MATHIU 18 - SHEEYU BAIBEL (BSI)

Vedei hi Thaohnou Dukae?

¹ Teile süpha kisü rozümaitao nou Jisu hi veloua noue, “Raki Vedei hisü thaohnou dukae?”

² Südonou Jisu nou puh hi nahmai aliye kukouloua, puhye panou puletao tsülehi laloua paoe,

³ “Enou neletao hi chekhaoa paoe, neletao nou dakhailou nahmaitao bümo louzü, neletao hai haki-a Raki Vedeihi velou louhoe.

⁴ Nahtou haina büa lahnou natai louyu maita lisü raki Vedei hinou dukayu nasüe.

⁵ Alia haibüyu nahtou aliye Azhih hinou sasa-a popeiyu maita linou Eye sasa-a popeiwe.

Mah hi Süthouyu Athaotao

⁶ “Maita linou Eye louche-a buyu taikayu haitao hrohinou aliye mah hi süthou peilouzü, mai sünaye donou puh nguhi dushoyu thoupa chuh ali phumutei loua puhye sü thoushoyu zai hi polaithou panou maotheayu sünanou veikouhie.

⁷ Phi süloure athaotao buyu vanou deiphaohai daizhozhou ngaopisa! Daiolouzü haibüyu athaohai veimoa vevu zülai, ana athaoye panou veyu mai sünaye donou daizhozhou ngaopisa!

⁸ “Nebah nou moa ne phinou neye soumah peilouzü, süsü daodewu-a polaiwo; neye donou bah ahai moa phi ahai bua akhaihayu meihi polai thouwuyu jünou, bah polo moa phi polo tou-a ahri buh hi louyu nanou veikou hie.

⁹ Alia ne nghithounou neye soumah peilouzü, süsü reipaloua polaiwo! Neye donou nghithou ahai pfüa meizai hi polai thouwuyu jüwo nghithou alikhei pfüa ahri buh hi louyu nou veikou hie.

Hawuyu Zhaotu vei Nada

¹⁰ “Neletao nou taikayu haitao aliye ngaophou moyu soumore donou zhutoulouo; daiolouzü Enou neletao hi paowe süolouzü rakinou puletao vei rakivamai taonou rakibu Apuo zhusü teisanou zhua bue.

¹¹ (Daiolouzü Mai Nahpoutu nou hawuyu naye sü khaipeire donou ve.)

¹² “Neletaowo daichowe? Mailivei zhaotu kaihli buyu hinou ali hawu louzü puhnou raikükü taoye deichi vahi thaowu-a hawuyu sünaye phoutalaimowu?

¹³ Alia puhnou sünaye ngaolouyu kisü, chekhaoa Enou neletao hi paoe, puhnou hamoyu raikükü sütao jünou alina vanou lesa kousho hie.

¹⁴ Sübütoua taikayu haitao hrohinou ali hayuhai rakibu neletao Puo vei leli moe.

Mah Souyu Thaihou Jürai

¹⁵ “Ne thaihou jürainou nehi mahwu louzü, puh hi taho puh mah nasü paongaokhaio. Ana süsü lah nehai kole hinou khei-a soulouo. Puhnou nehi keipei louzü nenou ne thaihou jüraiye ngaopulou khaire.

¹⁶ Ana puhnou nechi keipei molouzü, chi lapeimai ahai moa asü mü hinou chi veishi sü laloure donou neye koa kukhe ali moa ahaiye salouo.

¹⁷ Alia puhnou puletao chi keipei molouzü, süthaisü chi veishisü lüloumaime hi paongaokhaio; alia puhnou lüloumaime chi koute-a keipei molouzü, puhye panou nehinou Tahrüh kukhemai moa kikha khamai ali bükhaio.

Phuyu ea Pheiyu

¹⁸ “Alia südonou Enou neletao hrülaihi chekhaoa paoe; deiphao nou neletao nou phuyu talisü rakihi-a phuwulai, alia deiphao nou neletao nou pheiyu talihai rakihi-a pheiwulai.

¹⁹ “Enou neletao hi paopuwe; deiphao nou neletao hrohinou mai ahai nou hatali donou le alisoua khozho louzü, sünasü neletaoye donou rakibu Apuonou soupeilai.

²⁰ Daiolouzü Azhih hinou mai ahai nou moa asünou vedzüa buyu hisü, E-a puletao hrohi bue.”

Khaipei Bayu Kilai vei Nada

²¹ Süthaisü Pitar nou Jisu hi veloua puh hinou noue, “Mapao, Athaihou jürainou Apei hi mah soukhaikhai louzü, lüh kizhou Enou puhye khaipeilai? Lüh anaiwu?”

²² Jisu nou puh hi paoe, “Enou nehi lüh anai bailai tea paomoe, ana lüh rainainai nou anailai.

²³ Südonou raki Vedeihai puh kilai taoye koa kini pa-lou chore donou soudayu veomai aliye paonada louveie.

²⁴ Puhnou sübüa chotayu phakisü, puhpao talent sha the kirou püyu kilai aliye puh hi save.

²⁵ Alia puhnou khapeilou hoyu vanou puh vei paopuwo nou puh-a, puh chapfü-a puh nahmaitao-a ea puh vei buyu teitei-a puhpao khaloure donou zholaiwuwo tea puhhi kharochi peie.

²⁶ Südonou kilai sünanou veo nghojünou kou khou khüloua khoe, paopu, ‘Eye donou shamea peilaio, alia Enou nevei teitei khapeilai!’

²⁷ Sühinou kilai sünavei paopuwo nou puhye zhuvea sholoua puh paosü khaipeire ea puhye phapeire.

²⁸ “Ana kilai sünanou tapa louyu kisü puhvei pao denarü kaihli pfüyu puhsa kilaimai aliye vedao loure; alia puhnou puhye niloua ea rao hinou leiloua paoe, ‘Nenou Apao pfüyu nasü khapeikhaio!’

²⁹ Südonou puhsa kilai sünanou deiphi kaokouloua puh hinou khoe, ‘Eye donou shamea peilaio, alia Enou nevei khapeilai!’

³⁰ Ana puhnou baloure ea taloua pao nasü khapei loumo koutesü puhye hukhahi thoure.

³¹ Puh samai kilai kukhetaonou sübüa souyu sü ngaoloua le veasho loure, alia puletao nou taho payu teiteisü puletao paopuhi paongao peire.

³² Südonou puhvei paopunou puhye kuveloua puh hi paoe, ‘Ashi kilaina! Nenou Ahinou khoyu vanou Enou neye Apao püyu teitei khaipeie,

³³ alia Enou neye zhuvea peiyu büa ne-a nesa kilai naye zhuvea peizü mowu?’

³⁴ Alia puhvei paopunou rarouloua puhnou pao pfüyu teitei khapei loumo koutesü puhye tudei peire donou hukhahi thoure.”

³⁵ Alia Jisu nou akhai soua paoe, “Südonou neletao nou neletao thaihou jüraiye neletao vei lekhe hinou khaipei molouzü rakibu Apuonou-a neletao hrülaiye sübüa soulai.”