LOUTAO 84 - SHEEYU BAIBEL (BSI)

Ramai vei Ki Naye Ngaothaiyu

¹ Ki paopu soua buyu Mapao, nevei Rathoki hai daizhou koute veisarou!

² Enou sühi buyu hai jüpa sho-e! Enou Mapao vei Rathoki hi dukinou ve bulaisa tea nou thainüa zhia bue. Avei tsüle ae hrümai veishi nou sasho-a hriyu Ramai hi lou soushowe.

³ Khoukhoulai Mapao, apuo veo ae avei Ramai, khaitu ae taitu koute-a nevei ki hinou phe soua bue, puletao vei toutu hai nevei posheelabu nghia nou khaikhaitoue.

⁴ Nevei Rathoki hinou bua teisa nou neye soushoyu lou soua buyu maitao hai daizhou koute sava sarou!

⁵ Ne hinou khouko ngaolouyu maitao, ae puletao vei tsüle hinou Zion Deichi vanou tave ratho nüyu maitao hai daizhou koute vasayu maitaosa!

⁶ Puletao nou Baka deikho tachopoa kouyu phaki, sühisü dzüla payu buh ali soure; dzükhao khesü kaki-a teirü rükou phoutao loure.

⁷ Puletao nou tapo koukhaie khouko ngaopu lailai pare, ramaitao vei Ramai nasü puletao nou Zion hinou ngaoloulai.

⁸ Khoukhoulai Ramai Mapao, avei veachi sü keipeio. Avei akho nasü kei peio, Oh Jakob vei Ramai.

⁹ Oh Ramai, nenou dolouyu Etao vei veoye sü shiha peio.

¹⁰ Nevei Rathaoki hinou teithe ali buyu hai buh kukhe hinou teithe theli buyu jünou veipu hie. Mai ashi maivei ki hinou hrüa bulaijüo avei Ramai ki hi taloure rokhubomü hinou la-a buyu hai-a veipu hie.

¹¹ Daiolouzü Ramai Mapao hai Etaoye vupa-apeio ae kathe bushoyu veo nasüe, puhnou Etaoye zhuvea peie ae tsükhouyu nasü peie. Acheche hinou hrüyu maiye sü puhnou haveih khesü peiba chamoe.

¹² Khoukhoulai Mapaowo, neye loucheyu mai sü daizhou koute sava sarou!