi kumore donou maiye chikuso,

² daiolouzü neletao nou maiye chikuyu zhaibüa neletaoye chikulai, alia neletao nou maiye douyu sünanou neletaoye doulai.

³ Südonou lah ne nghithouhi houngh louyu nasü popare romoa daidonou ne thaihou jürai nghithouhi louyu houngh nasü zhuwe?

⁴ Kabüa nenou, ne thaihou jüraihi, ‘Eye panou ne nghithou hinou houngh popalouwo,’ tea khuvei-a paoloulai?

⁵ Aveikho souwo! Raia lah ne nghithou hinou houngh nasü popalouwo, alia süthainou nenou ne thaihou jürai nghithou hi louyu houngh nasü popaloure donou sheetoua ngaolai.

⁶ “Sheeyu na nasü seitao hi peiso; peilouzü puletao nou reiveloua neletaoye dushulai. Neletao vei sana muhtei nasü votao nghojü hi polai khaiwuso; laikhai louzü puletao nou sütaosü phinou taina-a bailai.

Khowo, Phouwo, Khouwo

⁷ “Khokhaio, alia süsü neletao hi peilai, phoukhaio, alia neletao nou ngaoloulai; houkhaio, alia süsü neletao hi houthou peilai.

⁸ Daiolouzü khoyumai talinou ngaolouwe, alia phouyumai talinou ngaolouwe, alia khou-a buyu puh hisü houthou peilai.

⁹ Neletao hrohi puomaitao thaohnou puh nahpoutu nou raokhao khoyuki chuhnou peilai?

¹⁰ Moa puhnou khah kholouzü, nghounou puh hi peilaiwu?

¹¹ Südonou shi-a buyu neletao koute-a nele nahmaitaohi avei nakhemai peilou sülouzü, kazhou koute koua rakibu neletao Puonou puh hinou khoyu maitao hisü avei nataonou peilai!

¹² “Südonou neletao nou maikhe maiye panou neletao hi soupei nüyu nasü, neletao-a süzhaibüa puletao hi soupeikhaio; daiolouzü haisü razhai ea rachi paolamaitao vei doupeiyu nasüe.

Romü Taihyuna

¹³ “Romü taihyuna hinou taloulo; daiolouzü ha-kare buh hi loure romü nasü kaa-a kaae ea ludu nasü talae, alia sühi talouyu maisü poushoe.

¹⁴ Ana ahrihi loure romü nasü taih-a taih-e ea ludu süsü tateie, alia süna ngaolouyu maisü chie.

Süübe ea Sünavei Thou

¹⁵ “Madayu rachi paolamai taoye leikei-a zhulo; puletao sü vakounou zhukhaie zhaotu zhaibüa neletao hi velai, ana puletao lekhe hiwo louzü chechenou khushoyu nüsei bübaie.

¹⁶ Neletao nou puletao vah hinou puletaoye süloulai. Shube vanou darkha shishilou moe, alia shu hinou doushi shimoe.

¹⁷ Südonou süübe avei talinou rashi avei shiwe, alia süübe shinanou rashi ashi shiwe.

¹⁸ Süübe avei nanou rashi ashi shilou hoe, ea süübe ashina nou rashi avei shilou hoe.

¹⁹ Rashi avei shimoyu süübe taliye sü vilaiwu-a meihi polaithouwu baiwe.

²⁰ Südonou neletao nou madayu rachi paolamaiye puletao vah hinou süloulai.

Ewo Neletaoye Sükhaimoe

²¹ “Mapao, Mapao, tea Eye kuyu mai hrülainou raki Vedei hi velou laimoe, ana rakibu Apuo leli souyu mainou velou bailai.

²² Chikuyu Teithe kisü mai alaonou Ahi paolai, ‘Mapao, Mapao! Nezhih hinou Ehnou rachi paolapa mowu, alia nezhih hinou rashitaoye hulai pamowu, alia nezhih hinou khupa vah lao soumowu?’

²³ Süthaisü Enou puletao hi paolai, ‘Ewo neletaoye sükhai moe; vahshi souyu maitao, neletao Ahinou tawo!’

Tsü Veiyu ea Voyu Kisoumai Ahai

²⁴ “Südonou Achipaotao chouloua züloumai talihai chuhdu vanou ki soukhai touyu tsü veiyu mai sünaye kheihaoe.

²⁵ Alia teinou rükouloua dzünou duve loure, alia teikhainou hüveloua ki sünaye ve hüsho loure. Ana ki sünanou kaotamoe, daiolouzü sünasü chuhdu vanou soukhaitoue.

²⁶ “Ana Achipaotao chouloua züloumo maitaosü vünai phaonou ki souyu avomai sünaye kheihaoe.

²⁷ Alia teinou rükouloua dzünou duve loure, alia teikhainou hüveloua ki sünaye ve hüsho loure ea ki sünasü kaotare, alia ki nasü kaoshisho loure!”

Jisu vei Soulousü Zü

²⁸ Alia Jisu nou chi haitao paocheyu kisü, maisousü puhnou doupeiyu chipaotao vanou khupa loure,

²⁹ daiolouzü puhnou razhai dou-apeimai bümoa soulousü zü bumai alibüa puletaoye doupeie.