LOUTAO 92 - SHEEYU BAIBEL (BSI)

Paoshoyu lou

¹ Oh Mapaowo, ne hi kalo paoyu hai daizhou koute veisa, nevei zhih aveih nasü lou soushoyu hai dai zhou kou te savasa, Oh Kukulai hi buyu Ramai,

² nevei tobai soumoa leshi pei nasü teithetsü shapaoyu hai, ae nevei chilee checheyu nasü kheitsü shapaoyu hai daizhou koute veisa,

³ poa lou souyu basei nou koa kho veishoa neye lou soushoyu hai daizhou koute vei sarou!

⁴ Oh Mapaowo, nevei vah haso sünou Eye sousa vapei; nenou soupfü khaitouyu vahtao donou E asa-a lou souwe.

⁵ Mapao, nevei vah haso khesü daizhou koute dusa! Nenou tsüchoyu khesü daizhou koute thousarou!

⁶ Hai khesü avomai nou sülou hoe; tsü chemoyu maitao nou sükulou hoe;

⁷ mai ashi mainou poube paopayu büa paopa malae; vah ashi souyu maitao nou duso-a bua malae; ana puletaoye sü souhakhai-a bailai,

⁸ daiolouzü Mapao hai kukulai hinou teisa puhnou khosa-a hrülai.

⁹ Etao nou süwe sülouzü neye ngaobayu maitao hai thaita-a bailai, ae mai ashi maitao hai hakata-a bailai.

¹⁰ Nenou Eye sü rekou chode ali büa soukhouchi peie; nenou Eye savayu shiha sü peie.

¹¹ Eye ngaobayu maitao nou hakatayu sü Enou ngaore, ae mai ashi maitao nou kra-a buyu pai sü Enou choure.

¹² Acheche mai hai habe büa duso palai; puletao hai Lebanon hi sedar süübe büa vipalai.

¹³ Puletao hai Mapao vei ki hinou shokhai touyu süübe ali bülai, Etao Ramai vei Rathoki hinou duso palai,

¹⁴ tsülouyu thai-a rashithou alao shipeiyu bülai, ae teisa nou daiva-a nou khouchi-a bukoulai.

¹⁵ Haibüa soupeiyu donou Mapao hai cheche-e touyu sü ngaowe, puhnou Eye kho-apeio nasüe ae puh hi cheche moyu aliro hae.