LOUTAO 89 - SHEEYU BAIBEL (BSI)

Veahoyu phaki Lou Souyu

¹ Oh Mapaowo, nevei tobai soumoa leshi peiyu nasü Enou teisa nou lou soulai; nevei chilee checheyu nasü Enou teisa nou shapaolai.

² Nevei leshiyu hai teisa nou bua bailai, ae nevei chilee checheyu nasü ratei büa bukou telai touyu Enou süwe.

³ Nenou paoe, “Enou dolouyu maitaoye koa vo ali soukhai toue, ae avei kilai David hai Enou haibüa chaachou soupei khaitoue.

⁴ Enou nevei tyaosholea taoye panou vere khaphao teitei hi veo sü soukou telai; Enou nevei tyaosholea taoye sü teisa donou soushu peilai.”

⁵ Oh Mapaowo, nenou khupayu vah soupeikhai touyu khesü rakiva mainou lou soushowe; sheeyu maitao nou nevei chilee checheyu nasü lou soushowe.

⁶ Rakivamai ali-a neye raiyu ha-e, Mapao; rakivamai ali koute-a neye deiyu hae.

⁷ Sheeyu maitao nou tave jüa buyu buh hisünou neye ngaopi-a bue; ae puletao mai hrülai nou neye khuhao-a nou lapoa bue.

⁸ Khoukhoulai Ramai Mapao, neye büa khouko buyu mailia ha-e; ha teitei hinou ne hai chilee cheche-e.

⁹ Nenou khouko bushoyu zaidu pei hia khowe, ae zhaipou shishoa dzü khüpayu hai-a soukaona peilou baie.

¹⁰ Nenou maitouyu Rahab soukhaona nasü southa peie; nevei khouko sünou neye ngaobayu maitaoye sü soukanghi peie.

¹¹ Raki ae deiphao sü nevei baie, nenou teideiphao ae sühi na veishi sü soupeie.

¹² Nenou teibe ae teizü sü soupeie, Tabor ae Hermon Deichi sünou asasho poa neye lou soushowe.

¹³ Ne hai daizhou koute khouko busa! Nevei pfüchi hai daizhou koute duso sarou!

¹⁴ Nevei vedei nasü acheche ae kaozü hinou soushu khaitoue; nenou soupfüyu vah teitei hai leshiyu ae chilee checheyu hinou soungao peie.

¹⁵ Oh Mapaowo, neye lou soupoa thoyu maitao ae nevei zhuvea hinou hrüa buyu maitao hai daizhou koute savayu maitaosa!

¹⁶ Puletao hai ne vanou lesa shoa teisa nou bua baiwe, ae nevei aveih khesü puletao nou paoshowe.

¹⁷ Nenou Etaoye veilou ngalouyu nasü peie, nevei leshiyu sünou nenou Etaoye kolouyu nasü peie.

¹⁸ Oh Mapaowo, nenou Etaoye vupa-apeio nasü dopa peie; Israel maivei sheeyu Ramai, nenou Etaoye sü veo ali peie.

Ramai nou David hi Apaopeiyu

¹⁹ Daoh raichoki nenou louchelou veiyu nevei kilai hi zho kounou haibüa paoe: “Enou khouko bushoyu reihmai aliye soukha peie; Enou maikhe mai hrohinou dopa louyu mai aliye vebuh sü peie.

²⁰ Enou avei kilai David ye sheeyu theadzü sünou pa veo soure donou napeie.

²¹ Avei pfüchi nasü teisa nou puh hi bulai, avei khouko sünou puhye sü soukhouchi peilai.

²² Puhye ngaobayu maitao hai puh jünou veilou khai toulai moe, ae mai ashi maitao nou puhye sü hraongu soupei louhoe.

²³ Puhye ngaobayu mai veishi sü Enou souha peilai, ae puhye ngaorayu mai hrülaiye sü Enou southa peilai.

²⁴ Enou avei louchelou veiyu ae tobai soumoa leshi peiyu nasü teisa nou puh hi bulai, ae Enou puhye sü panou kolou ngalou koutelai.

²⁵ Enou puhvei vedei sü Mediterranean zai hinou poa Eupheritis Rei hi koute souduso papeilai.

²⁶ Puhnou ahi haibüa paolai, ‘Nenou apuo-e, ae avei Ramai-e; ne hai Eye vupa-apeio ae khailupa peiyu nasüe!’

