MATHIU 16 - SHEEYU BAIBEL (BSI)

Pharisee mainou Sheeli Khoyu

¹ Alia Phariseemai ea Sadukimai kamainou Jisu hi taveloua puh zhai zhure donou puhye nou raki vanou sheeli puletao hi ngaopeio tea puh hinou khoe.

² Ana Jisu nou puletao hi chila peie, “Teinghinou loutare phakihi, neletao nou paoe, ‘Tei veilaire; daiolouzü teihai horore.’

³ Alia shohna hisü, neletao nou paoe, ‘Zhou tei shilai, daiolouzü teihai hoe ea bouteie.’ Neletao nou teizhai zhuloua teishih veilaiyu ea shilaiyu rai-a paolou süwe, ana teile vei sheetaowo neletao nou paolouhoe.

⁴ Ashi ea Ramaiye zhodüyu maikhanou shee phoue; ana Jonah rachi paolawo vei shee likhei baimoa sühisü shee kukhe alia peilaimoe.” Südonou puhnou puletaoye thaowu-a tare.

Phariseemai ea Sadukimai vei Kheih

⁵ Rozümai taonou zai polo dovahi tacho palouyu kisü, puletaosü raokhao pfüngaire.

⁶ Jisu nou puletao hi paoe, “Leikeilo; Phariseemai ea Sadukimai vei kheih sü zhutoulo.”

⁷ Alia puletao lah nou, puletao hrohinou haibüa kue, “Puhnou chi haisü Eletao nou raokhao li-a pfülou moyu vanou paoe.”

⁸ Puletao nou pha-a buyu sü Jisu nou süloua puletao hi paoe, “Oh lü taishoyu maitaore, daidonou lah neletao hrohinou raokhao li-a hayu vanou kuwe?

⁹ Neletao chu koute-a sümo hiwu? Enou raokhao pho angou nou mai thengouye donou soukhoyu, alia neletao nou sülai kizhou po kodzüloue touyu sü neletao lichomowu?

¹⁰ Moa mai thedai donou raokhao anai sü kabüre, alia neletao nou sülai kizhou podzüloue?

¹¹ Enou raokhao vanou paomoe touyu hai daidonou neletao nou süloumoe? Phariseemai ea Sadukimai tao vei kheih zhutoulo.”

¹² Süthaisü rozümai taonou puletao hi raohi thouyu kheih vanou moa Phariseemai alia Sadukimai vei doupeiyuna vanou puhnou puletao ye zhutouloure donou tukhabaie touyu hai süloure.

Pitar nou Jisu vanou Du-a Paopayu

¹³ Chuo Jisu nou Kaisaria Philippi teideihi velou louyu kisü, puhnou puh rozümai taohi noue, “Maikhe mainou Mai Nahpoutuye nou thaoh-e tea paowe?”

¹⁴ Puletao nou chila peie, “Kamainou Johan Baptist touwe, kamainou Elijah touwe, alia kukhe mainou Jeremiah moa kukhe rachi paolamai alie tea paowe.”

¹⁵ Puhnou puletao hi noue, “Ana neletaowo Eye nou thaoh-e toue?”

¹⁶ Simon Pitar nou chila peie, “Newo hriyu Ramai Nahpoutu Khristae.”

¹⁷ Alia Jisu nou puh hi chila peie, “Johan nahpoutu Simon, newo rako veishoe! Daiolouzü haihai ke-zhenou nehi pongao peimoe, ana haisü rakibu Apuonou nehi peibaie.

¹⁸ Alia südonou Enou nehi paowe, newo chuh alie, alia chuhdu haina peinou A Church soushu palai, alia sünaye athai koute nou-a koloukhai laimoe.

¹⁹ Enou nehi raki Vedei vei khareih peilai, alia deiphao nou nenou phuyu talihai rakihi-a phukhailai, alia deiphao nou nenou pheipeiyu talihai rakihi-a pheipawulai.”

²⁰ Süthaisü Jisu nou puh rozümai taohi puh hai Khristae touyu hai mai tali hi-a paokhaiso tea soutaosoua kharochi peire.

Jisu nou Puhvei Veayu ea Athai vanou Paoyu

²¹ Teile sühinou shua Jisu nou du-a puh rozümaitaohi paotare. “E Jerusalem hi tavu zülai ea tsümaitao, napao adumaitao ea razhai dou-apeimaitao bah hinou alaosou vea vuzülai. Eye sü southeawulai, ana teithe asü zhousü Ehai hrishuloulai.”

²² Pitar nou puhye sakupaloua ea puhye züa paoe, “Mapao, Ranou balai! Haihai nehi hakia palaimoe.”

²³ Ana Jisu nou thailo reiveloua Pitar hi paoe, “Saitan, Ahinou tawo! Nehai Aphisüre alibaie; daiolouzü nevei tsü haitaohai Ramai hinou vemoe, ana emai hinou vebaie!”

²⁴ Süthaisü Jisu nou puh rozümaitaohi paoe, “Maitalinou Athai fünü louzü, puhye panou lahye laiwuwo ea puh kros sü pfüloua Athai fülo.

²⁵ Daiolouzü maitalia lah puh hrirai hai khailulou nülouzü, süsü halai, ana maita linou Eye donou puh hrirai hai halouzü süsü ngaoloulai.

²⁶ Daiolouzü mailinou deiphao teitei zhiloukhaia puh vei hrirai hai halouzü sünanou puhye donou dai koyu bue? Moa mai alinou puhvei hrirai lealoure donou dai peilai?

²⁷ Daiolouzü Mai Nahpoutu hai puh Puo vei khouko ava hinou puh vei rakivamai taoye koa velai, alia sükisü mai hrülaiye lah lahnou soukhai touyu vahtao thaifüa puh nou buu peilai.

²⁸ Chechenou Enou neletao hi paowe, Mai Nahpoutu nou Veo soua veyu puletao nou ngaoloumo koute thailaimoyu mai kamai buh haihinou la-a bue.”