MATHIU 12 - SHEEYU BAIBEL (BSI)

Jisu nou Soteithe Mapaoe

¹ Süthaisü phasho khaimoa Jisu nou Soteitheki hinou southou doutao tachopoa tae. Alia puh rozümaitao sü houloure, südonou puletao nou southou kotao sü hailoua toutare.

² Ana Phariseemai taonou süsü ngaolouyu kisü, puletao nou Jisu hi paoe, “Zhukhaio, ne rozümai taonou Soteitheki sounouyu sü soua bure.”

³ Jisu nou puletao hi chila peie, “Neletao nou David ea puhmaitao nou houyuki daisousa touyu ko phoukhai mohiwu?

⁴ Puhnou Ramai kihi talouloua, razhai thaifüa puletaoye donou tounoukhaia, ana napaomaitao likheinou toubailaiyu Ramai hi poshee layu raokhao nasü puh ea puhmaitao nou toue.

⁵ Moa neletao nou Moses vei razhai hinou phoumowu süolouzü Soteithe tsühi napaomaitao nou Rathoki hinou Soteithe zhaihai soukho-a bue, sütoukhaia puletaosü mahmoe?

⁶ Enou neletao hi paoe süolouzü Rathoki jünou duyu hali haihi bue.

⁷ Sheeyu larübvü nou paoe, ‘Ewo zhuvea peiyuna züpahie, posheelayuna moe.’ Hainavei kohai neletao sücheche louzü, mah hayu maiye neletao nou paoshiwu paimoe;

⁸ daiolouzü Mai Nahpoutu nou Soteithe vei Mapaowo süe.”

Bah Polo Thaiyu Mailiye Souvei Peiyu

⁹ Alia Jisu nou buh süsü thaowu-a rathobuh alihi tare.

¹⁰ Alia zhukhaio, sühisü bah polo thaiyu maili bue. Sühisü Jisu hai vah soumahre tea mah dukhainüyu mai kamai bue, südonou puletao nou puh hinoue, “Soteitheki sou souvei peiyu zhai buwu?”

¹¹ Jisu nou chila peie, “Neletao hronou mailivei zhaotu ali bua sünasü Soteitheki kaobvühi delou louzü dailai? Puhnou sünaye keloua vakouhi popalai mowu?

¹² Alia mai aliwo zhaotu ali jünou daizhozhou muh kouhisa! Südonou Soteitheki vah avei souyu zhaie.”

¹³ Süthaisü puhnou bah polo thaiyu nahi paoe, “Nebah topalo.” Alia mai sünanou puh bahsü topa loure, alia süsü kukhe alina bütoua veiloure.

¹⁴ Süthaisü Phariseemai taonou taho Jisu ye southeare donou phoutare.

Ramai nou Dolouyu Kilai

¹⁵ Alia Jisu nou puh pei hi motouyu donasü sülouyu kisü, buh sühinou tare; alia mai alaonou puhthai fütare. Puhnou lishimai hrülaiye souvei peie

¹⁶ alia puh vanou kukhehi paokhaiso tea puletao hi kharochi peie.

¹⁷ Puhnou haibüa souyu hai Isaiah rachi paolawo nou paopawuyu sü panou vetere donoue:

¹⁸ “Zhukhaio, Enou dolouyu Akilainaye sü, Arakonou sasho-a buyu Aleshina. Enou Arakohai puh pei hi seive thoupeilai, alia puhnou Avei Chikuyu sü Tahrüh khemai hi paongao peilai.

¹⁹ Puhwo veiva laimoe moa shusou raolaimoe, moa maitalinoua puhpaihai dudo khonou choulaimoe.

²⁰ Puhnou lelouhomai hisü nasha peilai, alia vealaimai hisü zhuvea peilai, puhnou acheche naye panou koloumo koutesü telai;

²¹ alia Tahrüh kukhe mainou puh zhih hinou rei-a bulai.”

Jisu ea Beelzebul

²² Süthaisü mai kamainou Jisu hi rashinou lou-a nghichayu ea lahayu maili save. Jisu nou mai sünaye souvei peire, südonou mai sünasü la phaloure ea ngaoloure.

²³ Alia maikhemai hrülainou khupaloua paoe, “Puh hai David Nahpoutu laimowu?”

²⁴ Ana Phariseemai taonou süsü chouloua paoe, “Mai hainanou rashitaoye hulai payuhai rashitao pei hi aduna Beelzebul nou puh hi sübüa soure khouko peiyu vanoubaie.”

²⁵ Puletao nou choyusü Jisu nou süloua puletao hi paoe, “Vedei talia meme soua dadeloua linou lipei hi reih zülouzü phasho bulaimoe. Alia nuhdu tali moa kikhali hai lah memesoua dadeloua linou lipei hi reih zülouzü kaota bailai!

²⁶ Südonou Saitan vei vedei hinou me alinou ali pei hi reihzü louzü, süsü meme soua dadere ea thala-a kaotalai!

²⁷ Alia Enou rashitaohai Beelzebul khouko vanou hulai palouzü, neletao thaifümaitao hiwo rashitaoye hulai payu khoukohai thaohnou peiwe? Südonou neletao thaifümainou souyu nanou neletao hai mahre touyu vei zhopaoh souwe.

