MARK 13 - SHEEYU BAIBEL (BSI)

Rathoki Souha Laiyu vanou Jisu nou Paoyu

¹ Jisu nou rathoki thaowu-a tapakhaie puh rozümaitao hronou alinou puh hi paoe, “Dou-apeio, zhukhaio! Chuhtao ea kitaosü daizhozhou khupasa!”

² Jisu nou puh hi chila peie, “Ne dushoyu ki haitao ngaowu? Haihi dokhao koulai moyu, alinou lipei hi shoa bulaiyu chuh lia khai khailaimoe.”

Kaoshiyu ea Souvea-souhoyu

³ Alia Jisu nou Oliv deichi hinou chobua rathoki hilo puhpah pfüreia buyu phahinou Pitar, Jems, Johan ea Andrew nou khei-a puh hi tave noue,

⁴ “Paokhai touyu taosü dukilai ea sütao pamo jühi rai-a palaire touyu dai shee soungaolai, Eletao hi paongao peio.”

⁵ Jisu nou puletao hi paoe, “Maitaliye panou neletaoye sümahlou more donou leikeilo.

⁶ Mai alaonou, ‘E hai puh-e!’ tea paoa Azhih hinou velai; alia puletao nou mai taoliye sümah peilai.

⁷ Alia neletao nou reih pai ea reih ko chouyu kisü ngaopiwuso; daiolouzü haisü pavu zülai, ana sütaonou akhaina mohie.

⁸ Daiolouzü tahrüh alinou ali pei hi alia vedei alinou ali pei hi reih soulai. Buh likinou nü sülai ea tokaa velai, ana haitao hai vearevei shuraibaie.

⁹ “Ana lah neletaowo leikei-a bulo; daiolouzü puletao nou neletaoye niloua chikuki hi savelai; alia neletaoye rathobuhtao hinou dapeilai; alia neletao hai Azhih donou puletao hi ko avei paongao peire donou teidei khomaitao ea vemaitao nghojühi ve lalai.

¹⁰ Alia akhai vemo jühinou, ko aveihai tahrüh hrülaihi raia paodou vuzülai.

¹¹ Alia puletao nou neletaoye niloua chikuki hi saveyu kisü, neletao nou daichi paolaisa tea raia dowuso; teile veyu kinou, neletao hi peiyu talisü paokhaio. Daiolouzü neletao nou paoyu chipaotao sü neletao vei laimoe; sütaosü Rako Mashi hinou velai.

¹² Maikhemai nou lah puletao thaihou jüraiye southeare donou thoupeiwulai, alia sübüa puomaitao nou-a puletao nahmaiye soulai ea nahmaitao nou-a puletao pfüpuo pei hi motouloua puletaoye southeawulai.

¹³ Adonou mai hrülainou neletaoye ngaoralai. Ana akhai koute shamea louyu puhye sü khaipeilai.

Ngaopi-ngaohiyu

¹⁴ “Ana neletao nou ‘Ha-kare souzhaiyu ngaora’ sünanou puhnou buzü moyu buh hinou la-a buyu kisü (phoua buyu puhnou süloukhaio), süthaisü Judea hi buyu puletao nou deichi taohi tutaloukhaio.

¹⁵ Kiphaohi buyu puhnou hatali pore donou takouloua puh kikhahi talou khaiso.

¹⁶ Alia douhinou buyu puhnou puh sahba pore donou kihi khaivewu laimoe.

¹⁷ Teithe sütao kisü poupfüa buyu ea panou nao-a buyu puletao donou daizhozhou ngaopisa!

¹⁸ Haitaohai saiki hinou palou more donou Ramai hinou veachi paokhaio!

¹⁹ Daiolouzü teithe sütao kisü Ramai nou deiphao soushurai hinou shua chu koute pakhai mohiyu ea haithaia pakhailai moyu souvea-souchoyu sü vedaolai.

²⁰ Ana Mapao nou teithe sütaosü soujü peiwure; puhnou soujü peimoe toulouzü, maitalia khailu louhoe; ana puh nou dopawuyu maitaoye donou puhnou teithe sütaosü soujüre.

²¹ “Süthaisü maitalinou neletao hi, ‘Zhukhaio, haihi Khrista bue!’ moa ‘Zhukhaio, puhsü sühi bue!’ tea paolouzü puhye loucheso.

²² Daiolouzü madayu Khristatao ea madayu rachi paolamaitao velai. Puletao nou sheetao ea khupa vahtao soungaoa soulou veilouzü Ramai nou dopalouyu maitaoye-a sümah peilai.

²³ Ana leikeilo! Enou neletao hi teile vemo jühinou hateitei paokhai peire.

Mai Nahpoutu nou Khaive Laiyu

²⁴ “Ana souvea-souchoyu thai teithetao hisü, teinghi hai zhita bailai, alia khousü vakhai laimoe,

²⁵ alia teivuh taosü ratei hinou dekou bailai ea rateihi buyu khoukotaoye sü puletao vei ludu hinou hutawu bailai.

²⁶ Sükisü Mai Nahpoutuwo nou dushoyu khouko ea khouko avanoupu teihao vanou taveyu sü puletao nou ngaolai.

²⁷ Süthaisü puhnou rakivamai taoye deiphao kainghou adaihi seita-a panou deiphao akhai alilova nou alilova koute hinou puhnou dolouyu maitaoye podzülai.

Doushibe hinou Doulouyu Ako

²⁸ “Doushibe hinou akoli doulouwo. Sünavei botaonou ngupaloua sünghoutao lapayu kisü neletao nou hou ngheire touyu süloue.

²⁹ Süzhaibüa, neletao nou shee haitao teitei ngaolouyu kisü puh hai romühi kou ngheiteire touyu neletao nou sülo.

³⁰ Chechenou Enou neletao hi paoe, haitao veishi pamo koutesü maikha haina hai hata laimoe.

³¹ Raki ea deiphao hatalai, ana Achipaotao louzü halaimoe.

Maitalia Teithe ea Pha nasü Sümoe

³² “Ana teithe süna ea pha sünasü Puo likheiwo deinou rakihi rakivamai moa Nahpoutu koutenou-a sümoe.

³³ Leikeilo, zhaihelo; daiolouzü teile süsü duki velai touyu hai neletao nou sümoe.

³⁴ Haihai mai alinou puh ki thaowu-a veih douhi tareki puh kilaimai taohi lah lahnou soure vahtao thaothou peiwu-a ea kikhu khowo nahi soutaosou zhaihelo tea paopeiwu-a tayu kheihaoe.

³⁵ Südonou zhaihelo, daiolouzü dukinou ki paopu nasü velaisa, koukhenou laiho, kheitsüle nou laiho, houkhao hinou laiho molouzü shonanou laisa neletao nou sümoe.

³⁶ Sübümo louzü puhnou thalasou veloua neletaoye zhia bua ngaoloulai.

³⁷ Südonou, Enou neletao hi paoyuhai, Enou mai hrülaihi paowe: Zhaihelo!”