MATHIU 20 - SHEEYU BAIBEL (BSI)

Darkha Kipei hi Vah Soumaitao

¹ “Raki Vedeihai ki paopu alinou shohna hinou tapaloua puhvei darkha kipei hi vah soure maiye zho kutayu büe.

² Puhnou vahsouyu maitaoye nai zhohai denarü alili peilai tea paochewu-a puletaoye panou vah soure donou puh vei darkha kipei hi seitare.

³ Alia puhnou teilecho aküpha hinou vakouhi tapa puyu kisü, mai kukhe kamaisü vah lia soumoa hupobuh nou la-a buyu sü ngaoloure;

⁴ südonou puhnou puletao hi paoe, ‘Neletao-a taho darkha kipei hinou vah soukhaio, alia Enou neletaoye peizüyu zho nasü peilai: Südonou puletao sü tare.’

⁵ Süthai-a puhnou teilecho kiahai ea teilecho asü pha hinou tapapuloua sübüa souloure.

⁶ Alia puhnou teilecho angou phahinou hupobuh hi tapa pukhaiyu kisü sühinou kukhe kamaisü chu koute-a la-a buyu sü ngaoloure; alia puhnou puletao hi paoe, ‘Neletao haihinou heamajü hali-a soumoa la-a buyu hai daidonoue?’

⁷ Puletao nou puh hi chila peie, ‘Mailinoua Ehye zho sapei moe;’ puhnou puletao hi paoe, ‘Sükulouzü veire, neletao-a taho darkha kipei hinou vah soukhaio.’

⁸ “Alia koukhe louyu phakisü, darkha paopuwo nou puhvei peipha-apeio hi paoe, ‘Vah souyu maitaoye kuloua puletao vei zhohai ve nakaiyu taoyenou peiraipoa ve raikaiyu taohi koute peikhaio.’

⁹ Alia teilecho angou phahinou vah soushu tayu maitao nou veyu kisü, puletao maili linou denarü chekhei ngaoe.

¹⁰ Chuo raikaiyu maitao nou zho pore donou veyu kisü, puletaohai ngaokoua lae tea choe; ana puletao-a denarü chekhei ngaobaire.

¹¹ Alia puletao nou puletao vei pousha ngaolouyu kisü, ki paopuwo pei hi nolealealoua paoe,

¹² ‘Nakaiyu mai haitaosü teilecho alikhei vah soubaie, alia heamajü teinai dei-a vah souyu Ehye peiyu büa nenou puletaoye-a peiwe!’

¹³ “Ana puhnou puletao hronou mailihi chila peie, ‘Asana, Ewo nehi soumah moe; nenou nai zhohai denarü alinou ae-ao toubaie.

¹⁴ Chuo nevei zho nasü poloua kihi vetawo. Enou nehi peiyu büa nakaiyu mai hainahi peirehai Avei leli baie.

¹⁵ Enou lah Avei poushahai Aleli thaifüa souloure Azü hawu? Moa Enou maiye ha peinüyu vanou ne nghisüwu?’ ”

¹⁶ Alia Jisu nou akhai soua paoe, “Südonou nakaiyu taonou railai, alia raikaiyu taonou nalai.”

Jisu nou Puhvei Athai vanou Lüh Asü Chena Paoyu

¹⁷ Alia Jisu nou Jerusalem hi tapa-a buyu hinou, puhnou rozümai kiahaitaoye sakupaloua ludu hinou khei-a puletao hi paoe,

¹⁸ “Zhukhaio, Eletao hai Jerusalem hi tapa-a bue; alia sühinou Mai Nahpoutuye sü napao adumaitao ea razhai dou-apei maitao bah hi peithouwulai; alia puletao nou puhye southeare donou mah dukhaiwulai,

¹⁹ alia süthaisü puhye sü Tahrüh kukhemai bah hi peithouwulai ea puletao nou puhye hai konülai, dapeilai ea kros vanou veatheawulai; ana puh hai teithe asüzhou hrishu loulai.”

Pfünou Khoyu

²⁰ Süthaisü Zebedee chapfünou puh nahpoutu haiye koa Jisu hi veloua puh nghojünou kou khou khüloua puh hinou hali vanou zhuvea peio tea khoe.

²¹ Jisu nou puh hi noue, “Ne dai züpawe?” Puhnou Jisu hi chila peie, “Anahpoutu haihai ye panou ne Vedei hinou aliye nebahkha zhoulo va ea liye nebahkha nalova bure donou kharochi peio.”

²² Ana Jisu nou nahpoutu haihi chila peie, “Nelenou dai khosa touyu nelenou sümoe, Enou külaiyu paina hinou nele-a pokülou süwu?” Puhainou chila peie, “Ovai Ehnou pokü lousüe.”

²³ Jisu nou puhaihi paoe, “Chechenou nehainou Apai hinou pokülai, ana Abahkha zhoulo ea nalohi bure süwo louzü Ado moe, buh sütao hai Apuonou souda khaitouyu puletao donou baie.”

²⁴ Alia chi haisü kukhe rozümai kiroutaonou choulouyu kisü puhai china pei hi puletao nou lekha loure.

²⁵ Südonou Jisu nou puletao hrülaiye kuve dzüloua paoe, “Neletao nou süwe süolouzü Tahrüh kukhe maitao pei hi khoyu mainou puletao pei hi paopu soua bue, alia puletao pei hi adumainou puletaoye tukha-a bue.

²⁶ Sütoukhaia neletao hrohiwo louzü sübü laimoe. Neletao hronou maita linou dunü louzü, puhnou kukhetao vei kilai souvu zülai;

²⁷ alia maita linou neletao hrohinou raina sounü louzü, puhye panou neletao vei qila souvu zülai

²⁸ Mai Nahpoutu koute-a sübüa puh hi panou kuvah soure donou vemoe, ana kuvah soure ea puh hrümai hai mai alaovei phapeimuh peire donou vebaie.”

Jisu nou Nghichamai Ahaiye Souvei Peiyu

²⁹ Alia Jisu ea puh rozümai taonou Jeriko thaowu-a tayu kisü, mai alaonou puhthai füloure.

³⁰ Alia zhukhaio, dupe hinou nghichamai ahai chobua bue, puhai nou Jisu hai puhai hilo takoua bushe touyu sü chouloukhaie shusoua raopa loure, “David Nahpoutu, O Mapao, Ehye zhuvea peio!”

³¹ Maisounou puhaiye ngasoua buwo tea züa paopeie; ana puhai nou pai kupuloua paoe, “David Nahpoutu, O Mapao, Ehye zhuvea peio!”

³² Südonou Jisu nou chaoloua puhaiye kuloua paoe, “Eye panou nehaiye donou dai soupeiyu züpawe?”

³³ Puhainou puh hi chila peie, “Mapao, Eh nghithou panou ngaolouwo!”

³⁴ Jisu nou puhaiye zhuvealoua puhai nghithousü kou deipeie, alia sübü hinou puhai nghithousü ngaoloure ea puhai nou puhthai füloure.