²⁸ Moe, haihai Beelzebul nou moe, ana rashitaoye hulai payu khoukohai Ramai Rakonou Ahi peie, alia sünanou neletao pei hi Ramai Vedei veloure touyu vei zhopaoh souwe.

²⁹ “Moa kabüa maitalinou khouyumai alikihi dakhao loulouzü, rai-a puhye rainou phukhaiwu moanou puhvei nataosü po-a taloulai? Chechenou sübüa soulouyu thainou puhnou puh kisü vaopoa taloulai.

³⁰ “Eye donou moyu maitalisü Eye chechenou motouwe, Eye koa podzükha moyu maitalinou chechenou sourarouwe.

³¹ Südonou Enou neletao hi paowe, mainou mah tali souyu ea Ramaiye paoshiyuwo khaipeilai, ana Rako Mashiye paoshiyuwo khaipei laimoe.

³² Alia maitalinou Mai Nahpoutuye paoshiyuwo khaipeilai; ana Rako Mashiye paoshiyu maitaliye chu hrü haina hi-a, vere teisa hrü sünahi-a khaipei laimoe.

Süübe ea sünavei shithou

³³ “Avei rashi ngaoloure donou neletao nou boh veiyu süübe buvu zülai; neletao vei boh shiyu süübe bulouzü, neletao nou ashi rashi ngaolou bailai; daiolouzü süübe aliye sünavei rashi hinou sheelou baiwe.

³⁴ Nghou tyaonah taore, neletao hai shi-a bulukhu kabüa avei chi paoloulai? Daiolouzü lekhe hinou phoupeia buyu hinou münou paopawe.

³⁵ Avei mainou puh lekhehi avei podzükhai touyu hinou avei natao popawe; alia ashi mainou puh lekhehi ashi podzükhai touyu hinou ashi natao popawe.

³⁶ “Enou neletao hi paowe, Chikuyu Teithe kisü mai hrülainou lah lahnou paopawuyu züdoumoyu chipao pfüphou vanou paloucho sü peilai.

³⁷ Daiolouzü nevei chipaotao vanou neye souzü peilai, alia nevei chipaotao vanou neye mah dukhailai.”

Khupa vah Soungaore Khoyu

³⁸ Süthaisü razhai dou-apeimaitao ea Phariseemai kamainou puh hi paoe, “Dou-apeio, Ehnou nehinou shee ali ngaonüwe.”

³⁹ Ana puhnou puletao hi chila peie, “Ashi ea khakha chaozüyu maikhanou shee phoue; ana Jonah rachi paolawovei sheena deinou sühisü shee kukhe talia peilai moe.

⁴⁰ Daiolouzü Jonah nou khah aduna pou levai hinou hea asü ea khei asü buyubüa Mai Nahpoutu-a deikhe hinou hea asü ea khei asü bulai.

⁴¹ Chikuyu Teithe kisü Nineva hi maitao nou maikha hainaye koa hrishuloua neletaoye mah dukhailai, daiolouzü puletao nou Jonah nou ko paodouyu hinou le daloure, alia zhukhaio, Jonah jünou dukouyu hali haihi bue!

⁴² Chikuyu Teithe kisü Sheba teideihi Veopainou maikha hainaye koa hrishuloua neletaoye mah dukhailai, daiolouzü puhnou Solomon vei ratsü keire donou deiphao akhai hinou tave-e, alia zhukhaio, Solomon jünou dukouyu hali haihi bue!

Sheemoyu Rakotao Khaiveyu

⁴³ “Sheemoyu rako alinou mai ali hinou tapa louyu kisü, puhnou deikih buhtao hinou tasühaopoa soloure buh phoutawe, ana puhnou buhlia ngaoloumoe.

⁴⁴ Süthaisü puhnou lah puh hi paoe, ‘E leh Enou tapayu Akihi khaivelai.’ Alia puhnou khaiveyu kisü ki sünasü sakhaia vaisheetou khaitoua ea zhaiveitoua ve ngaoloue.

⁴⁵ Süthaisü puhnou vakouhi taloua puh jünou shikouyu kukhe rashi anaiye save loure, alia puletao nou tave sühinou lou buh souloure. Sübüa mai sünavei hrümai nasü raikina jünou shipusho tare. Südonou ashi maikha haina hi-a sübüa palai.”

Jisu Pfü ea Chinamaitao

⁴⁶ Jisu nou maikhemai hi chi paobebu kinou, zhukhaio, puhpfü ea puh thaihou maitao nou tave vakounou lalou-a puhye chiphare donou noua bue.

⁴⁷ Südonou sühi buyu hrohi kamai nou puh hi paoe, “Zhukhaio, nepfü ea ne thaihou maitao nou vakounou la-a neye chiphare donou noua bue.”

⁴⁸ Ana Jisu nou puh hi chipao-a buyu mai sünahi chila peie, “Apfü thaoh-e? Alia Athaihou maitao thaohmaie?”

⁴⁹ Süthaisü puhnou puh rozümaitaohi bahnou teloua paoe, “Zhukhaio, haihi Apfü ea Athaihou jürai maitao bue!

⁵⁰ Daiolouzü rakibu Apuo vei leli souyu maitali sü Athaihou jürai, Atu ea Apfüe.”