MARK 8 - SHEEYU BAIBEL (BSI)

Jisu nou Mai Thedaiye Vaiyu

¹ Süthaisü phasho khaimoa kukhe maisou alao tave dzüpu khaire, alia maikhemai sü halia toure hakhaia Jisu nou puh rozümaitaoye puh hi kuveloua paoe,

² “E mai haitaoye zhuveasho loure, daiolouzü puletao nou Eye koa teithe asü bukoure ea chuo toure halia hare.

³ Enou puletaoye halia vaipeimoa kilo seiva louzü, puletao sü ludu hinou houshulai, daiolouzü puletao kamaisü adoukounou ve-e.”

⁴ Puh rozümaitao nou puh hi noue, “Rekou haihinou daikinou taho maisou haitaoye vailousü touso ngaoloulai?”

⁵ Jisu nou noue, “Neletao hi raokhao pho daizhou buwe?” Puletao nou chila peie, “Anai bue.”

⁶ Puhnou maisouye deiphinou kou chobuloure donou kharochi peire. Süthaisü puh nou raokhao pho anaitao poloua Ramai hi kalo paowu-a sütaosü soukhore, alia sütaosü mai souhi zhihpeire donou puh rozümai taohi peire; alia rozümai taonou sütaosü maisouhi zhihpeire.

⁷ Puletao hi khah-a daotou bue, alia Jisu nou sütao donou-a Ramai hi kalo paowu-a sütao-a maisouhi zhihpeikhaio tea rozümai taohi kharochi peire.

⁸ Alia mai hrülainou touloua khralou khaire; alia tousho derai kouyutao hai puletao nou sülai anaiphou pokodzüloue.

⁹ Sühi tave toulouyu taohai mai thedai phae.

¹⁰ Alia Jisu nou puletaoye seitare ea thalasou puh rozümaitaoye koa sakhaohi louloure, alia Dalmanutha deizha hilo tare.

Phariseemai nou Shee Khoyu

¹¹ Phariseemai kamainou Jisu hi taveloua puhye veiva loure. Puletao nou puh mah phoupalou nüwe, südonou puletao nou puh hinou Ramai nou puhye ae-ao touwe touyu pongaore shee ali soungaokhaio tea khoe.

¹² Ana Jisu nou ssü liphou touloua paoe, “Daidonou maikha hainanou shee phousa? Chechenou Enou neletao hi paowe, maikha haina hisü sheelia peilai moe!”

¹³ Alia puhnou puletaoye thaowu-a tare, alia sakhaohi taloupuloua zai polo dovahi tare.

Phariseemai ea Herod vei Kheih

¹⁴ Chuo rozümaitaosü raokhao pfüngaire; alia puletao buh sakhao hisü raokhao pho alikhei bubaire.

¹⁵ Jisu nou puletaoye tukha-a paoe, “Leikeilo, Phariseemai ea Herod vei kheih zhutoulo.”

¹⁶ Alia puletao lah puletao hronou haibüa chipha-a paoe, “Puhnou haisü Eletao hi raokhao lia hayu donou paobaie.”

¹⁷ Puletao nou pha-a buyu sü Jisu nou süloua puletao hi paoe, “Daisounou neletao raokhao lia hayu vanou chi phawe? Neletao chu koutea sümo-ngaomo hiwu? Neletao le khousho tarewu?

¹⁸ Neletao nghithou bu-bua ngaomowu? Neletao nou pfü-pfüa choumowu? Alia neletao halia lilou mowu?

¹⁹ Enou mai thengouye donou raokhao pho angou soukhoyuki neletao nou tousho derai kouyu sülai kizhou phou pokodzüloue?” Puletao nou chila peie, “Kiahai.”

²⁰ Jisu nou noupukhaie, “Alia Enou mai thedaiye donou raokhao pho anai soukhoyuki, neletao nou tousho derai kouyu sülai kizhou phou pokodzüloue?” Puletao nou chila peie, “Anai.”