²⁷ Enou puhye sü anahpoutu naraio nasü soupeilai, ae vemai hrülai hrohinou dukayu nasü soupeilai.

²⁸ Enou puh hi apaokhai touyu teitei sü souvete peilai, ae Enou puhye koa vo soukhai touyu nasü teisa nou bukoute peilai.

²⁹ Enou puhvei tyaosholea sü panou teisa bukoute peilai, ae puhvei vebuh nasü panou ratei büa akhai bulai moe.

³⁰ “Ana puhvei tyaosholea maitao nou avei chikha khesü zülou more toulouzü, ae avei kharochi thaifüa hrümore toulouzü,

³¹ ae Enou paodu peiyu khesü ngaophou molouzü, ae avei chikha thaifüa talou more toulouzü,

³² süthaisü Enou puletaoye sü puletao nou mahmo souyu donou tudee peilai, ae puletao nou kaomoa soupfü khaitouyu donou puletaoye sü souvea peilai.

³³ Ana Enou David ye sü leshi koute peilai, ae puh hi apaokhai touyu khesü Enou souvete moyu sü soulai moe.

³⁴ Enou puhye koa vo soukhai touyu nasü pfütho laimoe, moyuma Enou puh hi chaachou soukhai touyu khesü ali koute-a souvete peimoyu sü soulai moe.

³⁵ “Ha teitei sü Enou bakha ali soua avei sheeyu zhih hinou chaachou souwure; Enou David hisü dayu hai soukhai toulai moe.

³⁶ Puhye panou tyaonah bukoute peilai, ae Enou teinghi hamo koute puhvei vedei sü zhupeilai.

³⁷ Khouh büa panou teisa sü bukoute peilai, ratei bubusa sü panou bukoute peilai.”

Veo nou Hraongu Ngaoyu donou Dopfüyu

³⁸ Ana nenou dolouyu veoye sü nenou lekha loure; nenou puhye sü chuo malaiwure ae popei more.

³⁹ Nenou puhye koa vo soukhai touyu nasü pfüthowure ae puhvei veo peirü nasü konai hi laithou peiwure.

⁴⁰ Nenou puhvei nuhdu kivo khesü dakhowure, ae puhvei reikhao buh khesü soushi peiwure.

⁴¹ Ludu tacho poa kouyu mai hrülai nou puhvei na khesü vaoloure, ae kinapa mai hrülai nou puhye sü konüa bure.

⁴² Nenou puhye ngaobayu maitao hisü veilouyu nasü peire, nenou puletaoye sü sousava peie.

⁴³ Nenou puhvei reih basei khesü soushi peiwure ae puhye panou reihbu hinou hraongu ngaore.

⁴⁴ Nenou puhvei bah hinou puhvei khekai nasü polai peiwure, ae puhvei vebuh nasü deiphi hi soukaokou khaipeiwure.

⁴⁵ Nenou puhvei hrümai veiyu nasü soujü laiwure, ae puhye sü panou hraongu pfüa bure.

Khailupa Peio tea Veachi Paoyu

⁴⁶ Mapaowo, ne teisa nou tutsüloua bailaiwu? Teile kasho nevei lekha rarou nasü mei büa kei-a bulaige?

⁴⁷ Avei hrütou hai daizhou koute jüsa licho peio, thai-a bailaiyu mai hai nenou soupeia baie touyu sü ngaipeiso.

⁴⁸ Hriyu maitao hai thaonou thai moa bulaige? Thaonou khüh hi loumoa lahye vupalou süyu khouko sü bue?

⁴⁹ Mapao, nenou raichoki Etaoye leshi peiwe touyu vei shee sü daiki bue? Nenou David hi apaokhai touyu khesü daiki bue?

⁵⁰ Nevei kilai Eye mainou kabüa hraongu soupeiwe, ae neye sümoyu maitao nou Eye kabüa chaa peiwe touyu khesü ngaipeiso.

⁵¹ Oh Mapaowo, nevei ngaobayu maitao nou nenou dopa louyu veoye konüa ngaophou moyu sü soupeiwe! Puhnou tayu buh veishi hisü puletao nou ngaophou moa konüa lai-a baire.

⁵² Mapao ye sü teisa nou paosholo! Amen! Amen!