MALAKAI 1 - SHEEYU BAIBEL (BSI)

¹ Mapao vei chipao hai Israel mai hi paopeire donou Malakai hi ve-e:

Israel Maiye Mapao nou Leshiyu

² Mapao nou paoe, “Enou neletaoye leshi peire.” Ana puletao nou chila peie, “Kabüa nenou Etaoye leshi peie?” Mapao nou chila peie, “Esau ae Jakob hai china-e, ana Enou Jakob ae puhvei tyaosholea ye leshi peie,

³ ana Enou Esau ye ngaorae; Enou puhvei deichi khesü panou hakata-a baie, alia puhvei tyaonahtao sü rekou buyu lakhao khehi peithouwure.”

⁴ Hakinou Edom mainou haibüa paolouzü, “Etaoye souphe soupho laire, ana soushi khaitouyu buhtao sü Etao nou soushu pulou bailai.” Hrülai pei buo Mapao nou haibüa paolai, “Puletao nou soushuloua malae, ana Enou soushisasa peiwu bailai, puletaoye shiyu tyahrü alia Mapao nou hrühphao nou rarouyu teidei-e teanou mainou kumosa.”

⁵ Haihai ne nghithou vuzünou ngaolai ae nenou “Israel mai teidei jünou la-a Mapao hai khouko bue,” teanou paolai.

Ramai nou Napao Maiye Vamoyu

⁶ “Nahpoutu lihai puo ye tsükhouwe, alia kilai maili sü kipaopu ye tsükhoue; sükulouzü, E hai neletao vei puo louzü, neletao nou Eye tsükhouyu sü daiki bue? E hai neletao vei paopue toulouzü, Eye khuhraoyu sü daiki bue?” teanou Hrülai pei hi Mapao nou puh zhih ngaophou moyu napao maitao hisü paoe. Ana neletao nou paoe, “Kabüa Etao nou ne zhih ngaophou moe?”

⁷ Haibüa neletao nou Eye ngaophou moe — “Sheemoyu touso nou pove sheela peiwe.” Alia neletao nou noue, “Kabüa Etao nou sheemoyu soupeiwe?” Mapao vei tovaibu hai ngaophou moa bailai tea tsüchoyu vanoue.

⁸ Neletao nou nghichayu kikhaorü nou posheela peiyu hai mah mowu? Alia neletao nou shovaiyu ae souhyu kikhaorü nou sheelayu hai mah mowu? Sübüa sheeyu napao peikho mai hi peilouzü; puhnou ne hi valaiwu, mokhaia jüpa-a bailaiwu? teanou Mapao nou paoe.

⁹ Alia chuo Mapao vei jüpa nasü phoulo, sükulouzü puhnou Etaoye zhuvea peishulai. Sübüyu natao hai ne bah nou poa sheela peiyu hai, puh vei jüpa neletao nou ngaoshulai touwu? teanou Mapao nou noue.

¹⁰ Khoukhoulai Mapao nou paoe, “Neletao hrohinou mai talinoua Rathoki nasü kikhu khupei-a hakonou sheelayu buhisü meitao molouzü veih sholaire. E neletaoye jüpayu hazhi toure, alia neletao nou peiyu posheela khesü E polai more.

¹¹ Daiolouzü teinghi palaonou loulao koute azhih hai tyahrü teitei hi dushoe, alia buh teitei hinou theadzü kaiveih nou poa azhih hinou sheela peiwe, alia sheeshayu nanou Eye poa sheela peiwe; daiolouzü azhih hai tyahrü hrülai hi dushoa bue, tea Khoukhoulai Mapao nou paoe.

¹² Ana sühai neletao nou souzhai peiwure, Mapao vei tovaibu hai sheemoe tea paoyuki alia sühi tousona hai ngaorae teanou paoyu phaki,

¹³ alia neletao nou ‘Haihai daizhou koute veayu vah sarou,’ teanou paowe, alia neletao nou Eye tsükhouyu ngaomoe. Neletao nou saolouyu nanou mokhaia chaataoyu alia souhyu kikhaorü nou pove Eye neletao nou sheelawe. Sühai E neletao bah hinou popei shulai tiwu? tea Mapao nou paore.

¹⁴ Kikhaorü aveih bua nou alia Eye sheela peilai tea paochewu-a, chaataoyu nanou Ahi popa sheela peiyu maiye sü chaa ngaotheo; daiolouzü E hai dukhayu veo-e,” teanou Khoukhoulai Mapao nou paoe, alia azhih hai tyahrü hrülainou ngaopiwe.