LOUTAO 88 - SHEEYU BAIBEL (BSI)

Kra-a nou Soukha Khoyu

¹ Eye khailupa apeio, Ramai Mapao, Enou heamajü kra-e, ae khei koua Enou ne hi ve-e.

² Avei veachi sü kei peio; Enou kra-a soukha khoyu nasü noupeio.

³ Ewo veahoyu khaikho ve dao-a bubaire, südonou Ewo thaiyu nghitei baire.

⁴ Thaita laiyu mai ali raibüa Ewo bu baire; avei khouchi veishi sü hare.

⁵ Thaimai hrohi poa Eye sü laithouwure; southa loua khüh hi pokhai touyu mai ali büre. Licho khailai moyu mai ali büre, ae nenou soukha louhoyu mai ali büa khaiwure.

⁶ Nenou Eye sü thoushoyu khüh, zhikayu ae thoukayu buh hisü laithou khaiwure.

⁷ Nevei lekha rarou sünou apei hi sühsho-a nou khaipeie, ae sünavei dzü khüpayu nanou Eye maoloure.

⁸ Nenou avei samai khamaiye sü panou Eye thaowua tare; ae puletaoye panou Eye ngaora shoyu nasü soupeie. Eye sü khube khaiwure ae tupalou hore;

⁹ veahoyu donou anghithou sü halia ngaolou hore. Mapaowo, teithetsü Enou neye kuwe, ae abah sü lapoa nou ne hi veachi paoe.

¹⁰ Nenou thaitayu maitao hi khupayu vah khesü soungao peiwu? Puletao nou tashuloua neye paosho laivu?

¹¹ Nevei tobai soumoa leshi peiyu nasü khüh hi paongao peilaiwu? Moyuma nevei chilee checheyu nasü soukanghi khaitouyu buh hinou paopeivu?

¹² Nevei khupayu vah haso khesü zhitei touyu buh hinou ngaolaivu? Moyuma nevei aveih nasü mainou ngaiyu teidei hinou ngaolou süvu?

¹³ Mapaowo, Enou ne hinou soukha peio tea khowe, shona tsü sü Enou ne hi veachi paoe.

¹⁴ Mapaowo, daivanou ne Eye malaiwe? Ne daidonou ahinou tarei tawe?

¹⁵ E nahle-a bukinou veahoyu khesü daoshore, ae thaiyu nore; nenou Eye tudee peiyu vanou chuo E haliro soulou hore.

¹⁶ Nevei lekha rarou sünou Eye soushi peiwure, nevei zhaipou ashi sünou Eye souhawure.

¹⁷ Puletao nou heamajü Eye sü dzüdu nou sühao poa buyu büa buloure; puletao nou Eye sü sühao loure.

¹⁸ Nenou avei sapokha veikayu maitao koutea panou Eye sü thaowua tare, chuo teimai teizhi na likhei avei samai soua bubaire.