LOUTAO 95 - SHEEYU BAIBEL (BSI)

Paoshoyu Lou

¹ Tavelo, Etao Mapao ye paosholai! Etaoye vupa-apeio Ramai hi asah soua lou sousho laikhe!

² Eletao puh nghoujü hi kalo pao-a velaikhe, ae asayu lou nou puhye sousho laishe.

³ Daiolouzü Mapao hai khouko pfüshoyu Ramai-e, ramai hrülai pei dukayu veo nasüe.

⁴ Puhnou deiphao veishi thoukayu deibvü hinou poa kukayu deichi hi khete khasa-a bue.

⁵ Zai hai puhvei-e, daiolouzü haisü puhnou soupeie; ae puhnou dei hai-a soupeie.

⁶ Tavelo, Etao puhye nakou khurüloua tho laikhe; Etaoye Sou-apeio Mapao nghoujü nou Eletao khoukhü loulai she!

⁷ Daiolouzü puh hai Etao vei Ramai-e; Etao hai puhnou pouto aveih hinou kiko peia buyu maitao-e, ae puh bah hinou buyu zhaotutao-e. Puhnou zhou Etao hi daitea paowe keilou laikhe:

⁸ “Neletao vei puopaoh maitao nou Merribah hinou, ae Massah touyu radeiki hinou rochiyu büa neletao louzü rochiso.

⁹ Enou puletaoye donou soupfü peikhai touyu vah khesü puletao nou ngao-a bulukhu, buh sühi sünou puletao nou Eye kabü laisa tea zhure.

¹⁰ Po raidai hai Enou puletao vei khaphao nasü ngaoshi shore. Enou paoe, ‘Puletao hai daizhou koute chilee more sarou! Puletao nou avei chikha khesü zübare.’

¹¹ Enou rarou loua haibüa chaachou souwure: ‘Enou neletaoye panou sochao loure donou peikhai touyu teidei hisü neletaoye panou taloukhai toulai moe.’ ”