LOUTAO 97 - SHEEYU BAIBEL (BSI)

Ramai hai Dukayu Kho-apeio Nasüe

¹ Mapao nou veo nasüe! Deiphao, asalo! Zai dzü nou sühao buyu teideitao, lesa loukhaio!

² Teihao ae azhi sünou puhye sühao-a nou bue; puhnou acheche ae kaozü sünou khasa-a hrüpeie.

³ Mei nou puh nghoujü hinou tawe, ae puhye ngaobayu maitaoye sü deitha peie.

⁴ Puhvei tei peivavayu nasünou deiphao sü phuva peie; deiphao nou süsü ngaolou khaie, ngaopi-a nguwe.

⁵ Deichitao hai Mapao vei nghoujü hinou dzü vita-a baiwe, teideiphao teitei pei hi Mapao vei nghoujü nou dzü data-a baiwe.

⁶ Puhvei acheche nasü raki nou shapaowe, ae tyahrü hrülai nou puhvei khouko ava nasü ngao-e.

⁷ Bashara thoyu mai hrülaiye sü hraongu soupeilai; Mapao ye sü rah veishi nou nakou khurülai.

⁸ Oh Mapaowo, nenou chidei soupeiyu donou, Zion hi buyu mai hrülai nou lesa-a bue, ae Judah nuhdutao hi hrüa buyu mai hrülai nou asasho-a bure.

⁹ Khoukhoulai Mapao, nenou teideiphao veishi pei hi kukayu nasüe; ne hai rahtao teitei jünou dukayu nasüe.

¹⁰ Hashi taoye ngaorayu maiye sü Mapao nou leshi-e; puhnou puhvei maitaoye sü khopeiwe; puhnou puletaoye maishi mai bah hinou vupa peie.

¹¹ Acheche maiye sü ava sünou phupeiwe, ae mai aveih maiye sü savayu peie.

¹² Achehe hinou hrüyu mai hrülai, Mapao vei zhih hinou asalo! Sheeyu Ramai nou soupeikhai touyu vah khesü licholoua puhye kalo paopeikhaio.