LOUTAO 96 - SHEEYU BAIBEL (BSI)

Ramai hai Dukayu Veo Nasüe

¹ Mapao ye lou ashu sünou sousho peikhaio! Deiphao mai hrülai, Mapao ye lou sousholo!

² Mapao ye lou sousho khaio, ae puhye paosholo! Puhnou Etaoye khailupa peiyu ko aveih nasü teisa nou shapao peikhaio.

³ Puhvei kathe nasü tyahrütao hi paopeio, puhvei khupayu vah khesü mai hrülai hi shapao peio.

⁴ Mapao hai due, puhye soutaosoua paosho züe; puhye rah kukhe jünou tsükhoupu züe.

⁵ Tyahrü kukhe vei rah khesü bashara baie, ana Mapao nou teideiphao sü soupeie.

⁶ Tsükhouyu ae kathe sü puh hi bue; khouko ae hüveiyu nasü puhvei Rathoki hi bue.

⁷ Deiphao mai hrülai Mapao ye paosholo; puhvei khouko ae kathe nasü paosho khaio.

⁸ Mapao vei zhih aveih nasü paosholo; puhvei Rathoki hisü posheela na khesü pove peio.

⁹ Deiphao mai hrülai, Amasheeo ye ngaoyu phaki puhye nakou khurülo; puh nghoujü hinou ngaopi-a ngua bulo!

¹⁰ Tyahrü hrülai hisü haibüa paopeio, “Mapao hai veo süe! Deiphao hai veisho-a soukhai peiwure, hainasü soulülou hore; puhnou deiphao maiye kaozü hinou chiku peilai.”

¹¹ Raki ae deiphao sü panou asalo! Zai ae sühi buyu hrikhaona veishi, shura soukhaio;

¹² dou ae sühinou buyuna veishi panou asalo! Vaobvü hi buyu süübe khenou asah soua shalai

¹³ Mapao nou deiphao hi ve khasa-a hrülaiyu phaki. Puhnou deiphao maiye kaozü hinou ae acheche hinou khasa-a hrüpeilai.