LOUTAO 99 - SHEEYU BAIBEL (BSI)

Ramai nou Dukayu Veo Nasüe

¹ Mapao nou veo süe, mai hrülaiye panou pingua bulo. Puh hai shouh pfüyu khaona phao vanou puhvei vebuh hisü bue, ae deiphao sü panou ngulü khaio.

² Mapao hai Zion hinou dusho-a nou bue; puhnou mai hrülai pei hi dukayu nasüe.

³ Mai hrülaiye panou puhvei aduso ae zhih aveih nasü paosholo. Sheeyu nasü puh baie!

⁴ Khouko buyu veo, acheche nasü nenou leshi-e; nenou Israel mai hi kaozü nasü soushu peie; nenou acheche ae kaozü nasü pove peie.

⁵ Etao Ramai Mapao ye paosholo; puhye tave puhvei vebuh hinou tholo! Sheeyu nasü puh baie!

⁶ Moses ae Aaron hai puhvei napao-e, ae Samuel hai puh hi veachi paoyu mai ali-e; puletao nou Mapao ye kue, ae puhnou puletaoye sü chila peie.

⁷ Teihao vei deka hisü nou puhnou puletaoye sü cha peie; puhnou peikhai touyu chikhatao ae kharochi khesü puletao nou züpeie.

⁸ Oh Mapaowo, Etao Ramai, nenou nevei maitaoye sü chila peie; puletao nou mahmo souyu donou nenou puletaoye tudee peia buyuma, nenou puletao hisü ne hai khaipeiyu Ramai nasüe touyu ngaopeie.

⁹ Etao Ramai Mapao ye sü paosholo, ae puhye sheeyu deichi hinou tholo! Eletao Ramai Mapao hai sheewe.