MATHIU 4 - SHEEYU BAIBEL (BSI)

Jisu ye Thaoyu

¹ Süthaisü Rashinaye panou thaore donou Jisu ye Rako nou süthaipoa rekouhi tare.

² Alia puhnou hea raidai, khei raidai lüh-a buyu thaisü puhsü houloure.

³ Süthaisü Rashi nanou puh hi veloua paoe, “Ne hai Ramai Nahpoutue toulouzü, chuh haitao hisü raokhao dalouwo tea kharochi peikhaio.”

⁴ Ana Jisu nou chila peie, “Haibüa rüthoure, ‘Emainou raokhao likheinou hrilouhoe, ana Ramai mü hinou paopayu chipao sütao teitei vanou hriloulai.’”

⁵ Süthaisü Rashina nou Jisu ye sheeyu Nuhdu Jerusalem hi saveloua Rathoki kipei dukhahi sapa khaipeire,

⁶ alia puh hi paoe, “Ne hai Ramai Nahpoutue toulouzü, nelah chokoukhaio, daiolouzü haibüa rüthoure, ‘Ramai nou puhvei rakivamai taohi ne vanou kharochi peilai; puletao nou puletao bahnou neye pola peilai, sübüa nephi koutea panou chuh hinou zhuwu laimoe.’ ”

⁷ Jisu nou chila peie, “Haibüa rüthouwu khaire, ‘Nenou ne Ramai Mapaoye thaolaimoe.’ ”

⁸ Süthaisü Rashina nou Jisu ye kushoyu deichi alivahi sapaloure ea puh hi deiphao hi vedei veishi ea sütaovei du-shoyu teitei pongaoe.

⁹ Alia Rashina nou puh hi paoe, “Nenou kou khou khüloua Eye khurü louzü, haitao teitei Enou nehi peilai.”

¹⁰ Süthaisü Jisu nou chila peie, “Tawo, Saitan! daiolouzü haibüa rüthoure, ‘Nenou ne Ramai Mapaoye khurülai ea puhye likheithe nenou kuvah soulai!’ ”

¹¹ Süthaisü Rashina nou Jisu ye thaowu-a tare; alia rakivamai taonou taveloua puhye kuvah soupeie.

Jisu nou Galilee hinou Puh Vah Soushu Tayu

¹² Jisu nou Johanye hukhahi thoure touyu choulouyu kisü, puhsü Galilee hi tare.

¹³ Puh hai Nazareth hinou chao-a bumoe, ana Zebulun ea Naphtali teideihi Galilee zaipehi buyu Kapernahum nuhdu hinou ve hrüre donou tare.

¹⁴ Haisü rachi paolawo Isaiah nou paoyu sü panou vetere donoue:

¹⁵ “Zebulun teidei ea Naphtali teidei, Jordan rei polo dovahi zai ludu hinou buyu, Tahrüh kukhemai vei teidei, Galilee!

¹⁶ Teizhi hinou hrüa buyu maikhemai taonou dushoyu ava ali ngaolai. Athaivei maiyu teidei hinou hrüa buyu maitao pei hisü ava sünanou vapeilai.”

¹⁷ Teile süshonou Jisu nou puh chipaosü paodou shupoa haibüa paoe: “Ledalo, daiolouzü raki vedeisü ngheire!”

Jisu nou Khah Phoumai Adaiye Kulouyu

¹⁸ Jisu nou Galilee zaipe hinou tasühaoa buyu hinou, puhnou khah phoumai china ahai, Simon (Pitar tea kuyuna) ea puh thaihou Andrew nou zaihinou khahbe nou khah phoua buyu sü ngaoe.

¹⁹ Jisu nou puhaihi paoe, “Athai fülo, alia Enou nehaiye mai phoumai panou soulai.”

²⁰ Sübühinou puhai nou puhaivei khahbesü thaowu-a puhthai füloure.

²¹ Alia buh sühinou takhaie puhnou kukhe china ahai, Zebedee nahpoutu Jems ea Johanye ngaoloure. Puhaisü sakhao hinou puhaipuo Zebedeeye koa khahbe nasü khoa bue. Jisu nou puhaiye kue,

²² alia sübühinou puhai nou sakhao ea puhai puoye thaowu-a puhthai fütare.

Jisu nou doupeiyu; Ko paodouyu ea sounou souvei peiyu

²³ Jisu nou Galilee teidei teitei tasühao poa rathobuhtao hinou doupeie ea Vedei vei Ko Avei nasü paodoupeie, alia sounou ea sou tyalinou sou-a buyu maikhemai taoye souvei peie.

²⁴ Südonou puh kohai Suria teidei teiteihi kupoa tare ea maikhe mainou puh hisü lishi-a bumai hrülai, sou tyalinou soua bumai ea sounghei-nghei-a bumai, rashinou louyumai, soura soumai ea pothaimai taoye pove-a puhnou puletao hrülaiye souvei khaipeire.

²⁵ Alia Galilee, Dekapoli, Jerusalem, Judea ea Jordan polo dovahi teideitao hinou mai alaonou puhthai füloure.