LOUTAO 85 - SHEEYU BAIBEL (BSI)

Ramai vei Soukha Khoyu

¹ Mapao, nenou nevei teideiye sü zhuvea peie; nenou Israel maiye sousava pupeie.

² Nevei maitao nou mahmo soukhai touyutao, ae puletao nou soupfü khaitouyu mah veishi sü nenou khaipeie.

³ Nenou puletaoye sü rarou peipu more, ae nevei lekha teitei sü puletao hinou podakhai laipeie.

⁴ Etaoye khailupa–apeio, Oh Ramai, Etaoye sa-a dakhai vepeio, ae Etao pei hi vamoyu nasü polai peio.

⁵ Ne Etao pei hi teisa nou rarou bailaivu? Nevei lekha nasü khaitalai mowu?

⁶ Etaoye soukhou souhripu peio. Nevei maitao, Etao nou neye sü paosholai.

⁷ Oh Mapaowo, nevei tobai soumoa leshi peiyu nasü Etaoye ngaopeio, ae nevei khailupa peiyu nasü Etao hi peio.

⁸ Ramai Mapao nou chi paoyu nasü Enou kei nou bue; daiolouzü puhnou puhvei maitao, ledaloua puh hi dakhai velouyu maiye sü puhnou kaonayu nasü peilai touwe.

⁹ Cheche vujünou puhye tsükhoua buyu maitaoye sü puhnou khailu peilai, ae puhvei khouko ava nasü teisa nou Etao vei teidei hisü bupeilai.

¹⁰ Tobai soumoa leshi peiyu ae louchilou veiyu nasü tave daolai; acheche ae kaonayu nasü alinou aliye mütei-a kholai.

¹¹ Louchelou veiyu nasü deiphao hinou paopalai, ae acheche nasü raki vanou zhu koulai.

¹² Mapao nou Etaoye sousava peilai, ae Etao vei teidei sü thoudzü veisho-a nou peipulai.

¹³ Acheche nasü nou Mapao vei nghoujü nou rai-a tapeilai, ae puhye donou ludu sü souda peilai.