LOUTAO 90 - SHEEYU BAIBEL (BSI)

LARÜBVÜ ADAINA ( Lou 90—106 ) Ramai ae Mai

¹ Oh Mapaowo, nenou Etaoye panou baichao loure ki nasü teisa nou soupeie.

² Deichitao soupei mojü nou moa teideiphao soushumo jünou ne hai akhai hayu Ramai-e, ae haithai-a teisa nou bure Ramai sü ne baie.

³ Nenou maiye sü puhnou veyu buh hi soudakhai thoupeie; nenou puhye sü nai hi soudakhai thoupeie.

⁴ Ne hiolouzü po theli hai teithe ali bütoua baie; süna hai latayu do teithe raibütoua baie, kheikou teile jütouli bütoua baie.

⁵ Nenou Emaiye sü dzüdu nou dupoa tayu büa phaipoa tare, Emaitou hai zhiho mekou bütoua baie. Shona paopayu poubetou ali bütoua baie,

⁶ süna hai vipaloua heakou poupa pahpaloue, süthaisü koukhe loukhaie kiveta-a thaita baiwe.

⁷ Nevei lekha sünou Etaoye sü soushiwure, ne vei rarou sünou Etaoye khuh soupa peiwure.

⁸ Etao vei mahmo khesü nenou nevei nghoujü hi khaitoue, ae Etao nou kheikhei soua mah soukhai touyu khesü nenou nevei nghingao hi khaikhaitoue.

⁹ Etao vei hrümamai hai nevei lekha sünou soujü khai peiwure, Etao vei po teile hai kheikhei soua pai raoyu büa hatare.

¹⁰ Etao vei hrütou hai po rainai baie— hakinou pfüphao vei-a bulouzü po raicha sü baie; ana sütao hia veahoyu ae tateishoa hrüyu khaikho baie; hrümamai hai thasho nou hata-a baiwe, ae Etao hai sübüa ta-a baiwe.

¹¹ Nevei lekha sü khouko kazhou bue touyu sü thaonou süwe? Nevei rarou nasü ngaopiyu kazhou pove peilai touyu sü thaonou süge?

¹² Etao vei hrütou hai jüsho baie, südonou kabüa tsüveia hrüloulai touyu nasü Etao hi doupeio.

¹³ Nevei lekha rarou nasü teile kasho bukou laige? Oh Ramai, nevei kilai Etaoye zhuvea peio.

¹⁴ Teithetsü nevei tobai soumoa leshi peiyu nasü Etao hi peio, sükulouzü Etao vei hrümamai veishi hai lesa-a neye lou sousholai.

¹⁵ Etao nou po teile haitao hi veahoyu ae leveayu thaosü chunou Etao hi savayu nasü peio.

¹⁶ Nevei kilai maitao hi nevei vah haso khesü soungao peio, ae Etao vei tyaosholea hi nevei khouko ava nasü ngaopeio.

¹⁷ Etao Ramai Mapaowo, nevei ha nasü Etao hi peio. Etao nou soupfüyu veishi hai panou veilouyu sü soupeio!