MAIPEI PHOUYU 3 - SHEEYU BAIBEL (BSI)

Aaron vei Nahpoutu Maitao

¹ Mapao nou Sinai Deichi hinou Moses ye chayu phaki, Aaron ae Moses vei kihikha mai hai mai haitao bue.

² Aaron hai nahpoutu mai adai bue: Nadab, puhnou nah tsükana-e, Abihu, Eleazar, ae Ithamar.

³ Puletaoye panou napao soure donou dopaloua theadzü napeiwure.

⁴ Ana Nadab ae Abihu hai Sinai radeiki hinou sheemoyu mei nou taopoa Mapao hi posheela peiyu donou southawure. Puhai hai nahmai ha-e, südonou Eleazar ae Ithamar nou Aaron vei hrümamai sasü napao souwe.

Napao Maitao vei Kuvah panou Soure donou Levi Maitaoye Dolouyu

⁵ Mapao nou Moses hi paoe,

⁶ “Levi maitaoye nghoujülo sakoulo, ae puletaoye panou Napao Aaron vei kuvah soure donou vahbu thoupeio.

⁷ Puletao nou Enou buyu Sahpao hi, napao maitao vei kuvah ae maisou vei kuvah hai soupeilai.

⁸ Puletao nou Sahpao hi buyu na veishi ae Israel maisouye zhua nou vah sü soulai.

⁹ Levi maitao vei vah hai Aaron ae puh nahmaitao vei kuvah souyu nasü baie.

¹⁰ Nenou Aaron ae puhvei nahpoutu maitaoye panou napao maivei vah soure donou dothou peilai, mai kukhe mai talinoua vah süna soulai tea teyu maiye sü southa-a bailai.”

¹¹ Mapao nou Moses hi paoe,

^12-13 “Israel maipfü nou nayu nahpoutu narai-o thaosou Israel mai hrohinou Enou Levi maiye dopa loure, Levi maitao hai avei-e, daiolouzü nah narai mai hrülai hai avei baie. Ejipt hi Enou nah narai hrülai hai southa peiyu phaki, Enou nah narai mai hrülai moa kikhaorü toukou raikayu veishi hai avei soulai tea Enou souku pawure, sütao hai avei soulai. E hai Mapao-e.”

Levi Maipei Phouyu

¹⁴ Sinai vei radeiki hinou Mapao nou Moses hi haibüa kharochi peie,

¹⁵ “Levi maiye kiphao alili nou ae khü-khü nou khouh ali payu ae khouh ali jünou layu poutumai hrülai zhih sü rükhailo.”

¹⁶ Paoyu thaifüa Moses nou soupeie.

^17-20 Levi hai nahpoutu asü bue: Gershon, Kohath ae Merari toue. Puletao vei toudzütao hai puletao vei zhih nou tawe. Gershon hai nahpoutu ahai bue: Libni ae Shimei. Kohath hai nahpoutu adai bue: Amram, Izhar, Hebron ae Ezziel; alia Merari hai nahpoutu ahai bue: Mahli ae Mushi. Puletao hai Levi maivei kihikha maitao-e.

²¹ Gershon vei khü hai Libni ae Shimei kihikha maitao koa nou soue.

²² Khouh ali jünou layu poutu maitao maipei phouyu phaki, puletao mai hrülai hai 7,500 bue.

²³ Khü hai nanou Sahpao thailova teinghei loulo nou fühao soua bulai,

²⁴ ae Lael nahpoutu Eliasaph nou khü vei peikhowo soue.

²⁵ Puletao nou Sahpao, süna levai ae phouva houyutao, kikha taloure kikhu haosah,

²⁶ chikuyu buh pehao hi loure sahtao ae sühinou buyu posheelabu, alia chikuyu buh taloure haosah taosü zhua nou soulai. Puletao nou haitao hi molouzü shiyu vah veishi hai soulai.

²⁷ Kohath vei khü hai Amram, Izhar, Hebron ae Uzziel kihikha maitao-e.

²⁸ Khouh ali payu ae süjünou layu poutumai hrülai hai maipei 8,600 bue.

²⁹ Khü haina nou Sahpao vei khelova nou fühao soua bue,

³⁰ ae puletao vei peikhowo hai Uzziel nahpoutu Elizaphan nou sou-e.

³¹ Puletao nou Vo Sübvü, taibel, meivabvü khaibu, posheelabutao, napao maitao nou poa Sheeyu Buh hinou vah soure paikhaotao, alia Sheesheelai Buh hi taloure haosah nasü puletao nou zhua soulai. Puletao nou haitao hi molouzü shiyu vah veishi hai zhua nou soulai.

³² Napao Aaron nahpoutu Eleazar nou Levimai peikhowo sü soua puhnou rathoyu buh hi vah veishi hai zhupeie.

³³ Merari vei khü hai Mahli ae Mushi vei pfümounah nou koa souwe.

³⁴ Khouh ali jünou layu poutumai hrülai hai 6,200 bue.

³⁵ Khü hai nanou Sahpao vei reilova nou fühao soua bue, ae Abihail nahpoutu Zuriel nou puletao vei peikhowo soue.

³⁶ Puletao nou soure vah sü Sahpao vei süütao, hutao, dekatao, beiphi khiyu ae sütao poa nou Sahpao sü soulai.

³⁷ Puletao nou maisou vejüa buyu vakou vei deka baiphi khiyu ae raitao zhua nou soulai.

³⁸ Moses ae Aaron alia puhai vei nahpoutu maitao nou Sahpao vei kipalo teinghei palova nou fühao soua bulai. Puletao nou Sheeyu Buh, rathoyu hisü naanou teitei hai Israel mai thaosoua soulai ae mai talinoua vah sünasü soulai touyu maiye sü southalai.

³⁹ Mapao nou Moses hi kharochi peia Levi mai, khouh ali payu ae khouh ali jünou layu mai hrülai maipei phouyu phaki puletao hai mai 22,000 bue.

Nahpoutu Narai Maitao Thaosü Levi Mainou Thaolouyu

^40-41 Mapao nou Moses hi paoe, “Israel mai nahpoutu naraio, khouh ali jünou layu mai hrülai sü zhih noupu rüloua maipei phoulo. Israel maivei nahpoutu naraio hrülai hai aveie. Ana puletao thaosü Enou Levi maitaoye nou avei-e tea khaloure. Kikhaorü touthou raikayu tao thaosü Enou Levi maivei kikhaorütao nou avei-e tea khaloue.”

^42-43 Moses nou paochi züa Israel maivei nahpoutu naraio khouh ali jünou layu mai hrülai sü zhih noupu rülou-a maipei phouloure, puletao mai hrülai hai 22,273 bue.

⁴⁴ Mapao nou Moses hi paoe,

⁴⁵ “Israel maivei nah naraio maitao thaosü Levi mai, ae Israel maivei kikhaorü tourai kaiyutao thaosü Levi maivei kikhaorü nou polo, ae Levi maitaoye sü avei mai soure donou poa peithou peio.

⁴⁶ Israel maivei nahpoutu naraio maitao nou Levi mai jünou 273 pouyu donou neletao nou kou-a buyu nahpoutu maitaoye sü hüdakhai laire.

⁴⁷ Maisou nou ta-a buyu zhai thaifüa mai ali hai shahu angou nou hüdakhai palai,

⁴⁸ ae hüdakhai louyu shahu taosü Aaron ae puh nahpoutu maitao hi peio.”

^49-50 Moses nou paochi züa shahu 1,365 hai poloure,

⁵¹ ae puhnou shahu taosü Aaron ae puh nahpaotu maitao hi peiwure.