MATHIU 28 - SHEEYU BAIBEL (BSI)

Jisu nou Hrishuyu

¹ Chuo Soteithe thaisü, Rathozhou shohna hinou Magdalini Meri ea kukhe Meri pai nou khüh nasü zhure donou tave.

² Alia zhukhaio, sühisü sükhai moa nü süsho loure; daiolouzü raki vanou Mapao vei rakivamai alinou takou loua chuh nasü phaoda laiwure, alia süphaonou kou buloure.

³ Puh zhuhai teipeiyu kue, alia puh sahnü taosü vüra kua kaawe.

⁴ Alia puhye piyu donou khüh khoyu maitaosü nguloure ea thaimai bübaire.

⁵ Ana rakivamai nanou naotumai taohi paoe, “Neletao pikhaiso; daiolouzü kros vanou veatheayu Jisuye neletao nou phoua bue touyu hai Enou süwe.

⁶ Puhwo haihi hare, daiolouzü puhnou paopeiyu büa puh hai hrishure. Haihi takou khaio, puhye pokhaiyu buh nasü zhukhaio.

⁷ Alia chuo thalasou taho puh rozümai taohi, ‘Puhwo athai hinou hrishuloure tea paokhaio, alia zhu khaio, puhwo neletao jünou raia Galilee hi talai; sühinou neletao nou puhye ngaolai!’ Zhukhaio, Enou neletao hi paopeire.”

⁸ Südonou puletao nou piyu ea sashoyu nou phoua khüh hinou thashoa tare, alia puh rozümai taohi paopeire donou tutare.

⁹ Alia zhukhaio, sükhai moa Jisu nou puletaoye tave daoloua paoe, “Kaonalo!” Alia puletao nou ngheiki takou loua ea puh phi kou deiloua puhye khurüe.

¹⁰ Sükisü Jisu nou puletao hi paoe, “Pikhaiso; takhaio ea Athaihou jüraimai taoye Galilee hi tavere donou paopeikhaio, alia sühinou puletao nou Eye ngaolai.”

Khüh Khoyu mainou Taho Süngaoyu

¹¹ Naotumai taonou puletao duhi ta-a bubu kinou, zhukhaio, khüh khoyu reihmai kamai taonou nuhdu nahi dakhai veloua payutao teiteisü napao adumai taohi paongao peire.

¹² Alia napao adumai taonou tsümai taoye koa vedzü loua do phouloure; puletao nou reihmai taohi pousha taoli peire.

¹³ Alia haibüa paoe, “Puh rozümai taonou khei nou taveloua Eletao nou zhia bubu kinou puh pfüphao hai vaoloure tea maikhe mai hi paokhaio.

¹⁴ Alia haina hai Teideikhowo nou choulouzü, Eletao nou puhye paonawulai alia neletaoa ko-a zhoushiyu halia daolaimoe.”

¹⁵ Südonou puletao nou pousha sü poloure ea puletao hi doupeiyu kua souloure; alia ko sünahai zhou koutea Jihudimaitao hrohi kupoa bue

Jisu nou Puh Rozümai Kialihi Ngaopeiyu ea Lütayu Aduna

¹⁶ Alia chuo rozümai kiali taonou Jisu nou puletao hi paopeikhai touyu Galilee hi buyu deichi nahi tare.

¹⁷ Alia puletao nou puhye ngaolouyu kisü, puhye khurüe; ana kamainou lekiloure.

¹⁸ Alia Jisu nou ngheiki takou loua puletao hi paoe, “Raki ea deiphao hi soulousü zü teitei Ahi thoupeiwure.

¹⁹ Südonou takhaio ea tahrüh hrülaiye panou Arozümai souloukhaio. Puletaoye Puo, Nah ea Rako Mashi zhih hinou dzükhao dakhaio;

²⁰ Enou neletao hi chikha peikhai touyu teiteisü züloure donou puletao hi doupeio; alia zhukhaio, maihrü akhai koute Enou neletaoye teisanou koa bue.”