LOUTAO 9 - SHEEYU BAIBEL (BSI)

Kaozü hinou Vah Soupeiyu donou Ramai hi Kalo Paoyu

¹ Oh Mapaowo, Enou neye avei tsüle teitei nou peia paosholai; nenou soupei khaitouyu khupa vah teitei sü Enou paolai.

² E ne vanou asa shoa lou soulai. Akukulai hi buyu Ramai, Enou neye lou sou sholai.

³ Eye ngaobayu maitao hai neye ngaolouyu phaki dakhai ta-a baiwe; puletao hai kaodu ta-a bailai.

⁴ Nevei chiku peiyu hai veie ae züe, alia nenou avei leli ae ajüpa hinou chi sü kupeie.

⁵ Nenou tyahrü kukheye züpeie, ae mai ashi maiye sü souha peie; puletaoye sü teisa nou lichopu khailai more.

⁶ Etaoye ngaobayu maitaoye sü souhakhai touwure; nenou puletao vei nuhdu khesü souha peiwure, ae puletaoye teisa nou ngaiche khowure.

⁷ Ana Mapao hai teisa vei veo süe; chikure donou puhnou vebuh sü soushu loure.

⁸ Puhnou deiphao maiye acheche hinou tukhasa-a bupeie; puhnou kaozü hinou tyahrütaoye chiku peie.

⁹ Mainou souvea laiyu maitaoye donou Mapao hai baibue, veaho-a buyu phaki kaovei-a sochao loure buh alie.

¹⁰ Mapao, neye süyu maisü neye louchewe; ne hi veyu mai taliye nenou thaopei moe.

¹¹ Zion hinou buyu Mapao ye lou sousho khaio! Puhnou souyu vahtao sü tyahrü hülai hi paongao peio!

¹² Veaho-a laiyu maiye Ramai nou licho peie; puhnou puletao vei krayu nasü ngaipei moe, ae puletao hi kaomoa souveayu maiye puhnou tudee peie.

¹³ Oh Mapaowo, Eye zhuvea peio! Eye ngaobamai nou souveayu avea sü zhupeio! athai hinou Eye vupa peio, Oh Mapaowo.

¹⁴ Sübüa Eye panou Jerusalem hi buyu maitao nghoujü laloure donou alia neye daidonou paoshowe touyu sü Enou puletao hi paongao peire donoue. Nenou Eye khailu peiyu donou E asalai.

¹⁵ Tyahrü kukhe maitao hai lah puletao nou hekhai touyu deibvü hi deloure; puletao hai lah nou rüh southou khaitouyu hinou muloure.

¹⁶ Mapao hai puhvei checheyu chidei hisü nou lah puhye süngao peiwe, ae mai ashimai hai lah puletao vei rüh hinou muloua baiwe.

¹⁷ Mai ashi maisü khü hi dakhai loulai, Ramai ye ngaiyu mai hrülai hai khü hi dakhai loulai.

¹⁸ Touhayu maiye sü teisa nou ngaophou moyu soulai moe; veaho laimai vei areih sü teisa nou ha-a bailai moe.

¹⁹ Tave peio, Oh Mapaowo! Maiye panou ne jünou ngalouso! Tyahrütaoye sü ne nghoujü hinou save chiku peikhaio.

²⁰ Oh Mapaowo, puletaoye sü soupi peikhaio; puletao hai thai-a bailaiyu mai baie tiyu nasü panou sülou khaio.