²¹ Alia puhnou puletao hi paoe, “Neletao chukoutea sümohiwu?”

Jisu nou Bethsaida hinou Nghichamai Aliye Souvei Peiyu

²² Alia puletao sü Bethsaida hi velou loure ea sühinou mai kamainou nghi chayu mailiye Jisu hi saveloua puhye nou mai süna vahi deipeio tea khoe.

²³ Jisu nou mai sünaye bah hinou süthailoua nuh vakouhi satare. Alia puhnou mai süna nghithouhi taidzü sükhaiyu kisü puh bahnou mai süna vahi khailoua puh hi noue, “Ne hatalia ngaongaomoe?”

²⁴ Mai sünanou puh pah pfülaloua paoe, “Ovai, Enou maikhe maiye ngaowe, ana puletao sü süübenou takou takheyu büwe.”

²⁵ Süthaia Jisu nou puh bah hai mai süna nghithouhi pokhaipeie. Lüh haina hisü mai sünanou zhutei loure ea puh nghisü ngaoloua ha teitei sheesha-a ngaoloure.

²⁶ Süthaisü Jisu nou puh hi haibüa kharochi paia puh kihi seitare, “Nuh hi koutea talouso.”

Pitar nou Jisu vanou Dua Paopayu

²⁷ Süthaisü Jisu nou puh rozümaitaoye koa Kaisaria Philippi ngheikihi buyu nuhtaohi tare. Ludu hinou puhnou puh rozümai taohi noue, “Maikhe mainou Eye nou thaohwe tea paowe?”

²⁸ Alia puletao nou puh hi paoe, “Kamainou neye nou Johan Baptist tea paowe; kukhe mainou neye Elijah-e touwe, alia kukhenou ne hai rachi paolamaitao hronou alie touwe.”

²⁹ Puhnou puletao hi noue, “Ana neletaowo Eye nou thaohtouwe?” Pitar nou puh hi chila peie, “Newo Khrista süe.”

³⁰ Süthaisü Jisu nou puletao hi kharochi peia paoe, “Maitalihia Avanou paokhaiso.”

Jisu nou Puhvei Veayu ea Athai vanou Paoyu

³¹ Süthaisü Jisu nou puh rozümai taoye doupei tare: “Mai Nahpoutu hai alaosou vea vuzülai ea tsümaitao, napao adumaitao, alia razhai dou-apeimaitao nou puhye sü motoulai. Puhye sü southeawulai, ana teithe asü thaisü puh hai hrishulai.”

³² Puhnou chipao haisü sheetoua puletao hi paopeie. Südonou Pitar nou puhye sakupaloua züshu tare.

³³ Ana Jisu nou reiveloua ea puh rozümaitaoye zhuloua Pitarye züa paoe, “Saitan, ne Ahinou tawo. Ne tsühai Ramai hinou vemoe ana emai hinou baie!”

³⁴ Süthaisü Jisu nou maisou ea puh rozümaitaoye puh hi kuveloua paoe, “Maitalinou Athai fünü louzü, puhlah puhye motoulo, alia puh kros pfüloua Athai fülo.

³⁵ Daiolouzü maitalinou lah puh hriraihai khailulou nülouzü süsü hawulai; alia maitalinou Eye donou ea ko avei donou puh hrirai hawulouzü süsü khailu loulai.

³⁶ Daiolouzü mailinou deiphao teitei zhiloukhaia lah puh hrirai hawulouzü sünanou puhye donou dai zhiyu bue?

³⁷ Moa emainou puh hrirai lyare donou dai peilousüe?

³⁸ Südonou maita linou chu khulou souyu ea mah souyu maikha haina hinou Avanou ea Achipao vanou ahrao louzü, Mai Nahpoutu-a sheeyu rakivamaitaoye koa Puo vei khouko ava hinou veyu kisü süna vanou ahraolai.”